1 Corintios 11 - TÄ̧DO Ä̧CUÄ̧ I̧HUȨNȨ

¹ Ttömä Cristo cueächinö ta'anö cuedächomenä, ucutu'inä cue'ächätucui ttö cuedächö ta'anö.

Nä̧tö̧ pa̧'a̧nö̧ jȩttä̧cua̧'a̧nö̧ Diosrö ttucuocuomettö

² Chö̧jä̧hua̧tö̧, ucuturu eseusä 'cuäopönä ttörö amöcuädö jȩcu̧'ä̧tu̧cuo̧mȩnä̧, ttö jidähuinö huȩnȩ.

³ Ja̧'hua̧nö̧ ja̧'a̧nä̧ ucutu cu̧huo̧juä̧tu̧cuä̧cua̧'a̧nö̧ pä'ösä, Cristo o'ca toi'önä pi̧jä̧ ttö̧ja̧ u̧mä̧tö̧ Ttu̧ru̧hua̧ päi'önä kö̧. Ja̧'hua̧ta̧nö̧ Dios chutä Cristo U̧ru̧hua̧ ö̧jö̧'a̧nö̧, ubo'inä irecua ku̧ru̧hua̧ päi'önä kö̧.

⁴ Ya̧tȩ Diosrö ttucuocuomettö, unä mö̧'ȩcu̧ Diosrö ucuocuttu'inä, Dios iyinö huȩnȩ jiäuttu'inä, ja̧u̧mä̧ ucuotäcuähuä juiyönä jȩpö̧ Cristorö.

⁵ Juhuorö'inä yajute kunä mö̧jȩcu̧ juiyöttömä, Diosrö kucuocuomenä'inä, Dios iyinö huȩnȩ jijähuomenä'inä, jahuäjumä ucuotäcuähuä juiyönä jȩpä̧ju̧ kirecuo dä'äcunu ö̧ja̧ pä'ö. Ja̧'hua̧nö̧ kunä mö̧jȩcu̧ juiyönä kucuocuomenä, kuhuo'che 'quirö tticuäcua jȩja̧'a̧ jä̧'i̧nö̧'a̧nö̧ jȩpä̧ju̧.

⁶ Ja̧'hua̧ta̧nö̧ yajute kunä mö̧jȩcu̧ juiyöttömä, jahuäjuru o'ca juiyönä kuhuo'che 'cui'ö tticu'a̧nö̧ ja̧'a̧. Juhuorö'inä yajute kuhuo'che 'cuiähuänä'inä, 'quirö icuähuänä'inä surojö pättöttömä, nä̧tö̧mä̧ ttu mö̧ttȩcuä̧cua̧'a̧nö̧ ja̧u̧nu̧mä̧.

⁷ Ubomä unä mö̧ȩcu̧ juiyö'a̧nö̧ ja̧'a̧. Ubomä Dios jö̧ ta'anö hua̧ kö̧. Ja̧'hua̧ta̧nö̧ Dios adihuä i̧sa̧ pä'ö i̧jȩpö̧ ubomä. Pärocua'acu isajumä i̧jȩpä̧ju̧ ubo adihuä i̧sa̧ pä'ö.

⁸ Dios ttö̧ja̧ i̧sa̧rö̧ äcuomenä aditomenä, uborömä isajuttu aditocö pi̧nö̧do. Ja̧u̧mä̧ isajurumä ubottö aditinödo.

⁹ Diosmä uborö aditocö pi̧nö̧do isajuru ppäda pä'ö. Isajuru aditinödo uborö ppäjäda pä'ö.

¹⁰ Ja̧'hua̧nö̧ ja̧'a̧ttö̧ iso päi'önä nä̧tö̧mä̧ ttunä mö̧ttȩcuä̧cua̧'a̧nö̧ ángeles huotö'inä ttä'ca jo̧mȩttö̧. Ja̧'hua̧nö̧ jȩpö̧ pä'ätö, ujutumä tirecuo hueömä jȩpä̧tö̧jä̧ pä'ö.

¹¹ Ja̧'hua̧nö̧ ja̧'a̧nä̧'i̧nä̧ ujutu Diosrö esetö tö̧ja̧cuo̧mȩnä̧, ubomä isaju toönä ko̧cö̧. Ja̧'hua̧ta̧nö̧ isaju'inä ubo toönä ko̧co̧ju̧.

¹² Iso päi'önä isajumä ubottö aditinäcuado Diosmä pätomenä, ja̧'hua̧ta̧nö̧ ja̧u̧nu̧ o'ca'a, ubomä uhuäpächödo isajuttu. Juhuorö'inä o'ca juiyönä pi̧jä̧nä̧ ka̧cu̧ Dios adicuädo.

