1 Corintios 10 - TÄ̧DO Ä̧CUÄ̧ I̧HUȨNȨ

Ja̧'hua̧nö̧ jȩpi̧nä̧tö̧do tä̧do̧tö̧ mi̧nä̧

¹ Chö̧jä̧hua̧tö̧, iso päi'önä cu̧huo̧juä̧tu̧cua̧ pä'ösä, täbocö o'ca toi'önä tä̧do̧tö̧ mi̧nä̧ ajiya isoppa cueädinä̧u̧do. Ja̧'hua̧ta̧nö̧ Mar Rojo dubora o'ca toi'önä 'cuä'oi'inätödo.

² Ja̧'hua̧ta̧nö̧ jahuätömä o'ca toi'önä Moisés umöhuäyotö päi'önä ji̧nä̧ yo̧mȩtȩ bautizando hui̧nä̧tö̧do ajiya isoppanä'inä, dubora rö̧oranä'inä.

³ Ja̧'hua̧ta̧nö̧ o'ca toi'önä ttu̧cuȩ'i̧nä̧, Dios iyömä ji̧nä̧ yo̧mȩtȩ cuinätödo.

⁴ Ja̧'hua̧ta̧nö̧ o'ca toi'önä ttahua pä'ö'inä, Dios iyömä ji̧nä̧ yo̧mȩtȩ ahuinätödo. Jahuätö inähuättö, Dios iyinähuättö räoi'oya ahuinätödo. Ja̧u̧ inähuämä Cristo pi̧nö̧do. Ja̧u̧mä̧ jahuätöcu 'chi̧nö̧do.

⁵ Ja̧'hua̧nö̧ ja̧'a̧nä̧ jahuätöttö recuätörö yoröiso esehuocö pi̧nö̧do Dios. Ja̧'hua̧nö̧ ja̧'a̧ttö̧ de'anä cue'ächö hua'ö icuinätödo.

⁶ Ja̧u̧mä̧ o'ca juiyönä 'cuäopina'ado, ujutu topö suronä amöcuädö jȩtö̧ juiya pä'ö, jahuätö jȩtti̧nö̧'a̧nö̧.

⁷ Ja̧'hua̧nö̧ ja̧'a̧ttö̧ ttu̧mö̧nä̧ adicuä juäimä cuesetätucuä', jahuätöttö yotöte ttesetinö'a̧nö̧mä̧. Huȩyu̧cuä̧ Huȩnȩ päa'a: “Jahuätö ttö̧ja̧ pä̧mä̧dö̧ ttu̧cuȩ cuä̧nö̧'i̧nä̧ ahuinätödo. Juhua'a cä'ädö ä̧rä̧mi̧'i̧nä̧tö̧do fiesta jȩtta̧ pä'ö.”

⁸ Ja̧'hua̧ta̧nö̧ ujutu nä̧tö̧rö̧ jȩtö̧ juiyäcua'a̧nö̧, korotö jahuätöttö jȩtti̧nö̧'a̧nö̧. Jahuätö ja̧'hua̧nö̧ jȩpä̧'chö̧, ya'ute mo̧ro̧mä̧ veintitres mil jo̧mȩnä̧ hua'ö icuinätödo.

⁹ Ja̧'hua̧ta̧nö̧ koro jȩto̧mȩnä̧, Diosmä ami 'qui'ächi'ö kä̧nö̧, to̧pä̧rö̧ ujuturu pä'ö jȩtö̧ juiyäcua'a̧nö̧, jahuätöttö yotöte jȩtti̧nö̧'a̧nö̧. Jahuätö, ja̧'hua̧nö̧ jȩpi̧nä̧tö̧mä̧, ä̧ca̧tö̧ yö̧yö̧ttä̧u̧ hua'ö icuinätödo.

¹⁰ Diosrö suronä cucuocuätucuä', jahuätöttö yotöte ttucuocuinö'a̧nö̧. Ja̧'hua̧nö̧ ttucuocuomenä, ya̧tȩ ángel, cuä'ö icua pä'ö huȩ'ä̧hua̧, cuä'ö icuinä̧u̧do.

