1 Corintios 4 - TÄ̧DO Ä̧CUÄ̧ I̧HUȨNȨ

Jesús hue'ähuotörö suronä cuamöcuädätucuä'

¹ Iso päi'önä jahuätömä Dios i̧huȩnȩ, ttö̧ja̧ ttieru huȩnȩ, jittähua pä'ö Cristo hue'ähuotödo pä'ö cuamöcuädätucuaja ujuturu.

² Ja̧'hua̧ta̧nö̧ ya̧tȩ huȩ'ä̧hua̧mä̧ o'ca toi'önä adiu repe'ö ttucuocuarö pä'ö ö̧jö̧'a̧nö̧ ja̧'a̧.

³ Ucutu'inä, curuhuotöcu'inä ttörö huȩnȩtö̧ cucuocuätucuomenä, yoröiso cha̧'cua̧ tta̧'ȩcuo̧cö̧sä̧. Ttötä chamönä amöcuädö, ro̧'ȩpö̧ ucuocuäcuähuocösä ttötämä.

⁴ Iso päi'önä ttötä chamönä jȩchö̧ jȩru̧pa̧sä̧. Ja̧'hua̧nö̧ ja̧'a̧ttö̧ pä'ocösä ttömä suronä jȩpo̧cö̧sä̧ pä'ö. Ya̧tȩtä̧ Chu̧ru̧hua̧tä̧ adiu pä̧cua̧ ttörö.

⁵ Ja̧'hua̧ ji̧yä̧cu̧ ä'canä päcuhuätucuä' ucutumä. Tta̧'ä̧rä̧tu̧cui̧ Tu̧ru̧hua̧ ichäcua'a. Ja̧u̧ o'ca juiyönä yo̧ö̧mä̧ i̧jȩpä̧cua̧ tȩa̧u̧nä̧. Ja̧'hua̧ta̧nö̧ o'ca juiyönä pi̧jä̧ ttö̧ja̧ ttami iso'quinä ttamöcuädömä i̧jȩpä̧cua̧. Ja̧u̧nu̧tä̧ Dios i̧yä̧cua̧ eseäcuähuä o'ca toi'önä adiu jȩpä̧tö̧rö̧.

⁶ Chö̧jä̧hua̧tö̧, pi̧yȩ Apolosrö'inä, ttörö'inä ji'äusä ucuturu, adiu cu̧huo̧jui̧'ä̧tu̧cuä̧cua̧'a̧nö̧. Iso päi'önä huȩyu̧cuä̧ huȩnȩ päö ta'anö jȩpä̧tu̧cui̧. Ya̧tȩ Dios i̧huȩnȩ ji'äuru cujö'cätucuoca'anä, ka̧ra̧rö̧tä̧ repe'ä̧rö̧ cuamöcuädätucuä'.

⁷ ¿Dijä̧ttö̧ ucuru aditinömä, korotöttö'inä abonänö adihuä i̧sa̧ päi'önä cu̧ja̧ pä'ö? O'ca juiyönä cu̧ju̧nä̧rö̧ ¿Dios iyocö pi̧nö̧ tä̧ji̧ ucuru? Ucutumä cu̧ju̧nä̧rä̧tu̧cu̧ cuamönätucunä ȩmi̧nä̧tö̧jä̧ pä'ö jȩpä̧tö̧jä̧. Ja̧'hua̧nö̧ ja̧'a̧ttö̧ iso päi'önä Dios iyinöttömä ¿tta̧'a̧nö̧ pä'ö jȩcu̧'ä̧tu̧cuä̧ ja̧'hua̧nö̧ ucutumä?

Pa̧'a̧nö̧ amöcuädätö pi̧jä̧ ttö̧ja̧ Jesús hue'ähuotörö

⁸ Ucutumä täcö järe ruhuotö pä'i'ö o'ca juiyönä ku̧nä̧rä̧tö̧jä̧ a̧'cua̧ra̧'a̧. Ruhuotö a̧'cua̧rö̧nä̧ pȩjä̧mä̧tö̧jä̧, ujuturu 'quȩ'ȩcu̧ icu. Iso päi'önä ruhuotö päi'önä cu̧ja̧cuä̧tu̧cu̧ttu̧mä̧, adihua'a. Ja̧u̧nu̧ ujutu'inä hue'ajatöjä ucuturu.

⁹ Juhuorö'inä ttö pä'ösä, Diosmä Jesús hue'ähuotörö usurä isotö ttö̧jö̧'a̧nö̧ ttö̧ja̧cua̧ pä'ö hue'inödo. Iso päi'önä korotö cuä'ö tticu'a̧nö̧ huotö ttö̧ja̧cua̧'a̧ jä̧'i̧nö̧'a̧nö̧, o'ca toi'önä ángeles'inä, pi̧jä̧ ttö̧ja̧'i̧nä̧ tottönä ka̧cuä̧tö̧jä̧ ujutumä.

