اِنجِیل شریف (لُوقا) 13 - Mirpuri-Pahari Bibleغُناہواں تُوں توبہ ناں کرنے نا نتِیجہ 1 اُس ویلے لوکاں وِچوں کُجھ بندیاں حضرت عِیسیٰ کی ریاست گلِیل نے اُنہاں لوکاں نے بارے وِچ دسیا جِنہاں کی رُومی گورنر پیلاطُس اُس ویلے قتل کروایا سی جیہڑے ویلے او بڑے عِبادت خانے وِچ قُربانیاں دیݨے پئے سݨ۔ 2 حضرت عِیسیٰ اُنہاں لوکاں کی آخیا، ”تُساں کَے سمجھݨے او کہ اے گلِیلی جیہڑے اِسرح مارے گئے سݨ، دُوئے لوکاں نی بہ نسبت زیادہ غُنہگار سݨ؟ 3 ناں ناں! بلکہ میں تُساں کی دسی شوڑاں، اگر تُساں اپݨے غُناہواں تُوں توبہ ناں کِیتی، تے اُنہاں نی طرح تُساں سارے وی ہلاک ہوئی جاسو۔ 4 یا فِر او اَٹھاراں بندے جِنہاں اپر مِینارِ شِلوخ ٹہٹّھا سی تے او اُس تھلے دَبی کے مری گئے سݨ، یرُوشلم شہر نے باقی سارے لوکاں کولوں زیادہ غُنہگار سݨ؟ 5 بِلکُل ناں! بلکہ میں تُساں کی دسی شوڑاں، اگر تُساں اپݨے غُناہواں تُوں توبہ ناں کِیتی، تے تُساں وی اُنہاں نی طرح ہلاک ہوئی جاسو۔“ ناں پھلݨے آلے بُوٹے نی مِثال 6 فِر حضرت عِیسیٰ اُنہاں کی اے مِثال دِتی، ”کُسے بندے نے انگُور نے باغے وِچ انجِیر نا اِک بُوٹا لغا وا سی۔ او بُوٹے کول اے تکݨے واسطے گیا کہ اِس نال پھل لغا اے کہ نی۔ پر اُس نال کُجھ وی نی سی لغا ۔ 7 تے فِر اُس مالی کی آخیا، ’یَرا تکیں ناں، ترَے سال ہوئی گئے اݨ اِس بُوٹے نال کُجھ پَھل نی لغا۔ تُوں اِسرح کر کہ اِسی کَپی شوڑ۔ اِس خواہ مخواہ جغہ کہیری وی اَے۔‘ 8 مالی جواب دِتا، ’صاحب جی، اِس سال رہݨ دیو۔ میں اِس نی گوڈی کَرساں، تے ہَیل باساں۔ 9 اگلے سال پَھل لغا تے ٹھِیک۔ اگر فِر وی ناں پَھلیا تے کَپی شوڑیائے۔‘ “ حضرت عِیسیٰ اِک کُبّی عورت کی شِفاء دیݨے اݨ 10 فِر اِسرح ہویا کہ اِک واری ہفتے آلے مُبارک دیہاڑے حضرت عِیسیٰ کُسے عِبادت خانے وِچ وعظ دیݨے پئے سݨ۔ 11 اُتھے اِک اِیئے جہی عورت سی جِسی اَٹھاراں سالاں تُوں جِنّے پغڑے آ سی۔ او اِتنی کُبّی ہوئی گئی سی کہ او بِلکُل سِدّھی نی ہوئی سکݨی سی۔ 12 حضرت عِیسیٰ اُس کی تکیا تے کول بُلائی کے آخیا، ”ماسی، تُساں نی جان اِس بِیماری تُوں چھُڑکی گئی اے!“ 13 فِر اُنہاں اُس اپر اپݨے دَستِ مُبارک رخے تے اُس نی کَنڈ اُسے ویلے سِدّھی تِیر ہوئی گئی۔ فِر اُس عورت اللّٰہ تعالیٰ نی تعرِیف کِیتی۔ 14 اے گل تکی کے عِبادت خانے نا سربراہ خفا ہویا کہ ہفتے آلے مُبارک دیہاڑے اُنہاں اے کَم کِیئاں کِیتا۔ او لوکاں کی آخݨ لغے، ”کَم کرنے نے چھے دیہاڑے ہوݨے اݨ، ہفتے آلا مُبارک دیہاڑا نی ہوݨا۔ جِس کُسے کی شِفاء نی لوڑ ہووے، اُنہاں دیہاڑیاں وِچ اچھیا کرو۔“ 15 حضرت عِیسیٰ اُس کی آخیا، ”او مُنافقو! تُساں وِچ کوئی بندہ اَے وَے، جیہڑا اپݨے داندے یا کھوتے کی ہفتے آلے مُبارک دیہاڑے کِلّے تُوں کھولی کے پاݨی پیالݨے واسطے نی کَھڑنا؟ 16 اے عورت حضرت اِبراہِیم نی نسل وِچوں اے، تے اَٹھاراں سالاں تُوں شیطان نے قبضے وِچ ہوئی وی اَے۔ کِیئاں اے گل ٹھِیک نی کہ ہفتے آلے مُبارک دیہاڑے اِس کی رِہائی لبھی جائے؟“ 17 حضرت عِیسیٰ نے اِس جواب تُوں مُخالفت کرنے آلے لوک شَرمِندہ ہوئی گئے، تے باقی سارے لوک اُنہاں نے بابرکت کماں کی تکی کے بہُوں خُوش سݨ۔ رائی نے داݨے نی مِثال 18 فِر حضرت عِیسیٰ آخیا، ”اللّٰہ تعالیٰ نی بادشاہی کِسرح ہوݨی اے؟ میں اُس نی مِثال کَے دیاں؟ 19 اِس کی تُساں اِسرح سمجھی کِہنو کہ اِک رائی نا داݨا، جِسی کُسے بندے اپݨے باغے وِچ لایا۔ او اُگی کے بڑا ہویا تے اِک بڑا بُوٹا بݨی گیا تے پرندیاں آئی کے اُس اپر آلڑے بنائی کِہندے۔“ خمِیر نی مِثال 20 فِر اُنہاں آخیا، ”میں اللّٰہ تعالیٰ نی بادشاہی نی مِثال ہور کِسرح دیاں؟ 21 اِسرح سمجھو کہ او خمِیر نی طرح اَے جِسی کوئی جناݨی بہُوں سارے آٹے وِچ باہݨی اے، تے سارا آٹا خمِیرا ہوئی جاݨا اَے۔“ سوڑے دروازے نی مِثال 22 حضرت عِیسیٰ یرُوشلم شہر در جاݨے ویلے شہر شہر تے گرائیں گرائیں وِچ وعظ دیݨے گئے۔ 23 کُسے بندے اُنہاں کولوں پُچھیا، ”حضُور، صِرف تھوڑے لوکاں کی نجات لبھسی؟“ اُنہاں فرمایا، 24 ”تَنگ دروازے وِچوں لَنگݨے نی پُوری کوشِش کرو، کِیئانکہ بہُوں سارے لوک کوشِش تے کرسݨ پر کامیاب ناں ہوسݨ۔ 25 او ویلا اچھسی کہ کہرے نا مالک اُٹھی کے دروازہ بند کری شوڑسی۔ فِر تُساں باہر کھَلی کے آخݨے رہسو، ’سرکار! اَساں کی اندر اچھݨ دیو۔‘ پر او جواب دیسی، ’تُساں کُݨ ہو؟ پتہ نی کُتھوں آئی گئے او!‘ 26 اُس ویلے تُساں آخسو، ’اَساں تُساں نال کھاݨے پِیݨے رہے آں۔ تُساں اَساں نے شہر وِچ وعظ کرنے رہے او۔‘ 27 پر او فِر تُساں کی آخسی، ”تُساں کُݨ ہو؟ پتہ نی کُتھوں آئی گئے او! تُساں سارے بدماشو، مہاڑے کولوں دُور جاؤ!“ 28 اُس ویلے تُساں روسو تے پِچھتاوے نال دند پِیݨے رہسو جیہڑے ویلے تُساں حضرت اِبراہِیم، حضرت اِسحاق، حضرت یعقُوب تے ہور سارے نبیاں کی اللّٰہ تعالیٰ نی بادشاہی وِچ رہݨا تکسو تے اپݨے آپ کی دھتکاریا تکسو۔ 29 لوک مَشرق، مَغرب، شُمال تے جنُوب تُوں اچھی کے اللّٰہ تعالیٰ نی بادشاہی وِچ داخِل ہوئی کے دعوت کھاݨے واسطے بیہسݨ۔ 30 کُجھ اِیئے جہے ہوسݨ جیہڑے آخر اپر اچھسݨ پر اُنہاں کی اُچا دَرجہ لبھسی، تے کُجھ اِیئے جہے ہوسݨ جیہڑے پہلے نے آئے وے اݨ پر اُنہاں کی کمتر درجہ لبھسی۔“ حضرت عِیسیٰ نی یرُوشلم شہر نال محبت 31 فِر اِسرح ہویا کہ فریسی فِرقے نے کُجھ لوکاں اچھی کے حضرت عِیسیٰ کی آخیا، ”تُساں اِتھوں نِکلی کے کُدرے ٹُری جاؤ، کِیئانکہ ہَیرودیس بادشاہ تُساں کی مَرواݨا چاہݨا اَے۔“ 32 حضرت عِیسیٰ اُنہاں کی آخیا، ”جائی کے اُس لومڑے کی دَسّو کہ، ’اَج تے کَل میں جِنّات کی کَڈھݨے نا کَم تے بیماراں کی شِفاء دیݨے نا کَم کَرساں، تے ترِیئے دیہاڑے مہاڑا کَم ختم ہوئی جاسی۔‘ 33 پر اے گل ضرُوری اَے کہ اَج، کَل تے پَرسوں میں اپݨا سفر جاری رَخاں، کِیئانکہ نبی اگر شہیِد ہوݨا ہی اَے وَے تے یرُوشلم شہر وِچ ہی شہیِد ہووے!“ 34 فِر حضرت عِیسیٰ آخیا، ”یرُوشلم نے لوکو! تُساں نَبیاں کی شہیِد کرنے تے پَیغمبراں کی بَٹّیاں نال ماری شوڑنے او۔ میں بہُوں کوشِش کِیتی اَے کہ تُساں کی اِسرح بچائی کِہناں جِسرح اِک کُکڑی اپݨے بَچیاں کی اپݨے پَراں تھَلے دیئی کے بَچاݨی اَے۔ پر تُساں مِکی اے نی کرݨ دِتا۔ 35 یاد رَخو! اللّٰہ تعالیٰ تُساں نے شہر کی وِیران کری شوڑسی۔ اُس ویلے تک میں واپس ناں اچھساں جدُوں تک تُساں آپوں اے گل ناں آخسو، ’مُبارک اَے او جیہڑا ربّ نے ناں اپر اچھݨا اَے!‘ “ |