اِنجِیل شریف (لُوقا) 4 - Mirpuri-Pahari Bibleشیطان حضرت عِیسیٰ کی پہلاݨے نی کوشِش کرنا اے 1 فِر حضرت عِیسیٰ رُوحِ پاک نال پہرے وے دریائے اُردن تُوں واپس مُڑی گئے۔ او رُوحِ پاک نی ہدایت نال چالی دیہاڑے بیابان وِچ رہے، 2 جِتھے شیطان اُنہاں کی بھٹکاݨے نی کوشِش کرݨا رہیا۔ لگاتار چالی دیہاڑے تے چالی راتاں بغَیر کُجھ کھاݨے نے گُزارݨے تُوں بعد حضرت عِیسیٰ کی سخت پُہکھ لغی۔ 3 تے شیطان اُنہاں کول آیا تے آخݨ لغا، ”کدے تُوں اللّٰہ تعالیٰ نا پُتر ایں، تے اِنہاں بٹّیاں کی حُکم کر، تانکہ اے تہاڑے واسطے روٹیاں بݨی جاݨ۔“ 4 حضرت عِیسیٰ جواب دِتا، ”کلامِ مُقدس وِچ لِخیا اَے کہ ’اِنسان صِرف روٹی کھاݨے نال ہی نی زِندہ رہݨا۔‘ “ 5 فِر شیطان، حضرت عِیسیٰ کی اِک بہُوں اُچّے پہاڑ اپر ہِݨی کھڑیا، تے اِک لَمحے وِچ اُنہاں کی دُنیا نیاں ساریاں بادشاہتاں دَسسیاں، 6 تے آخݨ لغا، ”اے سارا کُجھ میں تُکی ہی دیساں، کِیئانکہ اے سَب کُجھ مہاڑے حوالے ہوئی گیا اَے تے میں جِسی چاہاں دیئی سکݨا آں۔ 7 کدے تُوں مہاڑے اگے جُھکیں، مہاڑی تعظیم کریں، تے اے سارا کُجھ میں تُکی دیئی شوڑساں!“ 8 تے فِر حضرت عِیسیٰ اُسی آخیا، ”کلامِ پاک وِچ لِخیا اَے کہ ’صِرف ربّ نے اگے سجدہ کرو جیہڑا تُساں نا خُدا اَے، تے اُسے نی عِبادت کرو۔‘ “ 9 فِر شیطان اُنہاں کی یرُوشلم شہر وِچ بڑے عِبادت خانے نی سب تُوں اُچّی جغہ اپر کھڑیا، تے آخݨ لغا، ”کدے تُوں اللّٰہ تعالیٰ نا پُتر ایں، تے اِتھوں تھَلے چھال مار، 10 کِیئانکہ کلامِ پاک وِچ اے لِخیا اَے، ’اللّٰہ تعالیٰ تُہاڑی حِفاظت کرنے واسطے اپݨے فرِشتیاں کی حُکم کرسی، 11 تے او تُکی اپݨے ہَتھاں وِچ چائی کِہنسݨ، تانکہ تہاڑے پَیراں اپر کُسے بَٹّے نی وی چوٹ ناں لغے۔‘ “ 12 پر حضرت عِیسیٰ آخیا، ”کلامِ پاک وِچ اے وی لِخیا اَے کہ ’تُساں ربّ نا اِمتحان ناں کِہنو، جیہڑا تُساں نا خُدا اَے۔‘“ 13 جیہڑے ویلے شیطان حضرت عِیسیٰ کی سارے طریقیاں نال آزمائی رہیا، تے کُجھ دیر واسطے اُتھوں ٹُری گیا۔ حضرت عِیسیٰ تبلیغ شرُوع کرنے اݨ 14 فِر حضرت عِیسیٰ رُوحِ پاک نی قُدرت نال رنگے وے ریاست گلِیل در واپس ٹُری گئے، تے اُتھے سارے علاقے وِچ اُنہاں نی شُہرت پھیلی گئی۔ 15 اُتھے حضرت عِیسیٰ بنی اِسرائیلی عِبادت خانیاں وِچ تعلِیم دیݨے ہوݨے سݨ، تے سارے لوک اُنہاں نی بہُوں تعرِیف کرنے ہوݨے سݨ۔ 16 حضرت عِیسیٰ ناصرت شہر گئے جِتھے اُنہاں نی پرورِش ہوئی سی، تے اپݨے رواج نے مطابق اِک واری ہفتے آلے مُبارک دیہاڑے او عِبادت خانے وِچ کلامِ مُقدس نی تِلاوت کرنے واسطے کَھلتے۔ 