1 Corintios 1 - TÄ̧DO Ä̧CUÄ̧ I̧HUȨNȨ

Pablo huȩyu̧tu̧ hue'inö Corinto ötahuiyä ttö̧ja̧rö̧

^1-2 Ttö Pablo, Diosrö pä̧huä̧ rö̧jo̧mȩnä̧ huoinäcusä, Jesucristo huȩ'ä̧hua̧ päi'önä chö̧ja̧ pä'ö. Ji̧nä̧ yo̧mȩtȩnä̧ chö̧jä̧hua̧ Sóstenescu huȩyu̧tu̧sä̧ pojä cuyäru isojänä chö̧jä̧hua̧tö̧rö̧, Dios i̧huȩnȩ esetätörö, Cristo Jesúsru tteseta'attö Dios i̧tti̧mö̧rö̧, Corinto ötahuiyänä ka̧cuä̧tö̧rö̧. Dios huoinä̧u̧jä̧ ucutu adihuä juäitä amöcuädö cu̧ja̧cuä̧tu̧cua̧ pä'ö, o'ca toi'önä pa̧ja̧cu̧nä̧ Ttu̧ru̧hua̧ Jesucristo i̧mi̧nä̧ ucuocu esetätöcu. Ja̧u̧mä̧ jitö'inä Ttu̧ru̧hua̧, ujutu'inä Tu̧ru̧hua̧ päi'önä kö̧.

³ Tä'o Dios'inä, Tu̧ru̧hua̧ Jesucristo'inä ucuturu adiu ppättädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu ttiyäcua'a̧nö̧.

Cristo ucuturu ppädinö huȩnȩ

⁴ 'Cuäopönä Diosrö eseunu ucuocusä ucuturu, Cristo Jesúsru cuesetätucua'attö, Dios ucuturu adiu ppädinö amöcuädö.

⁵ Cristorö cuesetätucuomenä, Dios rö̧ȩnä̧ ppä'ädinö ucuturu o'ca juiyönä cucuocuätucu'inä, cu̧huo̧juä̧tu̧cu̧'i̧nä̧.

⁶ Ja̧'hua̧ ja̧'a̧ Cristo i̧huȩnȩ jidähuinö ta'anö 'cuäopa'a ucuturu.

⁷ Ucutu Tu̧ru̧hua̧ Jesucristo ichö mo̧ro̧ päi'önä tta̧cu̧huä̧rä̧tu̧cuo̧mȩnä̧, Dios iyömä o'ca juiyönä ku̧nä̧rä̧tö̧jä̧ ucutumä.

⁸ Dios cuami 'qui'ächi'ö cu̧ja̧cuä̧tu̧cua̧ pä'ö tta̧huä̧rä̧cua̧ ucuturu röji mo̧ro̧ päi'önä, Tu̧ru̧hua̧ Jesucristo ichö mo̧ro̧ päi'önä, yoröiso suronä ttucuocu juiya pä'ö ucuturu.

⁹ Diosmä 'cuäopönä jȩpö̧ chutä päömä. Ja̧u̧ ucuturu huoinä̧u̧jä̧ ji̧nä̧ yo̧mȩtȩ cu̧ja̧cuä̧tu̧cua̧ pä'ö chutä I̧tti̧ Tu̧ru̧hua̧ Jesucristocu.

Iglesia ruhuä yoröiso yoräteunä amöcuädocotö pi̧nä̧tö̧do

¹⁰ Chö̧jä̧hua̧tö̧, Tu̧ru̧hua̧ Jesucristo i̧mi̧nä̧ pä'ösä ucuturu, yoräteunä amöcuädätucui. I̧mi̧cu̧nä̧ cuamöcuädätucuä'. Ja̧'hua̧ ji̧yä̧cu̧ pä'ösä, adiu ji̧nä̧ yo̧mȩtȩ amöcuädö ka̧cuä̧tu̧cui̧ yoräteunä.

¹¹ Chö̧jä̧hua̧tö̧, ja̧'hua̧ta̧nö̧ Cloé kahuaruhuä ttörö ji'ähuinätö rohuäcuähuä huȩnȩ ka̧cua̧'a̧ ucutu cu̧'quȩtȩtu̧cu̧nä̧ pä'ö.

¹² Ja̧'hua̧nö̧ pädomenä, ucututtu yotöcunä koromenä ji'ähuätöjä pä'ösä. Korotö pä'ätö: “Ttötäsä Pablo i̧sa̧mä̧.” Korotö pä'ätö: “Ttötäsä Apolos i̧sa̧mä̧.” Korotö pä'ätö: “Ttötäsä Pedro i̧sa̧mä̧.” Korotö pä'ätö: “Ttötäsä Cristo i̧sa̧mä̧.”