¹³ Ucututä ji'ähuätucui, ¿nä̧tö̧mä̧ ttunä mö̧ttȩcuo̧ca̧'a̧ Diosrö ttucuocuomenä, adihua'a tä̧ji̧?

¹⁴ Iso päi'önä pi̧jä̧nä̧ kä̧nö̧, huo̧juä̧tö̧jä̧ ya̧tȩ uhuo'che otoä'che ku̧nä̧rö̧mä̧, ja̧u̧mä̧ dä'äcu ö̧jö̧'a̧nö̧ ja̧'a̧ pä'ö.

¹⁵ Pärocua'acu isajumä kuhuo'che otoä'che ku̧nä̧rä̧ju̧mä̧, iso päi'önä kuhuo'chemä adihua'a jahuäjuru. Diosmä iyinödo nä̧tö̧rö̧ ttuhuo'che otoä'che ttu mö̧ȩcuä̧ päi'önä.

¹⁶ Ya̧tȩ pi̧yȩ huȩnȩ jä'epö ä̧ju̧cua̧ päöttömä, pa̧'a̧nö̧tä̧ pä'ösä ttömä. Ujutu'inä, iglesias ruhuä'inä pädäji ta'anö jȩpä̧tö̧jä̧. Koromä jȩpo̧co̧tö̧jä̧.

Santa Cena jȩä̧cuä̧huä̧nä̧, suronätä jȩpi̧nä̧tö̧do

¹⁷ Jitämä pi̧yȩmä̧ chi̧huȩyu̧to̧mȩnä̧, eseunu huȩyu̧to̧cö̧sä̧. Ucutumä ppäsähuipö cucuocuätucuomenä, adiunä jö̧ juiyönä, surojö a̧'cua̧rö̧nä̧ jȩpä̧tö̧jä̧.

¹⁸ Äcuomenä korotö pä'ätö ttörö ucuturu: “Ppäsähuipö ttucuocuomenä, ka̧ra̧'i̧nä̧ ka̧ra̧'i̧nä̧ i̧mi̧cu̧nä̧ amöcuädä'chö jȩpä̧tö̧ jahuätömä.” “Iso päi'önä pä'ätö a̧'cua̧ra̧'a̧” pä'ösä ttömä.

¹⁹ Iso päi'önä ja̧'hua̧nö̧mä̧ i̧mi̧cu̧nä̧ cuamöcuädäcuotöjä, adiu esetätörö cu̧huo̧juä̧tu̧cuä̧cua̧'a̧nö̧.

²⁰ Ja̧'hua̧nö̧ jȩcu̧'ä̧tu̧cuo̧mȩnä̧ i̧mi̧cu̧nä̧ amöcuädä'chö, ucutu cuppäsähui'ätucuomenä Santa Cena jȩcu̧'ä̧tu̧cua̧ pä'ö, Tu̧ru̧hua̧rö̧ pä̧huä̧ rö̧jo̧mȩnä̧ jȩpo̧co̧tö̧jä̧.

²¹ Ucutu ja̧'hua̧nö̧ jȩpö̧, korotö ucututtu ttu̧cuȩ päi'önä cuätö, korotömä ppäi rö̧ja̧'a̧ ttö̧'o̧mȩnä̧. Ja̧'hua̧ta̧nö̧ korotömä tä̧'ä̧mä̧tö̧.

²² ¿Ucutu cu̧cuȩ cuä̧nö̧ cuahuätucua pä'ö jui'ätöjä tä̧ji̧ cuojusode? Ucutumä ja̧'hua̧nö̧ jȩcu̧'ä̧tu̧cuo̧mȩnä̧, Diosrö esetätörö cujö'cätucu jui'ö jȩpä̧tö̧jä̧. Ja̧'hua̧ta̧nö̧ korotö jui'ätörö ttödäpecunä jȩpä̧tö̧jä̧. ¿Tta̧'a̧nö̧ pä'ö jidähua'ajä̧ttö̧ ucuturu? ¿Eseunu jidähua'a̧nö̧ tä̧ji̧? Isocö̧. Ja̧'hua̧nö̧mä̧cö̧.

Santa Cena jȩä̧cuä̧huä̧ huȩnȩ

²³ Pi̧yȩ huo̧juȩcuä̧ huȩnȩ ucuturu chu̧huo̧juȩti̧nö̧mä̧, Tu̧ru̧hua̧ huo̧juȩti̧nö̧ ttörö. Ja̧u̧nu̧ yodo, Tu̧ru̧hua̧ Jesúsru ttiyä̧cuȩ yodo, chutä i̧ri̧si̧ ȩmo̧po̧'ö̧ 'chu̧'ä̧ri̧nö̧do u̧mö̧nä̧.

