اِنجِیل شریف (لُوقا) 20 - Mirpuri-Pahari Bibleحضرت عِیسیٰ نے اختیار نے بارے وِچ سوال 1 اِک دیہاڑے اِسرح ہویا کہ حضرت عِیسیٰ بڑے عِبادت خانے وِچ پئے بنی اسرائیلی لوکاں کی تعلِیم دیݨے تے اللّٰہ تعالیٰ نی خُوشی نی خبر سُݨاݨے سݨ۔ بڑے مذہبی پیشوا، شرِیعت نے عالم تے بڑے بَڈیرے حضرت عِیسیٰ کول آئی گئے۔ 2 او آخݨ لغے، ”دسو! تُساں کیہڑے اِختیار نال اے سارے کم کرنے او؟ کُس تُساں کی اے اِختیار دِتا؟“ 3 حضرت عِیسیٰ اُنہاں کی جواب دِتا، ”میں وی تُساں کولوں اِک گل پُچھݨا چاہݨا آں۔ تُساں مِکی اے دَسّو، 4 حضرت یحییٰ کی لوکاں نا پاک غُسل کرنے نا اِختیار کُتھوں لبھا سی؟ اللّٰہ تعالیٰ کولوں یا کہ کُسے بندے کولوں؟“ 5 اے گل سُݨی کے او لوک اِک دُوئے نال بحث کرن لغے، ”اَساں کَے آخاں؟ کدے اَساں اے گل آخاں کہ ’او اللّٰہ تعالیٰ نی طرفوں سی‘ تے اے آخسی، ’فِر تُساں یحییٰ اپر اِیمان کِیئاں نی سی آندا؟‘ 6 پر جے کدے اَساں اے آخاں، ’کُسے بندے نی طرفوں‘ تے اَساں کی عوام بٹّیاں نال ماری شوڑسی، کِیئانکہ لوک سارے تے یحییٰ کی اللّٰہ تعالیٰ نا پیغمبر مننے اݨ۔“ 7 اس واسطے اُنہاں جواب دِتا، ”اَساں کی نی پتہ اُسی پاک غُسل کرنے نا اِختیار کُتھوں لبھا سی۔“ 8 تے فِر حضرت عِیسیٰ آخیا، ”میں وی تُساں کی ناں دَسݨا کہ اے کم میں کِس نے دِتے وے اِختیار نال کرنا آں۔“ ظالِم مزاریاں نی مِثال 9 فِر حضرت عِیسیٰ اُنہاں کی اِک مِثال دیئی کے آخیا، ”اِک زمِیندارے انگُوراں نا باغ لایا تے اُسی ٹھیکے اپر مزاریاں نے حوالے کری کے آپوں کافی سارے عرصے واسطے کُدرے دُور ٹُری گیا۔ 10 جِس ویلے انگُور نا موسم آیا تے مالکے اپݨے اِک نوکر کی باغے در پہیجیا تانکہ مزاریاں کولوں اُس نا حِصّہ ہِݨی آݨے۔ پر مزاریاں اُس نے نوکرے کی پغڑی کے ماریا کُٹیا تے خالی ہتھ اُسی موڑی پہیجھی شوڑیا۔ 11 فِر مالکے اِک ہور نوکرے کی پہیجیا۔ مزاریاں اُسی وی ماری کُٹی کے بے عِزت کِیتا تے خالی ہتھ پہیجھی شوڑیا۔ 12 فِر مالکے ترِیئے نوکرے کی پہیجیا۔ مزاریاں اُسی وی زخمی کری کے باغے وِچوں چائی کے باہر سٹی شوڑیا۔ 13 آخر اپر مالکے سوچیا، ’میں کَے کراں؟ اِسرح کراں کہ اپݨے لاڈلے پُترے کی پہیجاں، شاید او اِس نا لحاظ کرݨ۔‘ 14 پر جیہڑے ویلے مزاریاں مالکے نے پُترے کی تکیا تے اِک دُوئے کی آخݨ لغے، ’اے ہی اَے وَے جیہڑا اِس باغے نا وارِث اَے۔ اچھو، اَساں اِس کی ماری شوڑاں تانکہ باغ اَساں نا ہوئی جائے۔‘ 15 اِس واسطے اُنہاں اُس اپر حملہ کِیتا تے اُسی باغے تُوں باہر سٹی کے قتل کری شوڑیا۔“ مِثال ختم کری کے حضرت عِیسیٰ پُچھیا، ”ہُݨ تُساں دَسو، باغے نا مالک اُنہاں مزاریاں نال کَے سلُوک کرسی؟ 