1 Corintios 16 - TÄ̧DO Ä̧CUÄ̧ I̧HUȨNȨ

Pärätä ca̧ca̧tä̧cuä̧huä̧ huȩnȩ

¹ Pärätä cu̧ca̧ca̧tä̧tu̧cuo̧mȩnä̧, Diosrö esetätörö cuiyätucua pä'ö, Galacia rȩjȩ ttö̧ja̧ iglesia ruhuärö jidähuinö ta'anö jȩpä̧tu̧cui̧.

² 'Cuäopönä o'ca juiyönä semana äcuomenä mo̧ro̧ ja̧'a̧nä̧, cu̧ju̧nä̧rä̧tu̧cu̧ttu̧ iyätucui hua'adö ttu̧ju̧na̧ pä'ö. Ja̧'hua̧nö̧ ä'canä hua'adö cu̧ju̧nä̧tu̧cua̧'a̧ttö̧, ttö chichomenä cuahuaruhuärö jä'epocotöjä.

³ Ja̧'hua̧nö̧ ja̧'a̧ttö̧ ttö chichomenä, Jerusalén ötahuiyära̧'a̧ cuhuäretucu ofrenda ttȩpa̧ pä'ö huecuhuätucuä̧u̧cu̧ cuyäru isojä huȩyu̧tu̧ huȩdä̧cua̧sä̧.

⁴ Ja̧'hua̧ta̧nö̧ ttö chi̧'chö̧ttö̧mä̧, jahuätömä ttöcu ttichö'a̧nö̧ ja̧'a̧.

Pablo i̧'chä̧cuȩ huȩnȩ ji'ähuinödo

⁵ Ttö cuedächomenä, Macedonia rȩjȩra̧'a̧ chi̧'chä̧cua̧sä̧. Juhuorö kä̧nö̧ ucutu cu̧ja̧cuä̧tu̧cuo̧mȩcu̧, Corinto ötahuiyära̧'a̧ chi̧'chä̧cua̧sä̧.

⁶ Juhua'atä recuonänö chö̧jö̧'a̧nö̧ ja̧'a̧ ucutucu. Juhuorö'inä chö̧jö̧ttö̧mä, a̧'ȩ 'cuäoi'önä chö̧jä̧cua̧sä̧. Ja̧'hua̧nö̧ ja̧'a̧nä̧ ucutu ppäcuhuädätucu'a̧nö̧ ja̧'a̧ ttörö, kara'a chi̧'cho̧mȩnä̧.

⁷ Ja̧'a̧tä̧ 'cuä'opö jurunämä tocha pä'ocösä ucuturu. Tu̧ru̧hua̧rö̧ pä̧huä̧ rö̧jö̧ttö̧mä̧, recuonänö chö̧ja̧ pä'ösä.

⁸ Pȩnȩtä̧ Efeso ötahuiyänä, chö̧jä̧cua̧sä̧ Pentecostés mo̧ro̧ 'cuäopome jubö päi'önä.

⁹ Pȩnȩmä̧ recuätö ka̧cuä̧tö̧mä̧ ttä̧ju̧cu̧'a̧nö̧ ja̧'a̧ Tu̧ru̧hua̧ i̧huȩnȩ. Ja̧'hua̧ta̧nö̧ recuätö ttä̧ju̧cua̧ pä'ocotö'inä ka̧cuä̧tö̧.

¹⁰ Timoteo cu̧ja̧cuä̧tu̧cuo̧mȩ i̧rȩbȩu̧ttu̧mä̧, adiunänö ö̧ja̧ pä'ö ppä'ädätucuirö. Ja̧u̧'i̧nä̧ ttö ta'anö aditö Tu̧ru̧hua̧ i̧huȩnȩ.

