اِنجِیل شریف (لُوقا) 17 - Mirpuri-Pahari Bibleغُناہ 1 فِر حضرت عِیسیٰ اپݨے صحابیاں کی آخیا، ”بیشک اِیئے جہیاں گلاں ہوسݨ جِنہاں نی وجہ تُوں لوک غُناہ کرسݨ، پر اُس بندے اپر اَفسوس! جِس نے ذرِیعے اِیئے جہیاں گلاں ہوسݨ۔ 2 اُس بندے واسطے بہتر اَے کہ اُس نے گلے وِچ چَکّی نا پُڑ بائی کے اُسی سمُندر وِچ سَٹیا جائے، جیہڑا کوئی اِنہاں لوکاں وِچوں جیہڑے مہاڑے اپر اِیمان آݨنے اݨ، کُسے اِک کولوں وی غُناہ کروائے۔ 3 اِس واسطے خبردار رہو! کَدے تُساں نے کُسے اِیماندار پہراؤ کولوں کوئی غُناہ ہوئی جائے، تے اُسی چَنگے طرِیقے نال سَمجھاؤ۔ تے کَدے او توبہ کرے، اُسی معاف کری شوڑو۔ 4 بلکہ کدے او دیہاڑی وِچ ست واری وی تُساں نال غُناہ کرَے تے او ہر واری اچھی کے تُساں کولوں مُعافی مَنگے، اُسی لازمی مُعاف کرو۔“ اِیمان 5 صحابیاں حضرت عِیسیٰ کی آخیا، ”اَساں نا اِیمان بڑا کری شوڑو!“ 6 حضرت عِیسیٰ جواب دِتا، ”کدے تُساں وِچ رائی نے داݨے نے برابر وی اِیمان ہووے، تے تُساں اِس تُوتے نے بُوٹے کی آخی سکݨے او، ’اِتھوں نِکلی کے سمندر وِچ لغا جا!‘، تے اے ضرُور تُساں نا حُکم مَنسی۔“ مالِک تے نوکر نی مِثال 7 ”فرض کرو کہ تُساں وِچوں کُسے نا نوکر ہَل ماری کے یا پہیڈاں بکریاں چَرائی کے اچھے، تے کَے تُساں اُسی آخسو، ’اچھی کے فَٹا فَٹ کھاݨا کھا‘؟ 8 بِلکل ناں! بلکہ تُساں آخسو، ’مہاڑے واسطے کھاݨا تیار کر! تے جِس ویلے تک میں کھاݨے پِیݨے دَروں فارغ ناں ہوݨا مہاڑی خِدمت کر، فِر اِس تُوں بعد تُوں کھائی پی سکݨا ایں۔‘ 9 کَے خیال اَے مالک اپݨے نوکرے نا شُکر گُزار ہووے کہ اُس فرمانبرداری کِیتی اَے؟ بِلکل ناں! 10 اِس واسطے تُساں جِس ویلے اُنہاں حُکماں نی تعمِیل کرو جیہڑے تُساں کی دِتے گئے اݨ، تے آخیا کرو، ’اَساں ناچِیز آں۔ اَساں جو کُجھ کِیتا، او تے اَساں نا فرض سی۔‘ “ حضرت عِیسیٰ کوڑھ نی بِیماری آلیاں دساں بندیاں کی شِفا دیݨے اݨ 11 فِر اِسرح ہویا کہ حضرت عِیسیٰ یرُوشلم شہر در جاݨے ویلے سامریہ تے گلِیل نے علاقیاں نی سرحد اپروں پئے جاݨے سݨ۔ 12 اُتھے اِک گراں وِچ اُنہاں کی کوہڑ نے دس مرِیض مِلے، جیہڑے کُجھ فاصلے اپر کَھلتے وے سݨ۔ 13 اُنہاں اُچّی اُچّی آوازاں وِچ آخیا، ”حضرت عِیسیٰ! اَساں اپر رحم کرو!“ 14 حضرت عِیسیٰ اُنہاں کی تکی کے آخیا، ”ہُݨ جائی کے مذہبی پیشوانواں کولوں آپے کی چیک کراؤ کہ تُساں پاک ہوئے ہو یا نی۔“ تے اِسرح ہویا کہ راہ وِچ جاݨیاں جاݨیاں اُنہاں کی شِفاء لبھی گئی۔ 15 جیہڑے ویلے اُنہاں وِچوں اِک کی پتہ لغا کہ اُسی شِفاء لبھی گئی اے، تے او اُچّی اُچّی آوازاں وِچ اللّٰہ تعالیٰ نی حمد بیان کرنیاں کرنیاں مُڑی کے آئی گیا۔ 16 اے بندہ، جیہڑا سامریہ قوم وِچوں سی، جیہڑے ویلے مُڑی کے آیا تے حضرت عِیسیٰ نے قَدماں وِچ ٹہی کے اُنہاں نا شُکر ادا کِیتا۔ 17 فِر حضرت عِیسیٰ لوکاں کولوں پُچھیا، ”کِیئاں ساریاں دساں کی شِفاء نی لبھی؟ باقی نو کُتھے اݨ؟ 18 کَے گل اَے کہ اِس پردیسِیئے بغَیر ہور کُسے کی توفِیق نی لبھی کہ آئی کے اللّٰہ تعالیٰ نا شُکر ادا کرَے؟