1 Corintios 13 - TÄ̧DO Ä̧CUÄ̧ I̧HUȨNȨ

O'ca toi'önärö repeäcuähuänä adihua'a

¹ Iso päi'önä pi̧jä̧ ttö̧ja̧ tti̧huȩnȩ'i̧nä̧, ángeles tti̧huȩnȩ'i̧nä̧ chucuocuttumä, o'ca toi'önärö repedoca'anä, koro juäi cuoräuttu adicuä ucuocu'a̧nö̧ ucuocusä ttömä.

² Ja̧'hua̧ta̧nö̧ Dios iyähuä huȩnȩ jidäuttumä, o'ca juiyönä ttö̧ja̧ ttieru huȩnȩ chu̧huo̧ju̧ttu̧mä̧'i̧nä̧, o'ca juiyönä pi̧jä̧ huo̧juä̧huä̧ chu̧huo̧ju̧ttu̧mä̧'i̧nä̧, o'ca toi'önärö repedoca'anä, yoröiso yapareutä jȩpö̧sä̧. Ja̧'hua̧ta̧nö̧ rö̧ȩnä̧ esetö, möä'ca chupporädäcua'a̧nö̧ pä'ö chesetöttö'inä, chahuaruhuärö repedoca'anä, yoröiso yapareutä jȩpö̧sä̧.

³ Ja̧'hua̧ta̧nö̧ o'ca juiyönä chu̧ju̧nä̧rö̧ chiyöttömä, o'ca toi'önärö repedoca'anä, yoröiso micuähuocö ttörö. Juhuorö'inä ttötä jä̧ttä̧pä̧ya̧'i̧nä̧ chiyöttömä ku tticua pä'ö ocuränä, o'ca toi'önärö repedoca'anä, yoröiso micuähuocö ttörö.

⁴ Ya̧tȩ o'ca toi'önärö repe'ömä, a̧'cua̧ pö̧nö̧ kö̧. Adiu jȩpö̧ o'ca toi'önärö. Korotö ttu̧ju̧nä̧rö̧mä̧, pä̧huä̧ rö̧jö̧nä̧ topocö. Chutä korotöttö'inä abonänö adihuä i̧sa̧sä̧ pä'ömä amöcuädocö. A'cuoyäunu topocö korotörö.

⁵ Ja̧'hua̧ta̧nö̧ ahuaruhuärö repe'ömä, suronämä ucuocuocö. Ja̧'hua̧ta̧nö̧ ahuaruhuärö repe'ömä: “Ttötä chöäremä iyocösä korotörö” pä'ocö. O'ca päi'önä ra̧huä̧ri̧po̧cö̧. Korotömä suronä jȩtto̧mȩnä̧, jurunä unichi'ö jȩttä̧ji̧mä̧, recuo ö̧ra̧huä̧ro̧ca̧'a̧.

⁶ Ja̧'hua̧ta̧nö̧ ahuaruhuärö repe'ömä, korotö suronä jȩtto̧mȩnä̧ esehuocö. Adiunätä jȩtto̧mȩnä̧ eseu.

⁷ Ja̧'hua̧ta̧nö̧ o'ca juiyönä adiu a̧'cua̧ pö̧nö̧ kö̧. Diosrötä tta̧'ä̧rö̧ amöcuädö. Ami 'qui'ächi'ö'inä kö̧.

⁸ Ttahuaruhuärö adiu repeähuämä yoröiso beipocö. Koromä Dios iyähuä huȩnȩ jiäcuähuä'inä, korotö ttieru huȩnȩ ucuocuäcuähuä'inä beipächäcua'a. Ja̧'hua̧ta̧nö̧ pi̧jä̧ttö̧ huo̧juä̧huä̧'i̧nä̧ beipächäcua'a.

⁹ Jitämä ju'tometä huo̧juä̧tö̧jä̧. Ja̧'hua̧ta̧nö̧ ju'tometä ji'ähuätöjä adihuä huȩnȩmä̧.

¹⁰ Juhuorö'inä koronö päi'omenä o'ca juiyönä tu̧huo̧jui̧'o̧mȩnä̧, ja̧u̧mä̧ ju'tometä tu̧huo̧jui̧nö̧mä̧ beipächäcua'a.

¹¹ Ji̧'qui̧cha̧hua̧ cheimä, ppo̧'ä̧tö̧ ttucuocu'a̧nö̧, ucuocuinösä ttömä. Ja̧'hua̧ta̧nö̧ ppo̧'ä̧tö̧ ttamöcuädö'a̧nö̧, amöcuädö jȩpi̧nö̧sä̧. Ja̧u̧nu̧ o'ca'a böo juodomenä, ja̧u̧ ppo̧'ä̧tö̧ jȩttö̧'a̧nö̧ jȩchi̧nö̧mä̧ jaropi'inösä.

¹² Ja̧'hua̧ta̧nö̧ ja̧'a̧nä̧, jitämä adiunämä huo̧juo̧co̧tö̧jä̧. Koro juäi ttö'ä toäcuähuodänä sȩppa̧nö̧tä̧ tottö'a̧nö̧, topätöjä jitämä. Koronötä o'ca juiyönä adiunätä totäcuotöjä. Jitämä ju'tometä chu̧huo̧jua̧'a̧nä̧, ja̧u̧nu̧ päi'omenä, o'ca juiyönä chu̧huo̧juä̧cua̧sä̧. Dios ttörö u̧huo̧ju̧'a̧nö̧, ttö'inä chu̧huo̧juä̧cua̧sä̧ o'ca juiyönä.

¹³ Ja̧'hua̧nö̧ ja̧'a̧ttö̧ adiu esetäcuähuä'inä, Diosrö tta̧huä̧rä̧cuä̧huä̧'i̧nä̧, ttahuaruhuärö repeähuä'inä yoröiso beipocö. 'Cuäopönä kä̧cua̧'a̧. Juhuorö'inä ttahuaruhuärö repeähuämä korottö'inä abonänö adihua'a.