¹¹ Ja̧'hua̧nö̧ ja̧'a̧ttö̧ ucututtu korotö suronä ttamöcuädö juiya pä'ätucuirö. Pärocua'attö ppä'ädätucuirö adiunä eseunu ichäcua'a̧nö̧ ttörö topö. Ttöcu korotö tö̧jä̧hua̧tö̧cu̧ ja̧u̧ru̧ tta̧'ä̧rä̧tö̧jä̧.

¹² Ja̧'hua̧ta̧nö̧ tö̧jä̧hua̧ Apolosrö rö̧ȩnä̧ ucuocuinösä, korotö tö̧jä̧hua̧tö̧cu̧ i̧'cha̧ pä'ö ucuturu topö. Ja̧'hua̧nö̧ ja̧'a̧nä̧ i̧'cha̧ pä'ocö pi̧nö̧do jitätämä. Koronö mo̧ro̧ päi'omenä i̧'chä̧cua̧do.

Röjinä teähuinö huȩnȩ

¹³ Adiunä tta̧'ä̧rö̧ kä̧nö̧, cuami 'qui'ächi'ö ka̧cuä̧tu̧cui̧ Tu̧ru̧hua̧rö̧ cuesetätucua'attö. U̧mä̧tö̧ jȩttö̧ ta'anö jȩpä̧tu̧cui̧. Ja̧'hua̧ta̧nö̧ juruhuätucui.

¹⁴ O'ca juiyönä jȩcu̧'ä̧tu̧cumä̧, repe'önö jȩpä̧tu̧cui̧.

¹⁵ Jitä chö̧jä̧hua̧tö̧, ucutu huo̧juä̧tö̧jä̧, Estéfanas ahuaruhuäcu äcuomenä esetinätödo Tu̧ru̧hua̧rö̧ Acaya rȩjȩttö̧. Jahuätö korotö esetinätörö, tö̧jä̧hua̧tö̧rö̧, rö̧ȩnä̧ ppä'ädätö.

¹⁶ Ucuturu ji'äusä iso päi'önä jahuätö'inä, korotö jahuätöcu aditätö'inä ttu̧huo̧juȩtö̧mä̧ adiu jȩcu̧'ä̧tu̧cua̧ pä'ö.

¹⁷ Ttömä eseusä Estéfanasrö'inä, Fortunatorö'inä, Acaicorö'inä ttörö topö ttichäja'attö. Ucutu toa'attö, ttörö ppä'ädinätö jahuätömä.

¹⁸ Cha̧'cua̧ esehuächi'önä ppättädäjäcusä. Ttörö'inä, ucuturu'inä ppä'ädinätö. Iso päi'önä jahuätö ta'anö huotörö adiu cucuotätucuaja.

¹⁹ Korotö iglesia ruhuä Asia rȩjȩttö̧ te'ähuätö ucuturu. Aquilacu, Priscilacu ttojusodenä esetö ucuocuätö'inä, Tu̧ru̧hua̧ i̧mi̧nä̧ te'ähuätö ucuturu.

²⁰ O'ca toi'önä tö̧jä̧hua̧tö̧ te'ähuätö ucuturu. Ja̧'hua̧ta̧nö̧ korotörö o'ca toi'önärö ttu̧mö̧nä̧ 'chu'ädö eseunu te'ähuätucui.

²¹ Ttö Pablo, pi̧yȩmä̧ ttötä chu̧mö̧nä̧ huȩyu̧tu̧ hue'ösä ucuturu.

²² Ya̧tȩ Tu̧ru̧hua̧ Jesucristorö repe'ocömä, chutä Tu̧ru̧hua̧tä̧ ro̧ȩpä̧cua̧. Tu̧ru̧hua̧, ¡jurunä ichi!

²³ Tu̧ru̧hua̧ Jesucristomä ucuturu ppädäcua'a̧nö̧.

²⁴ Ucuturu o'ca toi'önärö pi̧yȩmä̧ hue'ösä. Cristo Jesúsnä repe'ösä ucuturu. Amén.