اِنجِیل شریف (لُوقا) 9 - Mirpuri-Pahari Bibleحصرت عِیسیٰ اپݨے باراں صحابیاں کی تبلیغ کرنے تے لوکاں کی بیماریاں تُوں شِفأ دیݨے واسطے پہیجݨے اݨ 1 اِک دیہاڑے حضرت عِیسیٰ اپݨے باراں صحابیاں کی بُلایا، تے اُنہاں کی لوکاں وِچوں جِنّات کَڈھݨے تے بیماراں کی شِفأ دیݨے نی قوَّت تے اختیار دِتا۔ 2 تے اُنہاں کی اے آخی کے پہیجیا، ”لوکاں کی اللّٰہ تعالیٰ نی بادشاہی نے بارے وِچ پَیغام سُݨاؤ، تے بیماراں کی شِفأ دیو۔ 3 اپݨے نال فالتُو پہار کُجھ وی ناں کِہنو، ناں سوٹی، ناں تھیلا، ناں روٹی، ناں پَیسہ، ناں فالتُو کپڑے۔ 4 جِس شہر وِچ تُساں جاؤ اُتھے اِک کہرے نے ہی مہمان بݨو، تے اُس گرائیں وِچوں نِکلݨے ویلے تک اُتھے ہی رہو۔ 5 کدے کُسے شہر نے لوک تُساں کی قبُول ناں کرݨ تے ناں ہی تُساں نی گل سُݨݨ، اُس شہر کی چھوڑنے ویلے شہر نی مِٹی جیہڑی تُساں نے پیراں نال لغی اَے، اُتھے نیاں لوکاں نی تباہی نی نِشانی نے طور اپر چھنڈی شوڑیائے۔“ 6 فِر اِس تُوں بعد صحابیاں اپݨا سفر شرُوع کری شوڑیا۔ او گرائیں گرائیں وِچ جائی کے لوکاں کی اللّٰہ تعالیٰ نی خُوشی نی خبر سُݨاݨے رہے، تے بیماراں کی شِفأ وی دیݨے رہے۔ 7 جِس ویلے ریاست گلِیل نے حُکمران ہیرودیس حضرت عِیسیٰ نے بارے وِچ گلاں سُݨیاں تے او بہُوں حیران ہویا، کِیئانکہ کُجھ لوک آخݨے سݨ، ”حضرت یحییٰ دوبارہ زِندہ ہوئی گئے اݨ۔“ 8 کوئی لوک اے گل آخݨے ہوݨے سݨ، ”حضرت اِلیاس دوبارہ ظاہر ہوئی گئے اݨ۔“ پر کُجھ لوک آخݨے ہوݨے سݨ، ”اے پُراݨے زمانے نے نبیاں وِچوں اَے، جیہڑا دوبارہ زِندہ ہوئی گیا اے۔“ 9 پر ہیرودیس آخیا، ”یحییٰ نا سِر تے میں آپوں کَٹوایا سی۔ ہُݨ اے کُݨ ہوئی سکݨا، جِس نے بارے وِچ لوک اے گلاں کرنے اݨ؟“ اِس واسطے اُس کوشِش کِیتی کہ حضرت عِیسیٰ کی آپوں اپݨی اکھیاں نال تکے۔ حضرت عِیسیٰ پَنج ہزار بندیاں کی کھاݨا کھُوالݨے اݨ 10 حضرت عِیسیٰ نے صحابی اپݨے سفر تُوں مُڑی کے آئے، تے او ساریاں گلاں سُݨایاں جیہڑیاں اُنہاں نال ہویاں سݨ۔ فِر حضرت عِیسیٰ اُنہاں کی اپݨے نال ہِݨی کے الگ اِک شہر وِچ ٹُری گئے جِس نا ناں بَیتِ صَیدا سی۔ 11 بہُوں سارے لوک اے گل سُݨی کے حضرت عِیسیٰ نے پِچھے ٹُری گئے۔ حضرت عِیسیٰ اُنہاں کی بڑی خُوشی نال مِلے، تے اُنہاں کی اللّٰہ تعالیٰ نی بادشاہی نے بارے وِچ پَیغام دِتا، تے بیماراں کی شِفأ وی دِتی۔ 