اِنجِیل شریف (لُوقا) 3 - Mirpuri-Pahari Bibleحضرت یحییٰ نا تبلیغ کرنا 1 فِر اِسرح ہویا کہ جِس ویلے رُومی شہنشاہ جناب قیصر تِبرِیُس نی حکُومت نا پندرہواں سال سی، جناب پَنطیُس پیلاطُس ریاست یہُودیہ نا گورنر سی، جناب ہَیرودیس ریاست گلِیل نا حکمران سی، ہَیرودیس نا پَہرآ جناب فِلپُّس ریاست اِتُوریہ تے ریاست ترخونیتِس نا حکمران سی، تے جناب لِسانیاس صاحب ریاست اَبِلینے نا حکمران سی۔ 2 اُنہاں دیہاڑیاں وِچ دو بڑے مذہبی پیشوا سݨ، اِک جناب حَنّاہ صاحب تے دُوئے جناب کائفا صاحب۔ اُس ویلے حضرت زکریاہ نے پُتر حضرت یحییٰ اپر اِک بیابان جغہ وِچ اللّٰہ تعالیٰ نی طرفوں وَحی نازل ہوئی۔ 3 فِر او دریائے اُردن نے دوآں پاسیاں نے علاقے وِچ جائی کے لوکاں کی اِسرح اللّٰہ تعالیٰ نا پَیغام دیݨا شرُوع ہوئی گئے، ”اپݨے غُناہواں تُوں توبہ کرو! تے اُس نی نِشانی نے طور اپر مہاڑے کول آئی کے پاک غُسل کراؤ، تانکہ اللّٰہ تعالیٰ تُساں نے غُناہ مُعاف فرمائے!“ 4 اے گل اُسرح ہی ہوئی جِسرح اللّٰہ تعالیٰ اپݨے نبی حضرت یسعیاہ نی کِتاب وِچ فرمائی اَے، ”بیابان وِچ کوئی بُلاݨا پیا اَے، ’مالک واسطے راہ تیار کرو، تے اُس نا راہ سِدھا بݨاؤ۔ 5 ساریاں وادیاں پَہریاں جاسݨ، تے سارے پہاڑ تے ساریاں پہاڑیاں ٹہی جاسݨ۔ جیہڑے ڈِنگے تَریڈے راہ اݨ، اُنہاں کی سِدھا کِیتا جاسی۔ جیہڑے اُچے نیوے راہ اݨ، اُنہاں کی وی ہموار بݨایا جاسی۔ 6 تے ساری دُنیا اللّٰہ تعالیٰ نی طرفوں پہیجی وی نجات تکسی۔‘“ 7 جیہڑے ویلے بہُوں سارے لوک حضرت یحییٰ کول پاک غُسل کرواݨے واسطے آئے، تے حضرت یحییٰ فرمایا، ”اَے مَکّارو ! تُساں کی کِس آخیا اَے کہ اچھݨے آلے قَہرے کولوں نسی سکسو؟ 8 ہُݨ تُساں اِیئے جہے کم کرو جِنہاں تُوں ثابت ہووے کہ تُساں واقعی توبہ کِیتی اَے۔ اپݨے دِلاں وِچ اے گل ناں آخو، ’اَساں حضرت اِبراہِیم نی اولاد آں‘۔ میں تُساں کی پُورے یقِین نال اے گل آخݨا آں کہ اللّٰہ تعالیٰ چاہݨا تے اِنہاں بَٹّیاں تُوں وی حضرت اِبراہِیم واسطے اولاد پیدا کری سکݨا اَے! 9 خبردار! کوہاڑی بُوٹیاں کی مُنڈھوں ٹُکݨے واسطے تیار اَے۔ ہر اُس بُوٹے کی کپی کے اگی وِچ سٹیا جاسی جِس نا پھل چَنگا ناں ہوسی۔“ 10 تے فِر لوکاں حضرت یحییٰ کولوں پُچھیا، ”اَساں کی کے کرنا چاہی نا اَے؟