¹¹ Täbocö ja̧u̧ juäi o'ca juiyönä 'cuäopina'ado ujutu tä̧do̧tö̧ mi̧nä̧rö̧. Ja̧'hua̧ta̧nö̧ Huȩyu̧cuä̧ Huȩnȩ huȩyu̧cua̧'a̧ ujuturu, jitä mo̧ro̧ röji mo̧ro̧ ka̧cuä̧tö̧rö̧, tä̧bo̧tö̧.

¹² Ja̧'hua̧nö̧ ja̧'a̧ttö̧ ya̧tȩ “Ttömä adiunä 'quiyönä kä̧nö̧ esetösä” pä'ömä, ttu̧ȩcuä̧nä̧tä̧ amöcuädäcua'a̧nö̧, suronä jȩö̧ juiya pä'ö.

¹³ Ucuturu suronä 'cuäopömä, korotörö'inä 'cuäopa'a ja̧'hua̧ta̧nö̧. Dios päömä jȩpö̧. Ja̧'a̧tä̧ topocö ucuturu suronä 'cuäopomenä, cuami 'quicuhuächi'ätucu juiyönä päi'omenä. Cujurutucu i̧yä̧cua̧ Dios, suronä 'cuäopomenä, cuami 'qui'ächi'ö cu̧jä̧tu̧cuä̧cua̧'a̧nö̧.

¹⁴ Ja̧'hua̧nö̧ ja̧'a̧ttö̧ adihuä chö̧jä̧hua̧tö̧, ttu̧mö̧nä̧ adicuä juäi esetäcuähuämä, jaropi'ätucui.

¹⁵ Ttö adiu ä̧ju̧cuä̧tö̧rö̧ jittäu'a̧nö̧, ji'äusä ucuturu. Ucututä adiu ka̧cuä̧mö̧ amöcuädätucui ttö jidäumä.

¹⁶ Ja̧'hua̧ta̧nö̧ Santa Cena jȩpö̧, Diosrö ucuocu isoya tahuomenä, pä'ätöjä: “Pi̧yȩmä̧ Cristo ucuoja päi'a'a ahuätöjä.” Ja̧'hua̧ta̧nö̧ i̧ri̧si̧'i̧nä̧ tucuomenä, pä'ätöjä: “Pi̧yȩmä̧ Cristo jä̧ttä̧pä̧ya̧ päi'a'a cuätöjä.”

¹⁷ Ujutumä tirecua'anä, o'ca toi'önä ji̧nä̧ ji̧si̧tȩttö̧ cuätöjä. Ja̧'hua̧nö̧ ja̧'a̧ttö̧ ujutumä o'ca toi'önä ji̧nä̧ ji̧yȩtȩ huotö pä'i'ätöjä.

¹⁸ Israel ttö̧ja̧rö̧ amöcuädätucui. Jahuätömä sacrificios jȩpä̧tö̧do. Ja̧'hua̧ta̧nö̧ Diosrö amöcuädö sacrificio ttiyomettö cuätö. Ja̧'hua̧nö̧ jȩpö̧, jahuätömä ji̧nä̧ ji̧yȩtȩ huotö pä'i'ätö.

¹⁹ Ttömä pa̧'a̧nö̧ pädomenä, pä'ocösä ttu̧mö̧nä̧ adicuä juäimä micuähua'a pä'ö. Ja̧'hua̧ta̧nö̧ idepä'inä ja̧u̧ juäi esetö ttiyäjimä korottö'inä abonänö adiumä pä'ocösä.

²⁰ Pa̧'a̧nö̧tä̧sä̧ pä'ö, korotömä Diosrö esetocotömä, sacrificios jȩtto̧mȩnä̧, espíritus suropätörö jȩpä̧tö̧do, Diosrö jȩtto̧ca̧'a̧nä̧. Ttö pä'ösä ucuturu, espíritus suropätörö amöcuädö jȩcu̧'ä̧tu̧cu̧ juiyäcua'a̧nö̧.

²¹ Iso päi'önä ucutumä yoräteunä au jȩpo̧co̧tö̧jä̧ Tu̧ru̧hua̧ttö̧'i̧nä̧, espíritus suropätöttö'inä. Ja̧'hua̧ta̧nö̧ Tu̧ru̧hua̧ öärettö'inä, espíritus suropätö ttöarettö'inä yoräteunä cuocotöjä.