¹⁰ Ujutumä Cristorö esetätörö “Yoröiso ttu̧'ȩpä̧ro̧co̧tö̧” pä'ätö. Pärocua'acu ucuturu “Cristo i̧huȩnȩ rö̧ȩnä̧ huo̧juä̧tö̧” pä'ätö. Ja̧'hua̧ta̧nö̧ ujutu tijuiyuhua'anä, ucutumä juruhuätöjä. Ja̧'hua̧ta̧nö̧ pi̧jä̧ ttö̧ja̧ ujuturu ttöjö'coca'anä, ucuturu ucuotätö.

¹¹ Jitä mo̧ro̧ päi'önä ppäi ttu'u, tu̧cuȩ'i̧nä̧, tahua'inä jui'ätöjä. Tö̧'ca̧tä̧huä̧ti̧yu̧'i̧nä̧ jui'ätöjä. Ttö̧ja̧'i̧nä̧ suronä jȩpä̧tö̧ ujuturu. Tojusode'inä jui'ätöjä.

¹² Ja̧'hua̧ta̧nö̧ tu̧mö̧nä̧ aditö'inä 'cuä'ächi'ätöjä. Ttö̧ja̧ suronä huopätö ujuturu. Ja̧'hua̧nö̧ ja̧'a̧nä̧ adiunätä ädätätöjä. Suronä jȩpä̧tö̧ ujuturu. Ja̧'hua̧nö̧ ja̧'a̧nä̧ tami 'qui'ächi'ö ka̧cuä̧tö̧jä̧.

¹³ Korotömä suronä ucuocuätö ujuturu. Ja̧'hua̧nö̧ ja̧'a̧nä̧ adiunätä ädätö ucuocuätöjä jahuätörö. Ja̧'hua̧ta̧nö̧ pi̧jä̧ttö̧ icuicuä'inä, usurä isotö'inä tticuipa'a jä̧'i̧nö̧'a̧nö̧, pi̧jä̧ ttö̧ja̧ jȩpä̧tö̧do ujuturu jitä mo̧ro̧ päi'önä.

¹⁴ Pi̧yȩ huȩnȩ huȩyu̧to̧cö̧sä̧ ucuturu cudäpecuhuätucua pä'ömä. Chi̧tti̧mö̧rö̧ rȩni̧'ä̧tö̧rö̧ ppädäda'a jä̧'i̧nö̧'a̧nö̧, ucuturu ppädäda pä'ö huȩyu̧tu̧sä̧.

¹⁵ Ja̧'hua̧ta̧nö̧ recuätö huo̧juȩtä̧tö̧ isotö, to̧mö̧rȩ jähuä mil jo̧mȩnä̧, ucuturu Cristo i̧huȩnȩ ttu̧huo̧juȩto̧mȩnä̧, cuä̧'o̧tö̧mä̧ recuätömä to'ätöjä. Ttötäsä cuä'omä Cristo Jesúsru cuesetätucuomenä. Ttö ttö̧ja̧ suronä jȩttö̧ jȩpö̧ icu huȩnȩ ji'ähuinösä ucuturu.

¹⁶ Ja̧'hua̧nö̧ ja̧'a̧ttö̧ ttö pä'ösä ucuturu, ttö cuedächö'a̧nö̧ cue'ächätucui.

¹⁷ Ja̧'hua̧nö̧ ja̧'a̧ttö̧ Chu̧ru̧hua̧nä̧ chi̧tti̧ rȩni̧'a̧rö̧, adiu jȩpö̧rö̧, Timoteorö hue'ösä ucuturu. Ja̧u̧tä̧ jiä̧huä̧cua̧ ucuturu Cristorö esetö chö̧jö̧ huȩnȩ'i̧nä̧, o'ca juiyönä pa̧ja̧cu̧nä̧ iglesias ruhuärö jidäu huȩnȩ'i̧nä̧.

¹⁸ Korotömä ucututtu a'cuoyäunu amöcuädätö ja̧u̧mä̧ Pablomä ujuturu topö ichocö pä'ö.

¹⁹ Juhua'acucö̧. Tu̧ru̧hua̧rö̧ pä̧huä̧ rö̧jo̧mȩnä̧, yodojinänö ucuturu topö chi̧'chä̧cua̧sä̧. Ja̧u̧nu̧mä̧ jahuätö a'cuoyäunu amöcuädätömä, pättötä ä̧ju̧cuo̧cö̧sä̧. Jahuätö jȩttö̧'i̧nä̧ to̧chä̧cua̧sä̧.

²⁰ Dios hueähuämä ji̧yȩä̧cuȩtä̧ ucuocuäcuähuämäcö̧. Iso päi'önä ujurunä hue'ö.

²¹ Jitä, ¿tta̧'a̧nö̧ cuamöcuädätucuättö ucutumä? Ucuturu topö chi̧'cho̧mȩnä̧, ¿chö̧tä̧bo̧ta̧ pä'ätöjä tä̧ji̧? Juhuorö'inä ¿adiu repe'önö eseunu chucuocua pä'ätöjä tä̧ji̧? ¿Tta̧'a̧nö̧ cuamöcuädätucuättö ucutumä?