“ 11 اُنہاں فرمایا، ”جِس کول کپڑیاں نے دو جوڑے ہوݨ، اُس کی چاہی نا اَے کہ اِک اُس بندے کی دَے جِس کول کُجھ نی۔ اِسرح جِس کول کھاݨے نا سامان ہووے، اُس کی وی اِسرح ہی کرنا چاہی نا اَے۔“ 12 ٹیکس کِہننے آلیاں وِچوں کُجھ لوک پاک غُسل کرواݨے واسطے حضرت یحییٰ کول آئے۔ اُنہاں پُچھیا، ”حضُور، اَساں کی کَے کرنا چاہی نا اَے؟“ 13 حضرت یحییٰ فرمایا، ”جِتنا ٹیکس گورنمنٹ لایا ہووے، اُتنا ہی کِہنو۔ اُس کولوں زیادہ ناں کِہنو۔“ 14 کُجھ سِپاہیاں پُچھیا، ”تے اَساں؟ اَساں کی، کَے کرنا چاہی نا اَے؟“ حضرت یحییٰ جواب دِتا، ”کُسے اپر چُوٹھا اِلزام ناں لاؤ، تے ناں ہی رِشوت کِہنی کے ظُلم کرو۔ صِرف اپݨی تنخواہ اپر راضی رہو۔“ 15 اُس ویلے لوک اللّٰہ تعالیٰ نے پہیجے وے مسِیح نے اِنتظار وِچ سݨ۔ اِس واسطے او سوچݨ لغے کہ، ”حضرت یحییٰ المسیح اݨ یا نی؟“ 16 پر حضرت یحییٰ اُنہاں کی آخیا، ”میں تے تُساں کی صِرف پاݨِیئے نال پاک غُسل کراݨا آں۔ لیکِن او جیہڑا اچھݨے آلا اَے، او مہاڑے تُوں رُتبے وِچ اِتنا بڑا اَے کہ میں اُس نیاں جُتیاں نے تسمے کھولݨے نے قابل وی ناں۔ او تُساں کی رُوحِ پاک تے آگی نال پاک غُسل کراسی۔ 17 کݨک چھاݨے نی ترِنگل اُس نے ہَتھے وِچ اَے، تانکہ او داݨیاں کی پہوئے وِچوں الگ کرے۔ او کݨکاں کی اپݨے گودام وِچ جمع کرسی، پر پہوئے کی اِیئَے جہئی اگی وِچ باسی جیہڑی کَدے نی بُجھݨ لغی۔“ 18 حضرت یحییٰ اِسرح ہور بہُوں ساریاں گلاں کری کے لوکاں کی نصیحت کرنے رہے، تے اللّٰہ تعالیٰ نی خُوشی نی خبر اُنہاں کی سُݨاݨے رہے۔ 19 پر اُنہاں ریاست گلِیل نے حُکمران ہیرودیس کی بہُوں ڈانٹیا سی، کِیئانکہ اُس اپݨی پَرجہائی کی اپݨے کہار وِچ ناجائز طور اپر رَخیا سی تے ہور وی کئی بُرے کَم کِیتے وے سݨ۔ 20 ہیرودیس اِک غلط کَم اے وی کِیتا کہ حضرت یحییٰ کی قید کروائی شوڑیا۔ حضرت عِیسیٰ نا پاک غُسل کرواݨا تے اُنہاں نا شجرہ نسب 21 اِس تُوں پہلے اِک دیہاڑے اِسرح ہویا سی کہ حضرت یحییٰ بہُوں ساریاں لوکاں کی پاک غُسل کروایا، تے حضرت عِیسیٰ کی وی پاک غُسل کروایا۔ جیہڑے ویلے حضرت عِیسیٰ دُعا کرنے پئے سݨ تے اُنہاں اپر آسمان نے پردے کُھلی گئے۔ 22 رُوحِ پاک کبُوتر نی صُورت وِچ اُنہاں اپر نازِل ہوئی۔ اُسے ویلے آسمان وِچوں اے آواز وی آئی، ”تُوں مہاڑا پیارا پُتر ایں، جیہڑا کہ مِکی بہُوں چنگا لغݨا۔