12 جِس ویلے نماشاں نا ٹَیم ہوݨ لغا، تے حضرت عِیسیٰ نے باراں صحابی اُنہاں کول اچھی کے آخݨ لغے، ”اِتھے کوئی بَستی نی۔ لوکاں کی جاݨ دیو، تانکہ اے آسے پاسے نے گرانواں تے بستیاں وِچ جائی کے اپݨے واسطے کھاݨے پِیݨے تے رہݨے نا بندوبست کرݨ۔“ 13 حضرت عِیسیٰ آخیا، ”تُساں اپݨے کولوں اِنہاں کی کُجھ کھاݨے واسطے دیو!“ صحابیاں جواب دِتا، ”اَساں کول تے صِرف پَنج روٹیاں تے دو مچھیاں اݨ۔ کَے خیال اَے؟ اَساں جائی کے اِنہاں ساریاں واسطے کھاݨا مُلے نا ہِݨی کے آݨاں؟“ 14 جناݨیاں تے بچیاں نے علاوہ اُتھے تقریباً پَنج ہزار تے صِرف مرد سݨ۔ حضرت عِیسیٰ اپݨے صحابیاں کی آخیا، ”اِنہاں کی پَنجاہ پَنجاہ نے گروہ کری کے بہالو۔“ 15 صحابیاں حُکم نی تعمیل کِیتی، تے ساریاں کی بہالی شوڑیا۔ 16 فِر حضرت عِیسیٰ پنج روٹیاں تے دو مچھیاں کِہندیاں، تے آسمان در تکی کے اللّٰہ تعالیٰ نا شُکر ادا کِیتا۔ تے روٹیاں پہنی کے اپݨے صحابیاں کی دیݨے گئے، تانکہ لوکاں کی بنڈݨ۔ 17 اُنہاں ساریاں رجی کے روٹی کھادی، تے بچے وے پہوریاں نال باراں ٹوکرے وی پہرݨ گئے۔ حضرت پَطرس نا اِقرار کرنا 18 اِک دیہاڑے اِسرح ہویا کہ حضرت عِیسیٰ کہلے دُعا کرنے سݨ تے اُنہاں نے صحابی اُنہاں نے نیہڑے سݨ - فِر حضرت عِیسیٰ اُنہاں کولوں پُچھیا، ”لوک مہاڑے بارے وِچ کَے آخݨے اݨ کہ میں کُݨ آں؟“ 19 اُنہاں جواب دِتا، ”کُجھ آخݨے اݨ کہ ’اے حضرت یحییٰ اݨ‘، کُجھ آخݨے اݨ کہ ’حضرت اِلیاس اݨ‘، تے کُجھ آخݨے اݨ کہ ’پُراݨے زمانے نے نبیاں وِچوں کوئی دوبارہ زِندہ ہوئی گئے اݨ‘۔“ 20 فِر حضرت عِیسیٰ پُچھیا، ”تے تُساں؟ تُساں مہاڑے بارے وِچ کَے آخݨے او کہ میں کُݨ آں؟“ حضرت پَطرس جواب دِتا، ”تُساں اللّٰہ تعالیٰ نے پہیجے وے مسِیح او۔“ 21 اے گل سُݨی کے حضرت عِیسیٰ اُںہاں ساریاں کی بہُوں سَختی نال آخیا، ”اے گل کُسے کی ناں آخو!“ 22 فِر اُنہاں آخیا، ”اے تے لازمی اَے کہ اِبنِ اِنسان یعنی کہ میں دُکھ تے تکلیفاں تکاں، بنی اسرائیلی بڑے بَڈیرے، بڑے مذہبی پیشوا تے عُلمأ لوک مہاڑا اِنکار کرݨ، مِکی مَروائی شوڑݨ تے ترِیئے دیہاڑے اللّٰہ تعالیٰ مِکی زِندہ کری شوڑے۔“ 23 فِر حضرت عِیسیٰ اُنہاں ساریاں کی آخیا، ”جیہڑا کوئی مہاڑا پیروکار بݨنا چاہݨا اے، اُس واسطے ضرُوری اے کہ او اپݨی مرضی چھوڑی کے ہر روز جان نی قُربانی دیݨے واسطے تیار ہوئی کے مہاڑی پیروی کرے۔ 