17 اُنہاں کی حضرت یسعیاہ نا صحِیفہ دِتا گیا۔ اُنہاں صحِیفے وِچوں او جغہ کَڈی جِتھے لِخیا سی، 18 ’اللّٰہ تعالیٰ نا رُوحِ پاک مہاڑے اپر اَے، کِیئانکہ اُس مِکی خاص طور اپر چُݨیا اے تانکہ میں غریباں کی خُوشی نی خبر سُݨاں۔ اُس مِکی پہیجیا اے تانکہ قیدیاں کی رِہائی نا تے اَنّہیاں کی بینائی نا پَیغام سُݨاں۔ مِکی اِس واسطے وی پہیجیا گیا اَے کہ مظلُوماں کی ظُلم تُوں چھڑاں، 19 تے اِس گل نی خبر دیاں کہ او ویلا آئی گیا اے جدُوں اللّٰہ تعالیٰ اپݨے بندیاں اپر فضل کرسی۔‘ 20 فِر حضرت عِیسیٰ صحِیفہ بند کری کے عِبادت خانہ نے خادم کی دیئی شوڑیا، تے اپݨی جغہ جائی کے بہی گئے۔ جِتنے لوک عِبادت خانے وِچ سݨ، او سارے اُنہاں کی حیرت نال تکݨ لغے۔ 21 فِر حضرت عِیسیٰ آخیا، ”کلامِ پاک نیاں اے گلاں اَج تُساں نے سامݨے پُوریاں ہوئی گئیاں اݨ۔“ 22 سارے لوکاں اپر اُنہاں نے پیارے کلام نا بہُوں چنگا اَثر ہویا، تے او تعرِیف کری کے آخݨ لغے، ”اے او ہی نی؟ جیہڑا یُوسف نا پُتر اَے۔“ 23 پر حضرت عِیسیٰ اُنہاں کی آخیا، ”مہاڑا خیال اَے تُساں اے آخݨا چاہݨے او، ’حکِیم صاحب! پہلے آپݨا تے علاج کرو! او مُعجزے ذرا اِتھے وی کری کے دسو نا، جنہاں نے بارے وِچ مَشہُوری ہوئی اَے کہ تُساں کَفَر نَحُوم شہر وِچ کِیتے اݨ!‘“ 24 حضرت عِیسیٰ آپݨی گل جاری رخی کے آخیا، ”اے گل سَچ ہی اَے کہ کُسے وی نبی نی اپݨے عِلاقے وِچ قدر نی ہوݨی۔“ 25 فِر اُنہاں آخیا، ”یاد رَخو جِس طرح حضرت اِلیاس نے زمانے وِچ جیہڑے ویلے ساڈھے ترَے سال تک بارش نی ہوئی سی تے سارے مُلخے وِچ سخت قحط پیا سی، بنی اِسرائیل وِچ بہُوں ساریاں بیوہ عورتاں وی سݨ۔ 26 پر فِر وی اللّٰہ تعالیٰ حضرت اِلیاس کی اُنہاں کول نی سی پہیجیا، بلکہ اِک غیر بنی اِسرائیلی بیوہ عورت کول پہیجیا سی جیہڑی ریاست صَیدا نے شہر صارپت وِچ رہݨی سی۔ 27 اِسرح حضرت اَلِیشع نبی نے زمانے وِچ بنی اِسرائیل نے مُلخے وِچ وی بہُوں لوک کوہڑ نا شِکار ہوئے وے سݨ، پر اُنہاں وِچوں کُسے کی وی شِفا نی سی لبھی، صِرف شام نے مُلخے نے نُعمان کی شِفا لبھی سی۔“ 28 اے گلاں سُݨی کے عِبادت خانے وِچ جِتنے لوک سݨ اُنہاں ساریاں کی بہُوں غُصہ چَڑھیا۔ 29 او سارے اُٹھے، تے حضرت عِیسیٰ کی شہر تُوں باہر کڈی کے اُس پہاڑ اپر ہِݨی گئے جِس اپر اُنہاں نا شہر آباد سی، تانکہ اُنہاں کی اُتھوں تھَلے سَٹݨ۔ 30 پر او لوکاں نے درمیان وِچوں ٹُری گئے۔ حضرت عِیسیٰ اِک بندے وِچوں جِنّ کڈݨے اݨ 31 اِس تُوں بعد حضرت عِیسیٰ ریاست گلِیل نے شہر کَفَر نَحُوم ٹُری گئے۔ اُتھے او ہفتے آلے مُبارک دیہاڑے تعلِیم دیݨ لغے۔ 