16 او اچھی کے اُنہاں کی ماری شوڑسی تے باغے کی ہور مزاریاں نے حوالے کرسی۔“ اے گل سُݨی کے لوکاں آخیا، ”اللّٰہ ناں کَرے کدے وی اِیئے جہیا ہووے!“ 17 حضرت عِیسیٰ اُنہاں کی تکی کے آخیا، ”فِر کلامِ پاک نی اِنہاں آیتاں نا مطلب کَے اَے؟ ’جیہڑا بٹّہ مِستریاں بیکار سمجھی کے رد کِیتا سی، او ہی بٹّہ ساریاں کولوں اہم ثابت ہویا۔‘ 18 جیہڑا کوئی اُس بَٹّے اپر ٹہیسی او زخمی ہوسی، تے جِس اپر او بٹّہ ٹہی کے لغسی او پِیٹھا جاسی۔“ 19 جِس ویلے شرِیعت نے عالماں تے بڑے مذہبی پیشوانواں حضرت عِیسیٰ نیاں اے گلاں سُݨیاں، تے او اے ساریاں گلاں اُنہاں نے خِلاف ہی پئیاں ہوݨیاں اݨ۔ اِس واسطے او اُسے ہی ویلے حضرت عِیسیٰ کی پغڑی کے بَݨنا چاہݨے سݨ، پر لوکاں کولوں ڈرنے سݨ۔ ٹیکس دیݨے نے بارے وِچ سوال 20 فِر او موقعے نی تلاش وِچ سݨ، تے اُنہاں کُجھ جاسُوس پہیجے تانکہ حضرت عِیسیٰ نے پیروکار بݨی کے اُنہاں کی کُسے گلے وِچ پَھساݨ تے رُومی گورنر نے حوالے کرݨ۔ 21 جاسُوس لوکاں جائی کے حضرت عِیسیٰ کی آخیا، ”حضرت! اَساں کی پتہ اَے کہ جیہڑا کُج تُساں سِخاݨے تے آخݨے او، او سارا صحِیح اے۔ تُساں سچائی نال اللّٰہ تعالیٰ نے دسے وے طرِیقے اپر چلݨے نی تعلِیم دیݨے او۔ تے کُسے بندے کولوں یا اُس نے عُہدے کولوں نی ڈَرنے او۔ 22 اَساں کی دَسّو کہ رُومی بادشاہ اگے ٹیکس دیݨا جائِز اَے یا نی؟“ 23 پر حضرت عِیسیٰ اُنہاں نی چالاکی کی سمجھی گئے، اِس واسطے اُنہاں آخیا، 24 ”ذرا مِکی سِکہ دَسّو۔ اِس اپر تصوِیر کُس نی اَے؟ تے ناں کُس نا لِخیا اے؟“ لوکاں جواب دِتا، ”رُومی بادشاہ نی۔“ 25 تاں فِر حضرت عِیسیٰ آخیا، ”جیہڑی چِیز رُومی بادشاہ نی اَے، او اُسی دیو۔ تے جیہڑی چِیز اللّٰہ تعالیٰ نی اَے، او اُسی دیو!“ 26 اے گل سُݨی کے جاسُوس حیران ہوئے تے اُنہاں نے مونہ بند ہوئی گئے، کِیئانکہ او لوکاں نے سامݨے حضرت عِیسیٰ کی اپݨی گل وِچ ناں پھسائی سکے۔ مرنے تُوں بعد زِندہ ہوݨے نا سوال 27 فِر اِسرح ہویا کہ کُجھ صدُوقی فِرقے نے لوک حضرت عِیسیٰ کول آئے، جِنہاں نے اِیمان نے مطابق لوک مرنے تُوں بعد فِر زِندہ ناں کِیتے جاسݨ۔ اُنہاں آخیا، 28 ”حضُور! حضرت مُوسیٰ آخیا سی، ’کدے کوئی بندہ بے اولاد مری جائے، تے اُس نا پہرآ اُس نی بیوہ نال بیاہ کرَے تے اولاد پَیدا کرَے، تانکہ اُس بندے نی نَسل قائم رہے۔‘ 29 گل اے اَے کہ کُسے جغہ ست پہرآ سݨ۔ ساریاں وِچوں بڑے پہراؤ بیاہ کِیتا تے بے اولاد مری گیا۔ 30 اُس نے دُوئے پہراؤ اُس نی بیوہ نال بیاہ کِیتا۔ 31 اِسے طرح دُوئے نے مرنے تُوں بعد ترِیئے پہراؤ بیاہ کِیتا تے آخرکار ستویں پہراؤ وی اُس بیوہ جناݨی نال بیاہ کِیتا تے بے اولاد ہی مری گیا۔ 