24 کِیئانکہ جیہڑا کوئی اپݨی جان قُربان کرنے تُوں بَچاسی، اُس نی جان ہمیشہ واسطے ضائع ہوئی جاسی۔ تے جیہڑا کوئی مہاڑے واسطے اپݨی جان قُربان کرسی، او اپݨی جان بچاسی۔ 25 فرض کرو کہ کوئی بندہ ساری دُنیا حاصل کری کِہنے، پر اُس نی جان ہی ٹُری جائے، تے اُس کی کے فائدہ ہوسی؟ 26 کِیئانکہ جیہڑا بندہ مہاڑے تُوں تے مہاڑی تعلِیم تُوں شرماسی، اِبنِ اِنسان یعنی کہ میں جدُوں اپݨی شان و شوکت نال تے آسمانی باپ تے پاک فرِشتیاں نی شان و شوکت نال اِس دُنیا وِچ واپس اچھساں، اُس بندے تُوں میں وی شرماساں۔ 27 یقِین کرو کہ تُساں وِچ کُجھ اِتھے اِیئے جہے وی اݨ جیہڑے کہ اُس ویلے تک ناں مرسݨ جدُوں تک او اللّٰہ تعالیٰ نی بادشاہی ناں تکسݨ۔“ حضرت عِیسیٰ نے چہرہ مُبارک اپر نُور آئی جاݨا اے 28 اِنہاں گلاں تُوں تقریباً اَٹّھاں دیہاڑیاں بعد اِسرح ہویا کہ حضرت عِیسیٰ اپݨے نال حضرت پَطرس، حضرت یُوحنّا تے حضرت یعقُوب کی ہِݨی کے اِک پہاڑ اپر دُعا کرنے واسطے گئے۔ 29 جیہڑے ویلے حضرت عِیسیٰ دُعا پئے کرنے سݨ تے اُنہاں نے چہرہ مُبارک نی حالت بدلی گئی، تے اُنہاں نے کپڑے چاندی نی طرح چمکݨ لغی پَے۔ 30 فِر اچانک دو بندے اُتھے آئے، تے حضرت عِیسیٰ نال گلاں کرݨ لغے۔ اے بندے حضرت مُوسیٰ تے حضرت اِلیاس سݨ۔ 31 اے دوئے وی بہُوں شان و شوکت وِچ سݨ، تے حضرت عِیسیٰ نی وفات نے بارے وِچ گلاں پئے کرنے سݨ جیہڑی یرُوشلم شہر وِچ پُوری ہوݨے آلی سی۔ 32 پَطرس تے اُنہاں نے سَنگی سخت نیندراں وِچ سݨ۔ پر او جاگی گئے، تے اُنہاں حضرت عِیسیٰ کی بہُوں شان و شوکت وِچ دوآں بندیاں نال کَھلتیا وا تکیا۔ 33 او دو بندے حضرت عِیسیٰ کولوں جاݨ لغے تے پَطرس آخیا، ”آقا! اے کِتنی خُوشی نی گل اَے، کہ اَساں اِتھے آئی گئے آں! جے کدے تُساں آخو، تے اَساں اِتھے ترَے چھپّر بَݨاں، اِک تُساں واسطے ، اِک حضرت مُوسیٰ واسطے تے اِک حضرت اِلیاس واسطے ۔“ اصل وِچ اُنہاں کی کُجھ پتہ نی سی کہ کَے پئے آخݨے اݨ۔ 34 او اے گلاں پئے کرنے ہی سݨ تے آسمانے وِچ چَہڑ پئی گیا، تے اُنہاں کی کہیری کِہنداس۔ اُس ویلے صحابی بہُوں ڈرے۔ 35 چَہڑے وِچوں اِک آواز آئی، ”اے مہاڑا پُتر اَے، جِسی میں چُنیا اَے۔ اِس نیاں گلاں سُݨو تے مَنّو!“ 36 اِس تُوں بعد صحابیاں تکیا کہ اُتھے صِرف حضرت عِیسیٰ ہی سݨ۔ صحابیاں اے گل اپݨے تک رخی، تے کُجھ عرصے تک اِس واقعے نے بارے وِچ کُسے کی ناں دسیا جیہڑا اُنہاں تکیا سی۔ حضرت عِیسیٰ اِک مُڑے وِچوں جِنّ کڈݨے اݨ 37 اگلے دیہاڑے او پہاڑ اپروں لہئی کے آئے، تے بہُوں سارے لوک حضرت عِیسیٰ کی مِلے۔ 38 اُنہاں وِچوں اِک بندے حضرت عِیسیٰ کی بہُوں فریاداں نال آخیا، ”آقا! مہاڑے پُترے اپر نظرِ کرم کرو! مہاڑا اِک ہی پُتر اَے! 39 کوئی جِنّ اُس کی پغڑی کِہننا اَے، تے مُنڈا چیخاں مارنا اَے۔ جِنّ اُس کی مروڑی کے سَٹݨا اَے، تے اُس نے مونہے وِچوں چَہگ نِکلݨی شرُوع ہوئی جاݨی اَے۔ او جِنّ اُس کی سخت تکلِیف دیݨا اَے، تے بہُوں مُشکِل نال اُس کی چھوڑنا اَے۔ 40 میں تُساں نے صحابیاں اگے جِنّ کَڈھݨے واسطے درخواست کِیتی سی، پر اُنہاں کولوں اے کَم نی ہوئی سکیا۔“ 41 اے گل سُݨی کے حضرت عِیسیٰ آخیا، ”تُساں لوک کِتنے ہی بھٹکے وے او، تے اِیمان تُوں خالی او! میں کدُوں تک تُساں کول ہوساں؟ تے کدُوں تک تُساں نیاں گلاں برداشت کَرساں؟ مُنڈے کی مہاڑے کول آݨو!“ 42 جِس ویلے اُنہاں مُنڈے کی آندا، تے اُس اپر دورہ پئی گیا۔ جِنّے اُس کی پَرَتی کے زِیمی اپر سَٹیا۔ حضرت عِیسیٰ جِنّے کی جھِڑکی کے مُنڈے وِچوں کڈی شوڑیا، تے اُس کی اُسے ویلے ٹھِیک ٹھاک کری کے پِیؤ نے حوالے کِیتا۔ 43 سارے لوک اللّٰہ تعالیٰ نی قُدرت تکی کے حَیران ہوئے۔ لوک حضرت عِیسیٰ نے مُعجزات کی تکی کے حَیرانگی نا اِظہار ہی پئے کرنے سݨ، کہ حضرت عِیسیٰ صحابیاں کی اپݨے بارے وِچ فرمایا، 44 ”مہاڑیاں گلاں غور نال سُݨو! اِبنِ اِنسان کی یعنی کہ مِکی، لوکاں نے حوالے کِیتا جاسی۔“ 45 پر صحابیاں کی سمجھ ناں آئی کہ اِس نا مطلب کَے اَے۔ اے گل اُنہاں کولوں پوشیدہ ہی رہی، اِس واسطے او سمجھی ناں سکے۔ پر او اِس بارے وِچ پُچھݨے تُوں ڈَرنے سݨ۔ بڑے مرتبے آلا کُݨ اَے؟ 46 فِر اِسرح ہویا کہ صحابی اِک دُوئے نال بحث کرݨ لغے، ”اَساں وِچوں بڑے مرتبے آلا کُݨ اَے؟“ 47 حضرت عِیسیٰ اُنہاں نےخیالات کی سمجھی گئے، تے اُنہاں اِک نِکّے بچّے کی پغڑی کے اپݨے کول کھلایا 48 تے آخیا، ”یاد رَخو، جیہڑا بندہ مہاڑے ناں اپر اِیئے جہے بچّے کی قبُول کرنا اَے، اِس نا مطلب اے اَے کہ او مِکی قبُول کرنا اَے۔ تے جیہڑا مِکی قبُول کرنا اَے، حقیقت وِچ او بندہ اُس کی قبُول کرنا اَے جِس مِکی پیہجیا اَے۔ اِس واسطے تُساں وِچ جیہڑا کوئی ناچیز بݨسی، اُس نا مرتبہ بلند اَے۔