1 Corintios 3 - TÄ̧DO Ä̧CUÄ̧ I̧HUȨNȨ

Dios i̧huȩnȩ ji̧nä̧ yo̧mȩtȩ aditätöjä

¹ Chö̧jä̧hua̧tö̧, ttö̧ja̧ Espíritu Santocu cuettächö'a̧nö̧ huotörö ttucuocu'a̧nö̧, ucuocuocö pi̧nö̧sä̧ ucuturu. Pärocua'acu ttö̧ja̧ jitötä ttamönä jȩttö̧'a̧nö̧ huotörö ucuocuinösä, ppo̧'ä̧tö̧rö̧ ttucuocua'a jä̧'i̧nö̧'a̧nö̧ adiu cuä̧ju̧cuä̧tu̧cuä̧cua̧'a̧nö̧ Cristo i̧huȩnȩ.

² Iso päi'önä ji̧'qui̧cha̧nö̧tä̧ huo̧juȩti̧nö̧sä̧ ucuturu. Ya̧tȩ ji̧'qui̧cha̧hua̧rö̧ u̧cuȩ ttiyoca'anä, ttatate isoyatä ttiya'a jä̧'i̧nö̧'a̧nö̧, huo̧juȩti̧nö̧sä̧ ucuturu. O'ca juiyönä jidähuomenä, yoröiso huo̧juä̧chi̧'o̧co̧tö̧jä̧ a̧'cua̧ra̧'a̧.

³ Ucutumä ji̧nä̧ cuamönätucu jähuätä amöcuädätöjä. Ucutumä jȩcu̧'ä̧tu̧cu̧tä̧ jȩcu̧'ä̧tu̧cuo̧mȩnä̧, i̧mi̧cu̧nä̧ amöcuädö, rohuähuä'chö, ji̧nä̧ yo̧mȩtȩ cuamöcuädätucuoca'a, korotö ttö̧ja̧ jȩttö̧'a̧nö̧ jȩpä̧tö̧jä̧.

⁴ Ucututtu korotö pä'ätö: “Ttötäsä Pablo i̧sa̧mä̧.” Korotö pä'ätö: “Ttötäsä Apolos i̧sa̧mä̧.” Ja̧'hua̧nö̧ jȩcu̧'ä̧tu̧cuo̧mȩnä̧, ucututä cuamönätucu cuamöcuädätucunätä cue'ächätöjä.

⁵ Iso päi'önä, ¿dijä̧ttö̧ Pablomä? ¿Dijä̧ttö̧ Apolosmä? Ujutumä Dios i̧huȩnȩ ji'ähuätöjä. Ujutu jitähuomenä, ucutu Cu̧ru̧hua̧tu̧cu̧ru̧ esetinätöjä. Ja̧'hua̧ta̧nö̧ ujutu, ka̧ra̧'i̧nä̧, ka̧ra̧'i̧nä̧, Tu̧ru̧hua̧ hueötä jȩpi̧nä̧tö̧jä̧.

⁶ Ttömä äcuomenä ku̧ni̧nö̧sä̧. Ja̧u̧nu̧ o'ca'a Apolos riripinödo. Ja̧'hua̧nö̧ jȩto̧mȩnä̧, Diostä ppöröhua pä'ö hue'inödo.

⁷ Ja̧'hua̧nö̧ ja̧'a̧ttö̧ iso päi'önä, ku̧ni̧nö̧'i̧nä̧, riripinö'inä, adiunämä micuähuoca'a. Ya̧tȩtä̧ Diostä, ppöröhua pä'ö hue'inötä, adiunämä micuähua'a.

⁸ Ujutumä, ku̧ni̧nö̧'i̧nä̧, riripinö'inä yorätehuätöjä. Ja̧'hua̧nö̧ ja̧'a̧ttö̧ Dios i̧yä̧cua̧ ka̧ra̧rö̧'i̧nä̧, ka̧ra̧rö̧'i̧nä̧ aditinö micuä.

⁹ Ujutumä ji̧nä̧ yo̧mȩtȩ aditätöjä Dios hueähuä. Ja̧'hua̧ta̧nö̧ rȩjȩ ttadita'a jä̧'i̧nö̧'a̧nö̧, ucuturu aditö Dios. Ja̧'hua̧ta̧nö̧ isode ttadita'a jä̧'i̧nö̧'a̧nö̧, ucuturu aditö Dios.

¹⁰ Iso päi'önä Diosrö pä̧huä̧ rö̧jo̧mȩnä̧, hue'inödo ttörö äcuomenä icui'quiyu chu̧ju̧na̧ pä'ö. Ja̧u̧nu̧ o'ca'a, korotömä ppä'ädö aditätö. Ja̧'hua̧nö̧ ttaditomenä, iso päi'önä ttu̧ȩcuä̧nä̧ ttaditö'a̧nö̧ ja̧'a̧.

¹¹ Juhuorö'inä korotömä ttö chaditinöttö'inä i̧mi̧cu̧nä̧, ttaditö juiyäcua'a̧nö̧. Ji̧yȩä̧cuȩtä̧ Jesucristo i̧huȩnȩtä̧ ttaditäcua'a̧nö̧.