32 اِس تُوں بعد جناݨی وی مری گئی۔ 33 ہُݨ تُساں اَساں کی دَسّو کہ قیامت آلے دیہاڑے جِس ویلے اللّٰہ تعالیٰ ساریاں لوکاں کی زِندہ کرسی، او جناݨی سَتاں پہراواں وِچوں کُس نی بِیوی سمجھی جاسی؟ کِیئانکہ ساریاں واری واری اُس نال بیاہ کِیتا سی۔“ 34 حضرت عِیسیٰ اُنہاں کی جواب دِتا، ”اِس دُنیا وِچ لوک بیاہ شادی کرنے اݨ۔ 35 پر جدُوں لوکاں کی مرنے تُوں بعد اگلے جہان وِچ دُوئی واری زِندہ کِیتا جاسی اُس ویلے شادی بیاہ نی ہوݨ لغا، 36 بلکہ او فرِشتیاں نی طرح ہوسݨ تے فِر اُنہاں اپر موت وی نی اچھݨ لغی۔ او اللّٰہ تعالیٰ نے چُݨے وے بندے ہوسݨ، کِیئانکہ اللّٰہ تعالیٰ اُنہاں کی نوِی زِندگی دِتی وی ہوسی۔“ 37 فِر حضرت عِیسیٰ آخیا، ”اگر تُساں نا سوال اے اَے کہ مُردے زِندہ کِیتے جاسݨ یا نی، تے اُس نے بارے وِچ حضرت مُوسیٰ وی اے ظاہر کِیتا سی جِس ویلے اگ بلݨے آلی جھاڑی نے واقعے اپر اللّٰہ تعالیٰ فرمایا، ’میں اِبراہِیم، اِسحاق تے یعقُوب نا خُدا آں۔‘ 38 اِس نا مطلب اے اَے کہ او مویاں نا نی، بلکہ جِیݨیاں نا خُدا اَے، کِیئانکہ اُس نے نزدِیک تے سارے جِیݨے اݨ۔“ 39 اے گل سُݨی کے شرِیعت نے کُجھ عالماں آخیا، ”حضرت، تُساں بہُوں سوہݨا جواب دِتا!“ 40 اُس دیہاڑے تُوں بعد کُسے کی وی جُرأت نی ہُوئی جے او حضرت عِیسیٰ کی گلاں وِچ پَھسائے۔ المسِیح نے بارے وِچ سوال 41 فِر حضرت عِیسیٰ اُنہاں کی آخیا، ”کوئی کِسرح آخی سکݨا کہ اللّٰہ تعالیٰ نے پہیجے وے مسِیح حضرت داؤد نی نَسلاں وِچوں ہوسݨ؟ 42 کِیئانکہ حضرت داؤد تے آپوں زبُور نی کِتاب وِچ فرمایا سی، ”اللّٰہ تعالیٰ مہاڑے آقا کی آخیا اَے، ’تُوں مہاڑے سجّے پاسے بیہی جا، 43 جِس ویلے تک میں تہاڑے دُشمݨاں کی تہاڑے پیراں تھَلے ناں کری شوڑساں۔‘ 44 ہُݨ تُساں ہی دَسّو کہ حضرت داؤد تے آپوں اُس کی اپݨا آقا پئے آخݨے اݨ۔ او اُنہاں نا وارِث تے آقا اِک وقت کِسرح ہوئی سکݨا اَے؟“ شرِیعت نے عالماں تُوں ہوشیار رہݨا 45 جیہڑے ویلے سارے لوک حضرت عِیسیٰ نیاں گلاں سُݨنے پئے سݨ تے اُنہاں اپݨے صحابیاں کی آخیا، 46 ”شرِیعت نے عالماں تُوں بچی کے رہو جیہڑے لَمّے لَمّے چُغے لائی کے پِھرنا پسند کرنے اݨ۔ اے چاہݨے اݨ کہ لوک بازاراں تے گلیاں وِچ اِنہاں کی بہُوں ہی اَدب نال سَلام کریا کرݨ۔ دَعوت آلے کہراں تے عِبادت خانیاں وِچ اے ساریاں کولوں چَنگی جغہ اپر بَیہݨا پسند کرنے اݨ۔ 47 اے بیوَاں مَسکِیناں نے کَہراں اپر قبضہ کری کِہننے اݨ تے لوکاں کی دَسݨے واسطے لَمیاں لَمیاں دُعاواں کرنے اݨ۔ اِنہاں کی زیادہ سزا لبھسی!“ |