اِنجِیل شریف (لُوقا) 12 - Mirpuri-Pahari Bibleمُنافقت تُوں بچݨے نی ہدایت 1 اِتنے وِچ بہُوں سارے لوک اِکٹھے ہوئی گئے اِتھے تک کہ او اِک دُوئے اپر ٹہیݨ لغی پئے۔ حضرت عِیسیٰ اپݨے صحابیاں کی مُخاطِب ہوئی کے فرمایا، ”خبردار! فریسیاں نے خمِیر تُوں بَچو، یعنی اُنہاں نی مُنافقت تُوں۔ 2 جیہڑا کُجھ وی چھَپیا وا اے، او ظاہر کِیتا جاسی، تے ہر گل جیہڑی چھَپی وی اے اُس نی خبر ہوئی جاسی۔ 3 جو کُجھ تُساں رات نے نہیرے وِچ آخیا، او دیہاڑی ویلے لوئی وِچ لوکاں اَگے بیان کِیتا جاسی۔ جو کُجھ تُساں بند کمریاں وِچ کُسے نے کَنّے وِچ آہِستہ جیا آخیا، او کوٹھیاں اپر کھلی کے لوکاں کی سُݨایا جاسی۔“ کیہڑی ہستی تُوں ڈرو 4 ”اِس واسطے سَنگیو، میں تُساں کی اے گل آخݨا آں کہ جیہڑے تُساں نے جِسم کی ماری سکݨے اݨ، پر ہور تُساں نا کُجھ وی نی بِگاڑی سکݨے، اُنہاں کولوں مَت ڈرو ۔ 5 میں تُساں کی دسݨا آں کہ کُس کولوں ڈَرنا چاہی نا اے، اُس کولوں ڈرو جیہڑا مارنے تُوں بعد تُساں کی دوزخے نی اگی وِچ وی سٹی سکݨا اَے۔ اِس واسطے میں اِک واری فِر آخݨا آں کہ صِرف اُسے کولوں ڈرو ! 6 اِک چِڑی، اِس نا کَے مُل ہوݨا؟ فِر وی اللّٰہ تعالیٰ کی او نی پُہلݨی! 7 بلکہ اللّٰہ تعالیٰ تے تُساں نے سِرے نے بال وی گِݨنا اَے۔ اِس واسطے ڈرو ناں! اُس نی نظراں وِچ تُساں نی قِیمت بہُوں ساریاں چِڑیاں کولوں وی زیادہ اَے۔“ حضرت عِیسیٰ نا اِنکار ناں کرنا 8 ”یقِین کرو کہ جیہڑا کوئی لوکاں نے سامݨے مہاڑا اِقرار کرسی، اِبنِ اِنسان یعنی کہ میں وی اللّٰہ تعالیٰ نے حضُور فرِشتیاں نے سامݨے اِسے طرح کَرساں۔ 9 پر جیہڑا کوئی لوکاں نے سامݨے مہاڑا اِنکار کرسی، اللّٰہ تعالیٰ نے فرِشتیاں نے سامݨے اُس نا وی اِنکار کِیتا جاسی۔ 10 اِس تُوں عِلاوہ کدے کوئی بندہ اِبنِ اِنسان یعنی کہ مہاڑے خِلاف کُجھ آخے، تے فِر اُسی معافی لبھی جاسی۔ پر کدے کوئی بندہ رُوحِ پاک نے خِلاف کُفر کرے، اُسی معافی ناں لبھسی۔ 11 یاد رَخو! لوک تُساں کی مہاڑی وجہ تُوں عِبادت خانیاں وِچ قاضیاں کول، تے حاکماں تے بادشاہواں کول وی کَھڑسݨ۔ جِس ویلے تُساں نی پیشگی ہووے تے اِس گل نی فِکر ناں کرو کہ ”اَساں کَے آخاں؟“ یا ”کِسرح جواب دیاں؟“۔ 12 کِیئانکہ جو کُجھ تُساں کی آخݨا ہوسی، رُوحِ پاک اُسے ویلے تُساں کی سِخائی شوڑسی۔“ بے وقُوف امِیر نی مِثال 13 فِر اِسرح ہویا کہ لوکاں وِچوں کُسے حضرت عِیسیٰ کی آخیا، ”حضُور، مہاڑے پَہراؤ کی آخو کہ وِراثت وِچوں مہاڑا حِصّہ مِکی دے۔“ 14 اُنہاں فرمایا، ”او سَنگیا، مِکی تُساں نا تقسِیم کرنے آلا تے جَج کِس بݨایا اے کہ تُساں نی وِراثت بَنڈاں؟