32 لوکاں اپر اُنہاں نی تعلِیم نا بہُوں اَثر ہویا کِیئانکہ او صاحبِ اِختیار بندے نی حثیت نال بیان کرنے سݨ۔ 33 اُتھے بنی اِسرائیل نے عِبادت خانے وِچ اِک اِیئے جہیا بندہ سی جِس وِچ جِنّ سی۔ او زورے نال چیخیا، 34 ”او عِیسیٰ ناصری! تُوں اَساں کولوں کَے لوڑنا ایں؟ کَے تُوں اَساں کی تباہ کرنے واسطے آیا ایں؟ میں تُکی سیاݨنا آں تُوں کُݨ ایں، تُوں تے اللّٰہ تعالیٰ نا پہیجیا وا قُدُوس ایں!“ 35 پر حضرت عِیسیٰ اُس جِنّے کی سختی نال حُکم دِتا، ”چُپ ہوئی جا! تے اِس بندے وِچوں نِکلی جا!“ جِنّے اُس بندے کی ساریاں لوکاں نے سامݨے زِیمی اپر ٹہائی سَٹیا، تے اُس وِچوں نِکلی گیا، پر اُس کی کوئی نُقصان نی پُہنچایا۔ 36 اے گل تکی کے سارے لوک حَیران ہوئے، تے اِک دُوئے کی آخݨ لغے، ”اے بہُوں پُہنچی وی ہستی اَے! اے جِنّات کی حُکم کرݨا اَے، تے او اِس نا حُکم مننے اݨ!“ 37 اِس گلے تُوں حضرت عِیسیٰ اُس سارے علاقے وِچ مشہُور ہوئی گئے۔ حضرت عِیسیٰ بہُوں سارے بیمار لوکاں کی شِفأ دیݨے اݨ 38 فِر حضرت عِیسیٰ عِبادت خانے تُوں نِکلی کے حضرت شمعُون نے کہار گئے۔ اُتھے شمعُون نی سَس صاحبہ کی سخت تاپ چَڑھیا سی۔ اُنہاں حضرت عِیسیٰ کی آخیا، ”مِہربانی کری کے اِنہاں واسطے کُجھ کرو۔“ 39 حضرت عِیسیٰ اُس مائی کول گئے، تے تاپے کی حُکم دِتا۔ تاپ اُسے ویلے لہئی گیا، تے مائی اُسے ویلے اُٹھی کے اُنہاں لوکاں نی خِدمت خاطر کرن لغی۔ 40 نماشاں ویلے لوکاں اپݨے کَہراں وِچوں ہر قِسم نے مریض حضرت عِیسیٰ کول ہِݨی آندے، تے اُنہاں ہر مریض اپر اپݨا ہتھ مُبارک رخی کے شِفأ دِتی۔ 41 اُنہاں بہُوں سارے لوکاں وِچوں جِنّات وی کَڈھے۔ او نِکلݨے ویلے چِیخی چِیخی کے آخݨے سݨ، ”تُوں اللّٰہ تعالیٰ نا پُتر ایں!“ پر حضرت عِیسیٰ اُنہاں کی ڈَکی شوڑیا تے فِر او چُپ ہوئی گئے، کِیئانکہ اُنہاں کی پتہ سی کہ او اللّٰہ تعالیٰ نے پہیجے وے مسِیح اݨ۔ 42 اگلے دیہاڑے صبح سویرے حضرت عِیسیٰ اُتھوں نِکلی کے اِک ویران جغہ وِچ ٹُری گئے۔ بہُوں سارے لوک اُنہاں کی لوڑݨے رہے، تے آخرکار او اُنہاں کی لبھی گئے۔ لوکاں حضرت عِیسیٰ کی روکݨے نی بہُوں کوشِش کِیتی تانکہ اُنہاں کی چھوڑی کے کُدرے ناں جاݨ۔ 43 پر حضرت عِیسیٰ اُنہاں کی آخیا، ”دُوئے گَرانواں تے شہراں وِچ جائی کے اللّٰہ تعالیٰ نی بادشاہی نے بارے وِچ خُوشی نی خبر سُݨاݨا وی ضرُوری اَے، کِیئانکہ اِسے مقصد واسطے اللّٰہ تعالیٰ مِکی پہیجیا اے۔“ 44 اِس واسطے او سارے مُلخے وِچ جائی کے اللّٰہ تعالیٰ نا پَیغام بنی اِسرائیل نے ساریاں عِبادت خانیاں وِچ سُݨاݨے رہے۔ |