¹³ Ja̧'hua̧nö̧ ja̧'a̧nä̧ ¿Cristomä i̧mi̧cu̧nä̧ 'quȩ'ȩcu̧ amöcuädö tä̧ji̧? Ja̧'hua̧ta̧nö̧ ¿Pablomä dau isodänä 'corupä'i'inö tä̧ji̧, ucutu suronä jȩcu̧'ä̧tu̧cu̧ jȩpö̧ icu? Ja̧'hua̧ta̧nö̧ Pablo i̧mi̧nä̧ bautizando jȩi̧nä̧u̧jä̧ tä̧ji̧ ucutumä?

¹⁴ Diosrö eseusä ucuturu yoröiso bautizando jȩpo̧cö̧ pi̧nö̧sä̧. Ta̧ju̧ru̧tä̧ Crisporönötä, Gayorönötä bautizando jȩpi̧nö̧sä̧.

¹⁵ Ja̧'hua̧nö̧ ja̧'a̧ttö̧ ucutumä yoröisotä pä'ocotöjä ttömä Pablo i̧mi̧nä̧ bautizando pä'inösä pä'ö.

¹⁶ Iso päi'önä ttö bautizando jȩpi̧nö̧sä̧ Estéfanas ahuaruhuärö. Chamöcuädomenä, korotörömä bautizando jȩpo̧cö̧ pi̧nö̧sä̧.

¹⁷ Cristomä ttörö hue'ocö pi̧nö̧ korotörö bautizando jȩcha̧ pä'ö. Ja̧u̧ hue'inö suronä jȩttö̧ jȩpö̧ icu huȩnȩ jidähua pä'ö. Ja̧'hua̧ta̧nö̧ Cristo dau isodänä 'corupäi'inö huȩnȩ jeruhuocötä ji'äusä.

Cristomä o'ca juiyönä huo̧jua̧

¹⁸ Cristo dau isodänä 'corupäi'inö huȩnȩ ttu̧'ȩpä̧ro̧co̧tö̧ ttucuocua'a jä̧'i̧nö̧'a̧nö̧, ucuocuätö Diosrö esetocotömä. Pi̧yȩmä̧ ujutumä, Diosrö esetätömä, Dios ujuru huȩnȩ pä'ätöjä.

¹⁹ Ja̧'hua̧ta̧nö̧ Huȩyu̧cuä̧ Huȩnȩ päa'a: Pi̧jä̧ttö̧ huo̧juä̧huä̧ be'epäjipö chi̧cuä̧cua̧sä̧. Pi̧jä̧ttö̧ rö̧ȩnä̧ amöcuädäcuähuä pporädö chi̧cuä̧cua̧sä̧.

²⁰ ¿Tȩnȩjä̧ttö̧ pi̧jä̧ttö̧ huo̧juä̧huä̧ i̧sa̧mä̧? ¿Tȩnȩjä̧ttö̧ pi̧jä̧ttö̧ huo̧juȩcuä̧ i̧sa̧mä̧? ¿Tȩnȩjä̧ttö̧ pi̧jä̧ttö̧ ucuocuäcuähuä i̧sa̧mä̧? Pi̧jä̧ttö̧ huo̧juä̧huä̧ ttu̧'ȩpä̧ro̧co̧tö̧ ttucuocu'a̧nö̧ a̧'cua̧rö̧nä̧ jȩpi̧nö̧do Dios.

²¹ Diosmä huo̧jua̧ chutä jȩö̧. Dios hue'inödo pi̧jä̧ ttö̧ja̧ jitötä ttamönä huo̧juä̧huä̧nä̧ ttu̧huo̧jui̧'i̧yi̧ya̧rö̧ pä'ö. Chutä i̧huȩnȩ, korotö ttu̧'ȩpä̧ro̧co̧tö̧ ttucuocu'a̧nö̧ a̧'cua̧rö̧nä̧ pättö huȩnȩ ttesetomenä, suronä jȩttö̧ jȩpö̧ icua pä'inödo.

²² Judíos ttö̧ja̧ totta pä'ätö ttö̧ja̧ ttieru juäi. Griegos ttö̧ja̧ usätö pi̧jä̧ttö̧ huo̧juä̧huä̧.