“ 19 فِر حضرت عِیسیٰ اُسی آخیا، ”اُٹھی کے جا! تُوں اپݨے اِیمان نی وجہ تُوں ٹھِیک ہویا ایں۔“ اللّٰہ تعالیٰ نی بادشاہی نا اچھݨا 20 اِک واری اِسرح ہویا کہ فریسی فِرقے نے کُجھ لوکاں حضرت عِیسیٰ کولوں پُچھیا، ”اللّٰہ تعالیٰ نی بادشاہی کدُوں اچھسی؟“ حضرت عِیسیٰ جواب دِتا، ”اِیئے جہئی کوئی نِشانی نی، جِس تُوں اللّٰہ تعالیٰ نی بادشاہی نے اچھݨے نے ویلے نا پتہ لغے۔ 21 تے لوک اے گل وی ناں آخی سکسݨ، ’اللّٰہ تعالیٰ نی بادشاہی اِتھے موجُود اَے‘ یا ’اُتھے موجُود اَے‘، کِیئانکہ او تُساں نے درمیان موجُود اَے۔“ 22 فِر حضرت عِیسیٰ اپݨے صحابیاں کی آخیا، ”او ویلا اچھسی جدُوں تُساں مہاڑے یعنی اِبنِ اِنسان نے واپس اچھݨے آلے اِک دیہاڑے کی تکݨے نی خواہش کرسو، پر تکی ناں سکسو۔ 23 لوک تُساں کی مہاڑے بارے وِچ اے گل وی آخسݨ، ’او فلاݨی جغہ آئے وے اݨ!‘ یا ’او فلاݨی جغہ آئے وے اݨ!‘ اُنہاں نی گلاں اپر یقِین ناں کرو تے ناں ہی اُنہاں نے پِچھے جاؤ۔ 24 کِیئانکہ اِبنِ اِنسان نا دُوئی واری اَچھݨا اُس آسمانی بِجلی نی طرح ہوسی جیہڑی آسمان وِچ اِک پاسیوں چمکݨی اچھݨی اَے تے دُوئے پاسے ٹُری جاݨی اَے۔ 25 پر اِس گلے تُوں پہلے ضرُوری اے اَے کہ مِکی دُکھ تے تکلِیفاں لبھݨ، تے مہاڑے زمانے نے لوک مِکی رَد کرݨ۔ 26 تے جِس طرح حضرت نُوح نے زمانے وِچ ہویا سی، اُسے طرح اِبنِ اِنسان یعنی کہ مہاڑے دُوئی واری اچھݨے نے ویلے ہوسی۔ 27 کِیئانکہ سَیلاب اچھݨے تے سارے لوکاں نے ڈُبݨے تُوں پہلے لوک بے غم ہوئی کے کھاݨے پِیݨے، تے شادیاں بیاہ کرنے سݨ، اُس دیہاڑے تک کہ حضرت نُوح بیڑی وِچ ٹُری گئے۔ 28 حضرت لُوط نے زمانے وِچ وی اِسے طرح ہویا سی۔ لوک کھاݨے پِیݨے، چِیزاں نی خرِید و فروخت کرنے، راہݨے باہݨے تے کہار باہر پئے بَݨاݨے سݨ۔ 29 پر جِس دیہاڑے حضرت لُوط سدُوم شہر کی چھوڑی کے ٹُری گئے، تے اللّٰہ تعالیٰ آسمانے وِچوں اگی نے لَمبے پیجھی کے ساریاں لوکاں کی ساڑی پُہنی شوڑیا۔ 30 اِسرح ہی اِبنِ اِنسان یعنی کہ مہاڑے دُوئی واری اچھݨے نے ویلے وی ہوسی۔ 31 اُس دیہاڑے جیہڑا کوئی اپݨے کہرے نی چَھت اپر ہووے، اپݨا سامان کِہننے واسطے تھَلے ناں اچھے۔ اِسے طرح جیہڑا کوئی باہر باڑی وِچ کم کرنا ہووے، او وی کہرے در ناں مُڑے۔ 32 حضرت لُوط نی بِیوی نا واقعہ یاد کرو! 33 جیہڑا کوئی اپݨی جان بَچاݨے نی کوشِش کرسی، او اُس کولوں ہمیشہ واسطے گنوی جاسی۔ پر جیہڑا کوئی اپݨی جان نی پرواہ ناں کرسی، او بچی جاسی۔ 34 اِس واسطے میں تُساں کی دسݨا آں کہ اُس راتی دو بندے سُتے وے ہوسݨ، تے اُنہاں وِچوں ہِک کی اللّٰہ تعالیٰ آپے کول بُلائی کِہنسی تے دُوئے کی اُتھے ہی چھوڑی دیسی۔ 35 دو جناݨیاں چَکّی وِچ پَئیاں آٹا پیہننیاں ہوسݨ، تے ہِک کی اللّٰہ تعالیٰ آپے کول بُلائی کِہنسی تے دُوئی کی اُتھے ہی چھوڑی دیسی۔ 36 دو بندے باڑی وِچ پئے کم کرنے ہوسݨ، تے اُنہاں وِچوں ہِک کی اللّٰہ تعالیٰ آپے کول بُلائی کِہنسی تے دُوئے کی اُتھے ہی چھوڑی دیسی۔“ 37 صحابیاں پُچھیا، ”حضُور، اے کُتھَے ہوسی؟“ حضرت عِیسیٰ جواب دِتا، ”جِتھے مُرداڑ ہووے، اُتھے گِرجاں نا جمع ہوݨا اَے وَے۔“ |