“ 23 جِس ویلے حضرت عِیسیٰ دعوت و تبلیغ نا کَم شرُوع کِیتا، تے او تقریباً ترِیئاں سالاں نے سݨ۔ لوک اُنہاں کی یُوسف نا پُتر ہوݨے نی حیثیّت نال سیاݨنے سݨ۔ یُوسف، ایلی نا پُتر سی، 24 ایلی متّات نا پُتر، متّات لاوی نا پُتر، لاوی مَلکی نا پُتر، مَلکی ینّا نا پُتر، ینّا یُوسف نا پُتر، 25 یُوسف متتیاہ نا پُتر، متتیاہ عامُوس نا پُتر، عامُوس ناحُوم نا پُتر، ناحُوم اَسلیاہ نا پُتر، اَسلیاہ نوگہ نا پُتر، 26 نوگہ ماعت نا پُتر، ماعت متّات نا پُتر، متّات شَمع نا پُتر، شَمع یوسیخ نا پُتر، یوسیخ یہُوداہ نا پُتر، 27 یہُوداہ یوحنا نا پُتر، یوحنا روشی نا پُتر، روشی زَربابل نا پُتر، زَربابل شیلا نا پُتر، شیلا نیئر نا پُتر، 28 نیئر مَلک نا پُتر، مَلک عدِیل نا پُتر، عدِیل قاسم نا پُتر، قاسم المُودام نا پُتر، المُودام عیر نا پُتر، 29 عیر یُوشَع نا پُتر، یُوشَع علی عزر نا پُتر، علی عزر یُورام نا پُتر، یُورام متّات نا پُتر، متّات لاوی نا پُتر، 30 لاوی شمعُون نا پُتر، شمعُون یہُوداہ نا پُتر، یہُوداہ یُوسف نا پُتر، یُوسف یُونس نا پُتر، یُونس قیّوم نا پُتر، 31 قیّوم میلیاہ نا پُتر، میلیاہ مَنّان نا پُتر، مَنّان متتاہ نا پُتر، متتاہ ناتن نا پُتر، ناتن حضرت داؤد نا پُتر، 32 حضرت داؤد یَسّی نے پُتر، یَسّی عُبَید نا پُتر، عُبَید بوعز نا پُتر، بوعز سَلمان نا پُتر، سَلمان نَحسُون نا پُتر، 33 نَحسُون عَمی نداب نا پُتر، عَمی نداب اَدمِین نا پُتر، اَدمِین آرنی نا پُتر، آرنی حَصرون نا پُتر، حَصرون فارِص نا پُتر، فارِص یہُوداہ نا پُتر، 34 یہُوداہ حضرت یعقُوب نا پُتر، حضرت یعقُوب حضرت اِسحاق نے پُتر، حضرت اِسحاق حضرت اِبراہِیم نے پُتر، حضرت اِبراہِیم تارَح نے پُتر، تارَح نَحُور نا پُتر، 35 نَحُور سِراج نا پُتر، سِراج رَعو نا پُتر، رَعو فَلَج نا پُتر، فَلَج عِبر نا پُتر، عِبر صالِح نا پُتر، 36 صالِح قینان نا پُتر، قینان اَرفیکسَد نا پُتر، اَرفیکسَد سام نا پُتر، سام حضرت نُوح نا پُتر، حضرت نُوح لامَک نے پُتر، 37 لامَک متوصلاح نا پُتر، متوصلاح حنُوک نا پُتر، حنُوک یارِد نا پُتر، یارِد مَہلَل ایل نا پُتر، مَہلَل ایل قینان نا پُتر، 38 قینان اَنوش نا پُتر، اَنوش شِیث نا پُتر، تے شِیث حضرت آدم نا پُتر سی، تے حصرت آدم نی تَخلیق اللّٰہ پاک آپوں کِیتی سی۔ |