1 Corintios 15 - TÄ̧DO Ä̧CUÄ̧ I̧HUȨNȨ

Cristo ttoächinö huȩnȩ

¹ Jitämä chö̧jä̧hua̧tö̧, ttö̧ja̧ suronä jȩttö̧ jȩpö̧ icu huȩnȩ jidähuinömä, pä'äji ta'anö cuamöcuädätucua pä'ösä. Ucutu esetinätöjä ja̧u̧ huȩnȩmä̧. Ja̧'hua̧ta̧nö̧ ja̧u̧ huȩnȩ esetö, cuami 'qui'ächi'ö ka̧cuä̧tö̧jä̧.

² Ja̧'hua̧ta̧nö̧ ja̧u̧ huȩnȩ adiu cuesetätucuttumä, ja̧'a̧tä̧ amöcuädäcuähuä juiyönä jȩcu̧'ä̧tu̧cuo̧ca̧'a̧nä̧, ucutu suronä jȩcu̧'i̧nä̧tu̧cu̧mä̧ jȩpö̧ icuinä̧u̧jä̧ Dios.

³ Äcuomenä ttörö jittähuinö huȩnȩ ji'ähuinösä ucuturu. Cristo 'corupäi'inö huȩnȩ, ujutu suronä jȩtö̧ jȩpö̧ icua pä'ö Huȩyu̧cuä̧ Huȩnȩ päö'a̧nö̧ ji'ähuinösä.

⁴ Ja̧'hua̧ta̧nö̧ idoränä ttötinö o'ca'a, huäbodäcuä mo̧ro̧ päi'omenä, ttoächinö huȩnȩ ji'ähuinösä, Huȩyu̧cuä̧ Huȩnȩ päö'a̧nö̧.

⁵ Ja̧'hua̧ta̧nö̧ Pedrorö i̧jȩcui̧nö̧do. Ja̧u̧nu̧ o'ca'a, chutä hue'ähuotörö i̧jȩcui̧nö̧do.

⁶ Ja̧u̧nu̧ o'ca'a'inä, Diosrö esetätörö, recuätörö quinientos jo̧mȩnä̧ abonänö i̧jȩcui̧nö̧do. Iso päi'önä jahuätöttö, recuätömä ji̧nä̧ a̧'cua̧rä̧tö̧. Korotö'inä hua'ö icuinätödo.

⁷ Ja̧u̧nu̧ o'ca'a, Jacoborö i̧jȩcui̧nö̧do. Ja̧'hua̧ta̧nö̧ o'ca toi'önä chutä hue'ähuotörö i̧jȩcui̧nö̧do.

⁸ Röjinä, o'ca toi'önärö i̧jȩcui̧nö̧ o'ca'a, ttörö'inä ji̧nä̧ kä'copa uhuäpächätö jä̧'i̧nö̧'a̧nö̧ uhuäpächörö i̧jȩcui̧nö̧do.

⁹ Ttömä korotö Jesús hue'ähuotöttö'inä abonänö usurä i̧sa̧sä̧. Ttörömä Jesús huȩ'ä̧hua̧ pättö juiyö'a̧nö̧ ja̧'a̧, Diosrö esetätörö suronä jȩchi̧na̧'a̧ttö̧.

¹⁰ Juhuorö'inä Dios ttörö ppäda'attö, o'ca juiyönä jȩchö̧mä̧ jȩpö̧sä̧. Ja̧'hua̧ta̧nö̧ Diosrö pä̧huä̧ rö̧jo̧mȩnä̧ jȩpö̧sä̧. Ja̧'hua̧nö̧ ja̧'a̧nä̧ korotö Jesús hue'ähuotöttö'inä abonänö rö̧ȩnä̧ aditinösä. Juhuorö'inä ttötä chamönä jȩcho̧ca̧'a̧nä̧, Dios ppädomenätä jȩpi̧nö̧sä̧.