“ 49 حضرت یوحنّا آخیا، ”حضُور، اَساں اِک اِیئے جہے بندے کی تکیا جیہڑا تُساں نے ناں اپر لوکاں وِچوں جِنّات کڈھݨا سی۔ اَساں اُس بندے کی اِس کمّے تُوں منع کِیتا، کِیئانکہ او اَساں نی جماعت نال نی۔“ 50 حضرت عِیسیٰ اُس کی جواب دِتا، ”اُس کی منع ناں کرو، کِیئانکہ جیہڑا بندہ تُساں نے خِلاف نی، اِس نا مطلب اے اَے کہ او تُساں نے نال اَے۔“ حضرت عِیسیٰ یرُوشلم شہر در روانہ ہوئے اݨ 51 جدُوں او ویلا نیڑے آیا کہ اللّٰہ تعالیٰ حضرت عِیسیٰ کی آسماناں اپر اپݨے کول بُلائی کِہنے، تے حضرت عِیسیٰ پکے اِرادے نال یرُوشلم شہر در ٹُری پئے۔ 52 اُنہاں کُجھ بندے آپے کولوں اَگے پہیجے۔ او جائی کے ریاست سماریہ نے اِک گرآں وِچ پُہنچے، تانکہ حضرت عِیسیٰ نے اچھݨے کولوں پہلے کُجھ تیاری کری کِہنݨ۔ 53 پر اُتھے نے لوک حضرت عِیسیٰ نے اچھݨے اپر خُوش نی سݨ، کِیئانکہ اُنہاں کی یرُوشلم شہر در جاݨا سی ۔ 54 جیہڑے ویلے یعقُوب تے یوحنّا کی اِس گلے نا پتہ لغا، تے اُنہاں حضرت عِیسیٰ کولوں پُچھیا، ”حضُور، کدے تُساں چاہو تے اَساں اِنہاں واسطے بَد دُعا کراں؟ تے اللّٰہ تعالیٰ آسمانے وِچوں اَگ پیجھی کے اِنہاں کی ساڑی سَٹے؟“ 55 پر حضرت عِیسیٰ اُنہاں دَر مُڑے، تے اُنہاں کی جھِڑکیا۔ 56 فِر او کُسے دُوئے گرآں در ٹُری گئے۔ حضرت عِیسیٰ نا پیروکار بݨنے نی قیمت 57 جیہڑے ویلے او راہ وِچ سݨ، تے اِک بندے حضرت عِیسیٰ کی آخیا، ”تُساں جِتھے کُدرے وی جاؤ، میں تُساں نال جُلساں۔“ 58 حضرت عِیسیٰ اُس کی آخیا، ”لُومڑیاں واسطے تے مہور ہوݨے اݨ، تے پرندیاں واسطے آلڑے ہوݨے اݨ، پر اِبنِ اِنسان واسطے یعنی کہ مہاڑے واسطے ، کوئی وی جغہ نی، جِتھے میں آرام تے کری سَکاں۔“ 59 فِر اِسرح ہویا کہ حضرت عِیسیٰ اِک بندے کی آخیا، ”مہاڑے نال آئی جا!“ پر اُس بَندے آخیا، ”حضُور، پہلے مِکی اِجازت دیو تے میں جائی کے اپݨے باپ کی دفنائی اچھاں۔“ 60 حضرت عِیسیٰ اُس کی جواب دِتا، ”تُوں پہلے جائی کے اللّٰہ تعالیٰ نی بادشاہی نے بارے وِچ پَیغام لوکاں کی سُݨا! مُردیاں کی اپݨے مُردے آپوں دفن کرݨ دے۔“ 61 اِک ہور بندے حضرت عِیسیٰ کی آخیا، ”حضُور، میں تُساں نی پیروی ضرُور کَرساں، پر پہلے میں جائی کے اپݨے کہرے آلیاں کولوں اِجازت چاہی کِہناں۔“ 62 حضرت عِیسیٰ اُس کی جواب دِتا، ”جیہڑا بندہ ہَل چلاݨے ویلے پِچھَے مُڑی مُڑی کے تکݨے آلا ہووے، او اللّٰہ تعالیٰ نی بادشاہی وِچ خِدمت کرنے نے قابل نی۔“ |