²⁴ Ja̧'hua̧nö̧ 'chu̧'ä̧rö̧ Diosrö ucuocuäji'ca̧, 'tȩ'chä̧rö̧ iyinödo i̧ri̧si̧. Pa̧'a̧nö̧ pä'inödo: “Cuätucui. Pi̧yȩmä̧ ttötä jä̧ttä̧pä̧ya̧sä̧ ucuturu ppä'ädö iyö icuä̧cuȩ. Ttörö amöcuädö jȩpä̧tu̧cui̧.”

²⁵ Ja̧'hua̧ta̧nö̧ ttu̧cuȩ ttucuäji o'ca'a, i̧so̧'ta̧'i̧nä̧ u̧mö̧nä̧ 'chu̧'ä̧rö̧ pä'inödo: “Pi̧yȩmä̧ ttö chucuoja ja̧'a̧, jareö huȩnȩ chiya pä'ö ucuturu. Cuahuätucuomenä, ttörö amöcuädö jȩpä̧tu̧cui̧.”

²⁶ Ja̧'hua̧nö̧ ja̧'a̧ttö̧ Tu̧ru̧hua̧ ichäcuome jubö päi'önä, pi̧yȩ i̧ri̧si̧ cuä̧nö̧, i̧so̧'ta̧'i̧nä̧ au jȩcu̧'ä̧tu̧cuo̧mȩnä̧, chutä 'corupäi'ina'a huȩnȩ huo̧juȩtö̧ jȩpä̧tö̧jä̧.

Pa̧'a̧nö̧ jȩpä̧tu̧cui̧ Santa Cena jȩpö̧mä̧

²⁷ Ya̧tȩ i̧mi̧cu̧nä̧ jȩpä̧'chö̧ Tu̧ru̧hua̧rö̧ amöcuädoca'anä pi̧yȩ i̧ri̧si̧'i̧nä̧ cuä̧nö̧, i̧so̧'ta̧'i̧nä̧ auttumä, ja̧u̧mä̧ yoröiso suronätä jȩpö̧ Tu̧ru̧hua̧ jä̧ttä̧pä̧ya̧nä̧'i̧nä̧, Tu̧ru̧hua̧ ucuojanä'inä.

²⁸ Ja̧'hua̧nö̧ ja̧'a̧ttö̧ o'ca toi'önä ttamönä ka̧cuä̧mö̧ ttamöcuädö'a̧nö̧ ja̧'a̧ pi̧yȩ i̧ri̧si̧'i̧nä̧ cuä̧nö̧, i̧so̧'ta̧'i̧nä̧ ttahuäcua'a ä'canä.

²⁹ Ya̧tȩ pi̧yȩmä̧ ja̧'a̧tä̧ cuä̧nö̧ auttumä, Tu̧ru̧hua̧ jä̧ttä̧pä̧ya̧ huȩnȩ amöcuädoca'anä, chutä amönä ro̧'ȩpä̧cuä̧u̧ jȩpö̧.

³⁰ Iso päi'önä ja̧'hua̧nö̧ amöcuädäcuähuä juiyönä jȩtto̧mȩnä̧, ucututtu recuätö ka̧cuä̧tö̧ na̧'ä̧chä̧tö̧'i̧nä̧, juiyupätö'inä. Ja̧'hua̧ta̧nö̧ yotöte ja̧'hua̧nö̧ jȩpö̧ hua'ö icuinätödo.

³¹ Juhuorö'inä ujutumä tamönämä adiu ka̧cuä̧mö̧ tamöcuädöttömä, Tu̧ru̧hua̧mä̧ ja̧'hua̧nö̧ tä̧bo̧to̧cö̧ ujuturu.

³² Ja̧'hua̧nö̧ ja̧'a̧nä̧ Tu̧ru̧hua̧mä̧ ujuturu ka̧cuä̧mö̧ tomenä, ujuturu adiu ro̧'ȩpö̧, pi̧jä̧ ttö̧ja̧ ro̧ȩcuȩ 'cuätopö juiya pä'ö.

³³ Ja̧'hua̧nö̧ ja̧'a̧ttö̧ chö̧jä̧hua̧tö̧, Santa Cena jȩpö̧ cuppäsähui'ätucuomenä, o'ca toi'önärö tta̧'ä̧rä̧tu̧cui̧ ji̧nä̧ yo̧mȩtȩnä̧ cucuätucuäcua'a̧nö̧.

³⁴ Ya̧tȩ ppäi rö̧jä̧cu̧mä̧, chutä ojusodenä u̧cuȩ ucuäcua'a̧nö̧, Dios ro̧ȩpö̧ juiya pä'ö ucuturu cuppäsähui'ätucuomenä. Koro juäi huȩnȩ ttötä chichomenä, chu̧cuo̧cuä̧cua̧sä̧.