²² Ujutumä ¿Tu̧ru̧hua̧ a'cuoyäunu toatö pä'ö jȩpä̧tö̧jä̧ tä̧ji̧? Ujutumä ¿ja̧u̧ttu̧'i̧nä̧ abonänö juruhuätöjä tä̧ji̧?

Diosrö esetätö korotörö repettäcua'a̧nö̧

²³ Iso päi'önä pättö huȩnȩ päa'a: “Ya̧tȩ chutä amöcuädö jȩö̧'a̧nö̧ ja̧'a̧.” Juhuorö'inä o'ca juiyönä jȩö̧ttö̧mä̧ adihuoca'a. Ya̧tȩ o'ca juiyönä chutä amöcuädö jȩö̧'a̧nö̧ ja̧'a̧to. Ja̧'hua̧nö̧ jȩo̧mȩnä̧, o'ca juiyönä ppädoca'ato.

²⁴ Ja̧'hua̧nö̧ ja̧'a̧ttö̧ korotörö adiu jȩcu̧'ä̧tu̧cuä̧cua̧'a̧nö̧, cuamönätucu cuamöcuädätucuoca'anä.

²⁵ O'ca juiyönä idepä ttiyomettö, ȩmö̧ cuätucui, koro amöcuädö jäcuhue'ätucuoca'a.

²⁶ O'ca juiyönä pi̧jä̧'i̧nä̧, pi̧jä̧nä̧ ka̧cu̧'i̧nä̧ Tu̧ru̧hua̧ jähuä ja̧'a̧.

²⁷ Ja̧'hua̧ta̧nö̧ ya̧tȩ Diosrö esetocömä ucuturu päöttömä, chojusodera̧'a̧ cucuätucua ichätucui pä'ö, ucutu'inä cuä̧nö̧ cui̧'chä̧tu̧cuo̧mȩnä̧, o'ca juiyönä iyömä cuätucui, ucututä cuamöcuädätucumä jäcuhue'ätucuoca'a.

²⁸ Juhuorö'inä ya̧tȩ päöttömä, pi̧yȩ idepä ttu̧mö̧nä̧ adicuä juäi ucuocu iyäjisä pä'ö, ja̧u̧ juäimä cucuätucuä', ja̧'hua̧nö̧ pä'äjimä suronä amöcuädö juiyäcua'a̧nö̧.

²⁹ Ja̧'hua̧nö̧ pädomenä, ka̧ra̧ amöcuädötä pä'ösä, ucutä cuamöcuädömäcö̧. Ja̧'hua̧ta̧nö̧, ka̧ra̧ chutä amönä amöcuädö jȩö̧'a̧nö̧, ttö'inä ja̧'hua̧ta̧nö̧ ¿dä̧bö̧ jȩchä̧cua̧'a̧jä̧ttö̧? pä'ö jä̧cu̧huȩ'ä̧cua̧jä̧.

³⁰ Ttö koro juäi cuä̧nö̧, Diosrö eseunu chucuocuttumä, ¿tta̧'a̧nö̧ pä'ö suronä ttucuocua'ajä̧ttö̧ ttörömä?

³¹ O'ca juiyönä cucuätucu'inä, cuahuätucu'inä, jȩcu̧'ä̧tu̧cu̧'i̧nä̧, Diosrö eseunu jȩpä̧tu̧cui̧.

³² Korotömä judíos ttö̧ja̧'i̧nä̧, judíos huocotö'inä, Diosrö esetätö'inä ttä'ca jo̧mȩttö̧ suronä jȩcu̧'ä̧tu̧cuä̧', jahuätö'inä suronä jȩcu̧'ä̧tu̧cua̧'a̧ topi'ö'cotö suronä jȩtta̧'a̧cu̧.

³³ Ttömä 'cuäopönä jȩcha̧ pä'ösä o'ca toi'önä ttesehuäcua'anö̧. Ttötä chamönämä amöcuädäcuähuocösä. Korotörö amöcuädösä, jahuätö'inä ttesetäcuä'a̧nö̧.