¹¹ Ja̧'hua̧nö̧ ja̧'a̧nä̧ “¿dijä̧ttö̧ rö̧ȩnä̧ aditäjimä, jitötäcö̧, ttötäcö̧?” pä'ocotöjä. Ji̧yȩä̧cuȩtä̧ ujutu ji'ähuinätöjä. Ja̧'hua̧ta̧nö̧ ja̧u̧tä̧ jitähuinömä esetinätöjä ucutumä.

'Corupä'i'ö'cotö ttoächäcuähuä huȩnȩ

¹² Iso päi'önä ujutu Cristo 'corupä'i'äji'ca̧ ttoächinö huȩnȩ jitäuttumä, korotömä ucututtu, ¿tta̧'a̧nö̧ pättättö 'corupä'i'ö'cotö yoröiso tto'ächocotö pä'ö?

¹³ Ja̧'hua̧nö̧ pä'ö iso päi'önä pättöttömä, Cristo'inä 'corupä'i'äji'ca̧ tto'ächocö pi̧na̧ji̧do.

¹⁴ Ja̧'hua̧ta̧nö̧ Cristo ttoächoca'a ji̧nö̧ttö̧mä̧, ujutu jitäu huȩnȩ yoröiso micuähuoca'a. Ja̧'hua̧ta̧nö̧ ucutu cuesetinätucu huȩnȩ'i̧nä̧ yoröiso micuähuoca'a.

¹⁵ Ja̧'hua̧nö̧ jö̧ttö̧mä̧, ujutumä Dios i̧huȩnȩ ji'äu, yapareutä ji'ähuajatöjä. Ujutu ji'ähuätöjä, Dios tto'ädinödo Cristorö pä'ö. Ja̧'hua̧nö̧ ja̧'a̧ttö̧ iso päi'önä ttö̧ja̧rö̧ ttoädäcuähuä juiyöttömä, Dios'inä tto'ädocö pi̧na̧ji̧do Cristorö.

¹⁶ Ja̧'hua̧nö̧ ja̧'a̧ttö̧ 'corupä'i'ö'cotö ttottächäcua'a juiyöttömä, chutämä, Cristomä tto'ächocö pi̧na̧ji̧do.

¹⁷ Ja̧'hua̧ta̧nö̧ ja̧'a̧nä̧ Cristo ttoächoca'a ji̧nö̧ttö̧mä̧, ucutu cuesetinätucu yoröiso micuähuoca'a ucuturu. Ji̧nä̧ suronä jȩcu̧'ä̧tu̧cu̧nä̧tä̧ cue'ächätöjä.

¹⁸ Ja̧'hua̧ta̧nö̧ pättö'a̧nö̧ jö̧ttö̧mä̧, ä'canä Cristorö esetö 'corupä'i'inätömä yoröiso micuähuoca'a ttesetinömä.

¹⁹ Ja̧'hua̧nö̧ ja̧'a̧ttö̧ ujutu Cristorö esetö, pi̧jä̧nä̧tä̧ tö̧ja̧cuo̧mȩnä̧tä̧ ppädöttömä, korotöttö'inä abonänö usurä isotöjä, ja̧'hua̧nö̧ esetö kä̧nö̧.

²⁰ Ja̧'hua̧nö̧ ja̧'a̧nä̧ iso päi'önä huo̧juä̧tö̧jä̧ Cristomä 'corupä'i'äji'ca̧ tto'ächinödo. Ja̧u̧tä̧ äcuomenä ttoächina'attö 'corupä'i'ö'cotömä ttottächäcuotö.

²¹ Ya̧tȩ suronä jȩpö̧ 'corupäi'ina'attö, o'ca toi'önä 'corupä'i'ätöjä. Ja̧'hua̧ta̧nö̧ ya̧tȩ ttoächina'attö, o'ca toi'önä ttotächäcuotöjä.

