1 Corintios 5 - TÄ̧DO Ä̧CUÄ̧ I̧HUȨNȨ

Ya̧tȩ jä'o irecuarö ki̧nö̧do

¹ Ja̧'hua̧ta̧nö̧ koro'inä pä'ö ucuocuätö ucuturu. Ucututtu ya̧tȩ jä'o irecuarö kö̧. Ja̧u̧mä̧ yoröiso surojö. Diosrö esetocotö'inä yoröiso jȩpo̧co̧tö̧ ja̧u̧ surojö.

² Ja̧'hua̧nö̧ ja̧'a̧nä̧ ji̧nä̧ isocu a'cuoyäunu amöcuädätöjä ucutumä. Isocö̧. Cua̧'cua̧ tta̧'ȩcu̧ cuamöcuädätucu'a̧nö̧ ja̧'a̧to. Ja̧u̧ru̧mä̧, ja̧u̧ surojö jȩpö̧rö̧mä̧, ucututtu 'quȩ'ȩpö̧ cuicuätucu'a̧nö̧ ja̧'a̧.

³ Ttömä ucututtu kara'a chö̧jo̧mȩnä̧'i̧nä̧, ji̧nä̧ yo̧mȩtȩ ucutucu kö̧sä̧ espíritunä. Ja̧'hua̧nö̧ ucutucu chö̧ja̧'a̧ jä̧'i̧nö̧'a̧nö̧, kara'a'inä kä̧nö̧, amöcuädösä ja̧u̧ surojö jȩpö̧rö̧ jȩcu̧'ä̧tu̧cua̧rö̧ pä'ö.

⁴ Tu̧ru̧hua̧ Jesucristo i̧mi̧nä̧ ppäsähuätucui. Ttö'inä ucutucu ji̧nä̧ yo̧mȩtȩnä̧ ppä̧dä̧chä̧rä̧cua̧sä̧ espíritunä. Ja̧'hua̧ta̧nö̧ Tu̧ru̧hua̧ Jesús ujurunä ö̧jä̧cua̧ ucutucu.

⁵ Ja̧'hua̧nö̧ ppäsähuipö, ja̧u̧ru̧ iyätucuirö Satanásrö, chutä jä̧ttä̧pä̧ya̧ toei'äcua'a̧nö̧, a̧'cua̧ru̧hua̧ ö̧ji̧pa̧'a̧nä̧, Tu̧ru̧hua̧ Jesús ichomenä.

⁶ Ja̧'hua̧ta̧nö̧ ucutumä a'cuoyäunu cuamöcuädätucu juiyäcua'a̧nö̧ jȩcu̧'ä̧tu̧cu̧ amöcuädö. Ucutumä pättö huȩnȩmä̧ ¿jerupätöjä tä̧ji̧? “Ji̧'qui̧cha̧nö̧tä̧ pan ppö̧ä̧mö̧ juäi ȩnö̧, o'ca juiyönä pan ppö̧ä̧ma̧'a̧.”

⁷ Ja̧'hua̧nö̧ ja̧'a̧ttö̧ ja̧u̧ ppö̧ä̧mö̧ juäi'a̧nö̧ surojö, pä'äji jähuä, ucututtu do'opö icuätucui, koro pan jareö pascua fiestanä ttucu jä̧'i̧nö̧'a̧nö̧, cu̧ja̧cuä̧tu̧cua̧ pä'ö. Cristomä sacrificionä jȩpö̧ 'corupä'i'inö ujuturu. Chutä ujutu Cordero päi'önä kö̧.

⁸ Ja̧'hua̧nö̧ ja̧'a̧ttö̧ iso päi'önä adiunätä amöcuädö, pascua fiesta adiu jȩtta̧'a̧ jä̧'i̧nö̧'a̧nö̧ tö̧ja̧cuä̧tu̧cua̧ja̧. Pan pä'äji jähuä ppö̧ä̧mö̧cu̧ surojö jä̧'i̧nö̧'a̧nö̧, surojö jȩä̧cuä̧huä̧ juiyönä tö̧ja̧cuä̧tu̧cua̧ja̧.

Ja̧'hua̧nö̧ jȩpä̧tö̧cu̧ cuecuhuächätucuä'

⁹ Koro cuyärunä pä'äji chi̧huȩyu̧ti̧nö̧ ucuturu, huȩyu̧ti̧nö̧sä̧ ka̧ra̧ irecuarö usu jȩpö̧cu̧ cuecuhuächätucu juiyäcua'a̧nö̧.

¹⁰ O'ca toi'önä pi̧jä̧nä̧ ka̧cuä̧tö̧cu̧ ka̧ra̧ irecuarö usucu'inä, korotö ttu̧ju̧nä̧rö̧ ta'anö ttu̧ju̧nä̧ra̧ pä'ätöcu'inä, nä̧u̧cuä̧rä̧tö̧cu̧'i̧nä̧, pi̧jä̧ ttu̧mö̧nä̧ adicuä esetätöcu'inä cuecuhuächätucuä' pä'ocösä. Ja̧'hua̧nö̧ jȩpä̧tö̧cu̧ cuecuhuächätucu juiya pä'ö, pi̧jä̧ttö̧'i̧nä̧ rä'opötä jahuätö toönä cue'ächajatöjä.

¹¹ Ja̧'hua̧nö̧ chi̧huȩyu̧to̧mȩnä̧, ya̧tȩ Cristonä tö̧jä̧hua̧ pättäcuru ja̧'hua̧nö̧ cue'ächöcu, cuecuhuächätucu juiyäcua'a̧nö̧ pä'inösä. Iso päi'önä ya̧tȩ tö̧jä̧hua̧tö̧ ja̧'hua̧nö̧ jȩpö̧mä̧, ka̧ra̧ irecuarö usu, korotö ttu̧ju̧nä̧rö̧ ta'anö u̧ju̧nä̧ra̧ pä'ö'inä, pi̧jä̧ ttu̧mö̧nä̧ adicuä esetö'inä, yapareu ji'äu'inä, tä̧'ä̧mö̧'i̧nä̧, nä̧u̧cu̧'i̧nä̧, ja̧u̧cu̧mä̧ cu̧cuȩ'i̧nä̧ cucuätucuä'.

¹² Ttömä iso päi'önä pä'ocösä korotörö, Diosrö esetocotörö. Diosrö esetätörötä pä'ätöjä ucutumä.

¹³ Churutä esetocotörö, chutä Diostä pä̧cua̧. Ja̧'hua̧nö̧ ja̧'a̧ttö̧ chutä ucututtu suronä jȩpö̧rö̧ 'quȩ'ȩpö̧ icuätucui ucututtu.