²³ Ja̧'hua̧nö̧ ja̧'a̧nä̧ ujutumä ji'ähuätöjä Cristo i̧huȩnȩ, dau isodänä kä̧nö̧ 'corupäi'inö huȩnȩ. Judíos ttö̧ja̧ pi̧yȩ huȩnȩ dä'äcunu ä̧ju̧cuä̧tö̧. Judíos huocotömä, griegos ttö̧ja̧mä̧, pi̧yȩ huȩnȩmä̧ ttu̧'ȩpä̧ro̧co̧tö̧ ttucuocua'a jä̧'i̧nö̧'a̧nö̧ jö̧ huȩnȩ pä'ö amöcuädätö.

²⁴ Ja̧'hua̧nö̧ ja̧'a̧nä̧ Dios huoinä̧u̧mä̧, judíos ttö̧ja̧'i̧nä̧, griegos ttö̧ja̧'i̧nä̧ pä'ätö: “Cristomä Dios ujuru päi'önä kö̧.” Ja̧'hua̧ta̧nö̧ pä'ätö: “Cristomä Diosttö huo̧juä̧huä̧ päi'önä kö̧.”

²⁵ Dios i̧huȩnȩmä̧, pi̧jä̧ ttö̧ja̧rö̧mä̧ ttu̧'ȩpä̧ro̧co̧tö̧ ttucuocua'a jä̧'i̧nö̧'a̧nö̧ jö̧ huȩnȩ, pi̧jä̧ttö̧ huo̧juä̧huä̧ttö̧'i̧nä̧ abonänö adiu huo̧juä̧huä̧. Ja̧'hua̧ta̧nö̧ Dios ujuru jui̧'a̧ a̧'cua̧ra̧'a̧ jä̧'i̧nö̧'a̧nö̧ jö̧mä̧, pi̧jä̧ ujuruttu'inä abonänö juruhua'a.

²⁶ Chö̧jä̧hua̧tö̧, amöcuädätucui, Dios huoinä̧u̧jä̧ ucutu. Ucututtu a̧'u̧cu̧nä̧tä̧ huo̧ju̧nä̧ huo̧juä̧tö̧jä̧ pi̧jä̧ttö̧ huo̧juä̧huä̧. Ja̧'hua̧ta̧nö̧ ucututtu a̧'u̧cu̧nä̧tä̧ hue'ähuotöjä. Ja̧'hua̧ta̧nö̧ ucututtu a̧'u̧cu̧nä̧tä̧ pi̧jä̧ttö̧ ucuotäcuähuä ttö̧ja̧jä̧.

²⁷ Pärocua'acu Dios ȩmi̧nö̧do pi̧jä̧ttö̧ rö̧ȩnä̧ huo̧juo̧co̧tö̧rö̧, korotö pi̧jä̧ttö̧ huo̧ju̧nä̧ huo̧juä̧tö̧ ttödäpecua pä'ö. Ja̧'hua̧ta̧nö̧ pi̧jä̧ttö̧ juiyupätörö'inä ȩmi̧nö̧do Dios, pi̧jä̧ttö̧ juruhuätö ttödäpecua pä'ö.

²⁸ Ja̧'hua̧ta̧nö̧ Dios ȩmi̧nö̧do pi̧jä̧ ttö̧ja̧ ttöjö'coco̧u̧ru̧, usurä isotörö, pi̧jä̧ ttö̧ja̧ adiu a̧'cua̧rö̧nä̧ jȩttö̧ be'epäjipö tticua pä'ö.

²⁹ Ja̧'hua̧nö̧ ja̧'a̧ttö̧ yoröiso Dios ä'ca jo̧mȩttö̧ ttamönä tta'cuoyähuäcuäu juiyäcua'a̧nö̧.

³⁰ Ja̧'hua̧nö̧ ja̧'a̧nä̧ chutä Dios, Cristo Jesúscu ji̧nä̧ yo̧mȩtȩ cu̧ja̧cuä̧tu̧cua̧ pä'ö hue'inödo. Ja̧'hua̧ta̧nö̧ chutä Cristo iyinödo ujutu tu̧huo̧ju̧nä̧. Ja̧'hua̧ta̧nö̧ Cristorö teseta'attö, Dios jȩi̧nä̧u̧jä̧ ja̧u̧cu̧ ji̧nä̧ ji̧yȩtȩ huotö ta pä'ö. Ja̧'hua̧ta̧nö̧ ujuturu ȩmö̧ suronä jȩtö̧ jȩpö̧ icuinödo.

³¹ Pa̧'a̧nö̧ päa'a Huȩyu̧cuä̧ Huȩnȩ: “Ya̧tȩ chutä amönä adiu jȩpö̧sä̧ pä'ö amöcuädömä, Chu̧ru̧hua̧tä̧ adiu jȩpö̧, päö'a̧nö̧ ja̧'a̧.”