²² Ujutumä Adán ahuaruhuä isotöjä. Ja̧'hua̧nö̧ ja̧'a̧ttö̧ Adán 'corupäi'inö ta'anö 'corupäti'äcuotöjä ujutumä. Ja̧'hua̧ta̧nö̧ o'ca toi'önä Cristo ahuaruhuä, Cristo ö̧jö̧ ta'anö tö̧ja̧cuä̧cuo̧tö̧jä̧.

²³ Churutä pä̧huä̧ rö̧jo̧mȩnä̧ ttotächäcuotöjä. Äcuomenä ä'canä Cristo tto'ächinödo. Ja̧u̧nu̧ o'ca'a Cristo ichomenä, ja̧u̧ru̧ esetätö ttottächäcuotödo.

²⁴ Ja̧u̧nu̧ o'ca'a, röji mo̧ro̧ päi'äcua'a. Ja̧u̧nu̧mä̧ o'ca juiyönä pi̧jä̧ isoppanä huȩ'ä̧rä̧tö̧rö̧'i̧nä̧, ruhuotörö'inä, ttujuru'inä be'epäjipö i̧cuä̧cua̧ Cristomä. Ja̧'hua̧nö̧ be'epäjipö icu, i̧yä̧cua̧ o'ca juiyönä hueähuä Jä'o Diosrö.

²⁵ Iso päi'önä o'ca juiyönä aboiyotörö, ö̧jä̧pö̧ dȩa̧'a̧nä̧ ötome jubö päi'önä, huȩä̧cua̧ Cristomä.

²⁶ Ja̧'hua̧ta̧nö̧ rö̧ji̧nä̧ a̧bo̧i̧ya̧rö̧, 'corupäi'äcuähuä be'epäjipö i̧cuä̧cua̧.

²⁷ Diosmä o'ca juiyönä rötinödo Cristo ö̧jä̧pö̧ dȩa̧'a̧. Juhuorö'inä Huȩyu̧cuä̧ Huȩnȩ: “O'ca juiyönä rötinödo” päa'anä, churutä, Diosrötä päoca'a. Iso päi'önä chutä Diostä o'ca juiyönä rötinödo.

²⁸ Ja̧'hua̧ta̧nö̧ o'ca juiyönä Cristo ö̧jä̧pö̧ dȩa̧'a̧ rötähua'a päi'omenä, chutä Cristo, Dios I̧tti̧, i̧yä̧huä̧cua̧ Jä'o Diosrö, ja̧u̧ru̧ o'ca juiyönä iyinörö. Ja̧'hua̧nö̧ päi'omenä, iso päi'önä Dios o'ca juiyönä ru̧hua̧ pä̧i̧'ä̧cua̧.

²⁹ Korotömä, 'corupä'i'inätörö amöcuädö, bautizando jȩpä̧tö̧do. ¿Dä̧bö̧ jȩtta̧'a̧jä̧ttö̧ ja̧'hua̧nö̧mä̧? Iso päi'önä, 'corupä'i'ö'cotö ttottächoca'a jö̧ttö̧mä̧, ¿dä̧bö̧ bautizando jȩtta̧'a̧jä̧ttö̧ 'corupä'i'inätörö amöcuädö?

³⁰ Ja̧'hua̧ta̧nö̧ ujutumä ¿tta̧'a̧nö̧ pä'ö tö̧ja̧cua̧'a̧jä̧ttö̧ ra̧huȩpi̧jö̧nä̧ 'cuäopönämä?

³¹ 'Cuäopönä pä'ösä: “Jitä mo̧ro̧ 'co̧ru̧pä̧di̧'ä̧cua̧sä̧cö̧.” Ja̧'hua̧nö̧ ja̧'a̧ttö̧ chö̧jä̧hua̧tö̧, ja̧'hua̧nö̧ pä'ösä ucuturu eseunu amöcuädö Tu̧ru̧hua̧ Jesucristorö cuesetiniyätucuäcu.