¹² Ja̧'hua̧nö̧ ttaditomenä, korotömä orocu, pärätäcu, ido'qui rö̧ȩnä̧ micuähuo'quicu aditätö. Ja̧'hua̧ta̧nö̧ korotömä daucu, rȩjȩ isä'checu, ojiyäcu aditätö.

¹³ Yodoji Dios ttö̧ja̧rö̧ pojocuä mo̧ro̧ päi'omenä, o'ca juiyönä taditinömä adiu totäcuotöjä. Ja̧u̧nu̧ mo̧ro̧ ocuräcu ichäcua'a. Ja̧'hua̧nö̧ päi'omenä, ocuränä ka̧cuä̧mi̧pä̧cua̧'a̧ o'ca juiyönä taditinömä, iso päi'önä adiu taditinaja pä'ö tota pä'ö.

¹⁴ Ja̧'hua̧nö̧ ja̧'a̧ttö̧ iso päi'önä ya̧tȩ aditähuä ocuränä cuoi'oca'a jö̧ttö̧mä̧, ja̧u̧mä̧ aditinö micuä ȩmä̧cua̧.

¹⁵ Pärocua'anä ya̧tȩ aditähuä cuoi'öttömä, ja̧u̧ aditähuä o'ca juiyönä toei'äcua'a. Chutä ya̧tȩ ocuränä ö̧jipa̧'a̧ jä̧'i̧nö̧'a̧nö̧, ö̧ji̧pä̧cua̧.

¹⁶ Dios ucutucu ö̧ja̧'a̧ttö̧, Dios ö̧jo̧mȩ huotöjä ¿jerupätöjä tä̧ji̧? Ja̧'hua̧ta̧nö̧ Espíritu Santomä ucutucu kö̧ pä'ö ¿jerupätöjä tä̧ji̧?

¹⁷ Ja̧'hua̧ta̧nö̧ ya̧tȩ Dios ö̧jo̧mȩ suronä jȩö̧ttö̧mä̧, Dios be'epö i̧cuä̧cua̧ ja̧u̧ru̧. Iso päi'önä Dios ö̧jo̧mȩ yoröiso adihuome. Ja̧'hua̧nö̧ ja̧'a̧nä̧ Dios ucutucu ö̧ja̧'a̧ttö̧, Dios ö̧jo̧mȩ huotöjä.

¹⁸ Ja̧'hua̧ ji̧yä̧cu̧ yapareu cuamöcuädätucuä' cuamönätucunä. Ucututtu ya̧tȩ pi̧jä̧ttö̧ rö̧ȩnä̧ huo̧jua̧sä̧ pä'ö amöcuädöttömä, ja̧u̧ juäi jaroi'a pä'ö ya̧tȩ jȩru̧pa̧ ta'anö juo'ächö, adihua'a. Ja̧'hua̧nö̧ jȩpö̧ iso päi'önä adihuä juäi huo̧juä̧huä̧ u̧huo̧jui̧'ä̧cua̧'a̧nö̧.

¹⁹ Dios ä'ca jo̧mȩttö̧ pi̧jä̧ttö̧ huo̧juä̧huä̧ yoröiso ttu̧'ȩpä̧ro̧co̧tö̧ ttucuocu'a̧nö̧ jö̧. Huȩyu̧cuä̧ Huȩnȩ päa'a: “Pi̧jä̧ ttö̧ja̧ pi̧jä̧ttö̧ rö̧ȩnä̧ ttu̧huo̧jua̧'a̧nä̧ jȩpö̧, Dios jȩä̧u̧ jitötä tta̧mö̧nä̧ jȩpö̧ tottei'a pä'ö.”

²⁰ Ja̧'hua̧ta̧nö̧ päa'a: “Tu̧ru̧hua̧ o'ca juiyönä huo̧jua̧ pi̧jä̧ttö̧ rö̧ȩnä̧ huo̧juä̧tö̧ ttamöcuädömä yoröiso micuähuocö.”

²¹ Ja̧'hua̧nö̧ ja̧'a̧ttö̧ pi̧jä̧ ttö̧ja̧rö̧ esetö, yoröiso a'cuoyäunu cuamöcuädätucuä'. Iso päi'önä o'ca juiyönä pi̧jä̧nä̧ ka̧cu̧ ucutu cuhuäretucu päi'önä ku̧nä̧rä̧tö̧jä̧.

²² Ja̧'hua̧ta̧nö̧ Pablo'inä, Apolos'inä, Pedro'inä cumöhuäyotöjä. Pi̧jä̧'i̧nä̧, kä̧cuä̧huä̧'i̧nä̧, 'corupäi'äcuähuä'inä ku̧nä̧rä̧tö̧jä̧. Jitä 'cuäopö'inä, yodoji 'cuäopä̧cuȩ'i̧nä̧ ku̧nä̧rä̧tö̧jä̧.

²³ Ja̧'hua̧ta̧nö̧ Cristo i̧tti̧mö̧jä̧. Ja̧'hua̧ta̧nö̧ Cristomä Dios I̧tti̧.