³² Pi̧yȩmä̧ korotö pättö'a̧nö̧ pä'ösä. Ttömä rohuähuinösä isotöcu, ra̧huȩpi̧jö̧ huotöcu, Efeso ötahuiyättö. Ja̧'hua̧nö̧ ja̧'a̧nä̧ ¿däje chȩmi̧na̧'a̧jä̧ttö̧ ja̧'hua̧nö̧ jȩpö̧mä̧? Iso päi'önä 'corupä'i'ö'cotö ttottächoca'a jö̧ttö̧mä̧, korotö pättö'a̧nö̧ pä'ätöjä ujutu'inä. Pa̧'a̧nö̧ pä'ätödo: “Jitämä cuä̧nö̧'i̧nä̧, au'inä tö̧ja̧cuä̧tu̧cua̧ja̧, yo̧ȩi̧mä̧ 'corupäti'äcuotöjä” pä'ö.

³³ Ja̧'hua̧nö̧mä̧ yapareu cuesetätucuä'. “Suronä jȩpö̧ kä̧nö̧, adiu jȩä̧cuä̧huä̧ surojuo'epätö.”

³⁴ Ucutumä ppa̧'ä̧chö̧ adiunä cua̧'cua̧ pö̧nö̧ ka̧cuä̧tu̧cui̧. Suronämä jȩcu̧'ä̧tu̧cuä̧'. Korotö ucututtu isotömä ji̧nä̧ jerupätödo Diosrö. Pi̧yȩmä̧ pä'ösä ucutu cudäpecuätucua pä'ö.

'Corupä'i'ö'cotö ttottächö huȩnȩ

³⁵ Korotömä jättepäcuotö a̧'cua̧ra̧'a̧: “'Corupä'i'inätömä ¿tta̧'a̧nö̧ ttottächäcua'ajä̧ttö̧? Ttidepämä, ¿tta̧'a̧nö̧ jä̧cua̧'a̧jä̧ttö̧?”

³⁶ Ja̧'hua̧nö̧ jättepomenä, amönä suripächö jä'epätödo. Koro juäi jacuä jähuä ttu̧ju̧no̧mȩnä̧, rȩjȩ jacuänä hua'ö icua'anä, jareötä bahua'ado.

³⁷ Koro juäi ku̧nu̧mä̧, i̧sa̧juȩ ku̧nä̧huo̧ca̧'a̧. Jacuä jähuätä ku̧nä̧hua̧'a̧ ya̧mö̧tä̧'i̧nä̧, koro juäi'inä.

³⁸ Ttu̧ju̧nu̧ o'ca'a, Diosrö pä̧huä̧ rö̧jo̧mȩnä̧ bahua'a, ja̧u̧ jacuä jähuämä. O'ca juiyönä i̧mi̧cu̧nä̧ bahua'ado ttu̧huo̧ju̧nä̧.

³⁹ Pi̧jä̧nä̧mä̧ o'ca toi'önä tidepämä yoröiso yorätehuocotöjä. Ttö̧ja̧ ttidepämä, de'a isotö ttidepättö'inä i̧mi̧cu̧nä̧ ja̧'a̧. Ja̧'hua̧ta̧nö̧ ppi̧yu̧ ttidepä'inä i̧mi̧cu̧nä̧ ja̧'a̧. Ja̧'hua̧ta̧nö̧ po̧i̧ ttidepä'inä i̧mi̧cu̧nä̧ ja̧'a̧.

⁴⁰ Ja̧'hua̧ta̧nö̧ mo̧ro̧jä̧ jähuä ka̧'a̧. Pi̧jä̧ jähuä'inä ka̧'a̧. Ja̧'hua̧nö̧ ja̧'a̧nä̧ mo̧ro̧jä̧ jähuä öadihuä, iso päi'önä pi̧jä̧ jähuättö'inä i̧mi̧cu̧nä̧ ja̧'a̧.

⁴¹ Mo̧ro̧ kä̧hua̧ i̧tȩa̧u̧mä̧, iso päi'önä yodo kä̧hua̧ i̧tȩa̧u̧ttu̧'i̧nä̧ i̧mi̧cu̧nä̧ ja̧'a̧. Ja̧'hua̧ta̧nö̧ si̧ri̧'cö̧ tti̧tȩa̧u̧'i̧nä̧ i̧mi̧cu̧nä̧ ja̧'a̧. Ja̧'hua̧ta̧nö̧ koro siri'co, koro siri'cottö'inä i̧mi̧cu̧nä̧ tȩä̧hua̧'a̧.

⁴² Ja̧'hua̧nö̧ jä̧cua̧'a̧ 'corupä'i'ö'cotö ttottächomenä. 'Corupä'i'äjirö, hua'ö icuru 'turätö. Juhuorö'inä ttottächomenä, yoröiso 'corupä'i'ocötä tto̧ä̧chä̧cua̧.

⁴³ Ja̧'hua̧ta̧nö̧ icuicuä do'opö tticua'a jä̧'i̧nö̧'a̧nö̧, 'turätö. Ja̧'hua̧nö̧ ja̧'a̧nä̧ a̧di̧hua̧tä̧ tto̧ä̧chä̧cua̧. Ja̧'hua̧ta̧nö̧ jui̧yu̧pa̧rö̧ 'turu tticua'anä, ju̧ru̧hua̧tä̧ tto̧ä̧chä̧cua̧.

⁴⁴ Ja̧'hua̧ta̧nö̧ pi̧jä̧ jähuämä 'turu tticua'anä, mo̧ro̧jä̧ jähuänä tto̧ä̧chä̧cua̧. Pi̧jä̧ jähuä jättäpäyotö ka̧'a̧do. Ja̧'hua̧ta̧nö̧ mo̧ro̧jä̧ jähuä jättäpäyotö'inä ka̧'a̧do.

⁴⁵ Ja̧'hua̧nö̧ ja̧'a̧ttö̧ Huȩyu̧cuä̧ Huȩnȩ päa'a: “Iso päi'önä äcuomenä ttö̧ja̧ i̧sa̧ pi̧jä̧ttö̧ a̧di̧cua̧ pi̧nö̧do Adánmä.” Ja̧'hua̧ta̧nö̧ rö̧ji̧nä̧ ichinömä Adánmä, tta̧'cua̧rö̧ iyähuä i̧sa̧ pi̧nö̧do.

⁴⁶ Äcuomenä mo̧ro̧jä̧ jähuä ichoca'ado. Äcuomenä pi̧jä̧ jähuä ja̧'a̧do. Ja̧u̧nu̧ o'ca'a mo̧ro̧jä̧ jähuä ja̧'a̧do.

⁴⁷ Äcuomenä ttö̧ja̧ i̧sa̧ pi̧jä̧ redä'ca i̧sa̧ppȩttö̧ a̧di̧cua̧ pi̧nö̧do. Ja̧u̧nu̧ o'ca'a pi̧nö̧mä̧, Tu̧ru̧hua̧ pi̧nö̧mä̧, mo̧ro̧jä̧ra̧'a̧ttö̧ ichinödo.

⁴⁸ Pi̧jä̧ ttö̧ja̧ jättäpäyotömä, redä'ca i̧sa̧ppȩttö̧ adicua'a. Ja̧'hua̧ta̧nö̧ mo̧ro̧jä̧ ttö̧ja̧, mo̧ro̧jä̧ jähuättö adicua'a.

⁴⁹ Ja̧'hua̧nö̧ ja̧'a̧ttö̧ jitämä ujutumä pi̧jä̧ ttö̧ja̧ jö̧'a̧nö̧ huotöjä. Juhuorö'inä yodojimä mo̧ro̧jä̧ ttö̧ja̧ jö̧ ta'anö tö'ärohuächäcuotöjä.

⁵⁰ Adihuä chö̧jä̧hua̧tö̧, ucuturu ji'äusä, pi̧jä̧ttö̧, ttidepäcu'inä, ttucuojacu'inä yoröiso doächäcuähuoca'a Dios ö̧jo̧mȩ. Koro beipächä̧cuȩ'i̧nä̧, koro beipächocö jä̧cuȩ'i̧nä̧ huihuacuoca'a jä̧cua̧'a̧.

⁵¹ Ä̧ju̧cuä̧tu̧cui̧ pi̧yȩ ttieru huȩnȩ jidähuomenä. O'ca toi'önämä 'corupä'i'ocotöjä. Ja̧'hua̧nö̧ ja̧'a̧nä̧ o'ca toi'önä tö'ärohuächäcuotöjä.

⁵² Röji trompeta rä̧mi̧po̧mȩnä̧, yotäcu ttö'äre yȩbi̧ päi'omenä tö'ärohuächäcuotöjä. Trompeta rä̧mi̧po̧mȩnä̧, 'corupä'i'inätömä ttottächipäcuotö. Ja̧u̧nu̧ o'ca'a yoröiso 'corupä'i'ocotö ttäcuotö. Ujutu'inä tö'ärohuächäcuotöjä.

⁵³ Ujutu tidepä pi̧jä̧ jähuä ja̧'a̧ttö̧, yoröiso recuo ko̧cö̧do. Ja̧'hua̧nö̧ ja̧'a̧ttö̧ tö'ärohuächäcuotöjä koro yoröiso beipocö jähuä ȩmö̧. Ja̧'hua̧ta̧nö̧ ujutu töäre jättäpäyotö hua'ö icuipö, koro yoröiso hua'ö icuähuocö ȩmö̧ tö'ärohuächäcuotöjä.

⁵⁴ Ujutu tidepämä, recuo ko̧cö̧mä̧, koro yoröiso beipocö jähuä ȩmö̧ tö'ärohuächomenä, ja̧'hua̧ta̧nö̧ tidepämä hua'ö icumä, koro yoröiso hua'ö icuocö ȩmö̧ tö'ärohuächomenä, ja̧u̧nu̧ Huȩyu̧cuä̧ Huȩnȩ päötä 'cuäopäcua'a. Huȩyu̧cuä̧ Huȩnȩ pa̧'a̧nö̧ päa'a: 'Corupäi'äcuähuä yoröiso beipächa'ado, kä̧cuä̧huä̧tä̧ ujuruhua'attö.

⁵⁵ 'Corupäi'äcuähuä jitämä ¿tta̧'a̧nö̧ jȩcu̧'ä̧cua̧'a̧jä̧ttö̧ ujuturu? Ja̧'hua̧ta̧nö̧ ¿tta̧'a̧nö̧ cujuruhuäcua'ajä̧ttö̧ kä̧cuä̧huä̧nä̧mä̧?”

⁵⁶ Suronä jȩä̧cuä̧huä̧mä̧ ppäda'a 'corupäi'äcuähuä ujuturu suronä 'cuäopa pä'ö. Ja̧'hua̧ta̧nö̧ täbocö hueähuä huȩnȩ ppäda'a suronä jȩä̧cuä̧huä̧.

⁵⁷ Ja̧'hua̧nö̧ ja̧'a̧nä̧'i̧nä̧ Diosrö esehuätöjä. Ja̧u̧tä̧ ujuturu ppä'ädö Tu̧ru̧hua̧ Jesucristonä tujuruhua pä'ö suronä jȩä̧cuä̧huä̧ttö̧'i̧nä̧ abonänö.

⁵⁸ Ja̧'hua̧nö̧ ja̧'a̧ttö̧ adihuä chö̧jä̧hua̧tö̧, cuami 'qui'ächi'ö ka̧cuä̧tu̧cui̧ 'cuäopönä. Juhua'a yabonötä aditätucui Tu̧ru̧hua̧ aditähuä. Ucutu täcö huo̧juä̧tö̧jä̧, Tu̧ru̧hua̧cu̧ ji̧nä̧ yo̧mȩtȩ adicuämä adiunätä micuähua'a pä'ö.