“ 15 فِر حضرت عِیسیٰ ساریاں لوکاں کی مُخاطِب ہوئی کے آخیا، ”خبردار! اپݨے آپے کی ہر طرح نی لالِچ تُوں بچائی کے رَخو، کِیئانکہ بہُوں زیادہ مال نے ہوݨے نال اِنسان نی زِندگی نی بݨنی۔“ 16 فِر اُنہاں اِک مِثال دَسّی، ”کُسے امِیر بندے نی زِیمی وِچ بہُوں زیادہ فصل پَیدا ہوئی۔ 17 اے گل تکی کے او سوچݨ لغا، ’اِتنی زیادہ فصل سنبھالݨے واسطے مہاڑے کول جغہ نی۔ ہُݨ میں کَے کراں؟‘ 18 اُس سوچیا، ’اِسرح کرنا آں کہ اِنہاں گوداماں کی ٹہائی کے اِنہاں نی جغہ نوے بڑے گودام بَݨاݨا! اُنہاں وِچ میں اپݨا سارا مال تے فصل رَخساں۔ 19 فِر میں اپݨے دِلے وِچ آخساں، ”تہاڑے کول بہُوں سارا مال اکھٹا اے، جیہڑا کہ بہُوں سالاں تک رہسی۔ ہُݨ کھا پی، آرام کر، تے خُوش رہو۔‘ 20 پر اللّٰہ تعالیٰ اُس نیاں گلاں سُݨیاں تے آخیا، ’بے وَقُوفا! تُوں تے اَج راتی ہی مری جاسیں۔ فِر اے سارا کُجھ جیہڑا تُوں اپݨے واسطے جمع کِیتا، کِس نا ہوسی؟‘ “ 21 فِر حضرت عِیسیٰ فرمایا، ”بِلکُل اِیئے جہیا ہی حال اُنہاں لوکاں نا ہوسی جیہڑے مال و دولت تے جمع کرنے وِچ لغے رہݨے اݨ، پر اللّٰہ تعالیٰ نی نظر وِچ مالدار نی۔“ ضرُورتاں واسطے پریشان ناں ہویا کرو 22 فِر حضرت عِیسیٰ اپݨے صحابیاں کی آخیا، ”اے ہی وجہ اَے کہ میں تُساں کی آخݨا کہ اپݨی جان واسطے پریشان ناں ہویا کرو، یعنی کہ ’اَساں کَے کھاساں یا کَے لاساں؟‘ 23 کِیئانکہ جان صِرف خوراک واسطے تے جِسم صِرف کپڑیاں واسطے نی۔ 24 پرندیاں نی مِثال چائی کِہنو: ناں او بِیں راہݨے اݨ، ناں فصل کَپݨے اݨ، ناں اِنہاں نا کوئی کھِلاڑہ یا گودام ہوݨا اَے۔ فِر وی ربّ العالمِین اِنہاں کی کھُوالݨا اَے۔ جبکہ تُساں تے پرندیاں کولوں زیادہ قِیمتی او! 25 تُساں وِچ اِیئے جہیا کُݨ اَے، جیہڑا فِکر کری کے اپݨی عُمر وِچ اِک سیکنڈ وی وَدھائی سکݨا اے؟ 26 اِس واسطے کدے تُساں اِتنا جہیا کَم وی نی او کری سکݨے، تے فِر باقی معاملات واسطے کِیئاں فِکرمَند ہوݨے او؟ 27 جنگلی پھُلاں اپر غور کرو کہ او کِس طرح بڑے ہوݨے اݨ۔ ناں او محنت کرنے اݨ، تے ناں ہی او اپݨے واسطے کپڑے بُݨنے اݨ۔ فِر وی میں تُساں کی آخݨا آں کہ حضرت سلیمان باوجود اپݨی ساری شان و شوکت نے کدے اُنہاں نی طرح خُوبصُورت لباس نی لایا۔ 28 کدے اللّٰہ تعالیٰ اِس کہاہ کی جیہڑا اَج باڑیاں وِچ اَے تے کَل تَندُورے وِچ سٹیا جاسی، اِیئے جہیا لباس لاݨے واسطے دیئی سکݨا، تے اَے کَچّے اِیمان آلیو! او تُساں کی اِس تُوں زیادہ بہتر لباس ناں دیسی؟ 29 اِس واسطے کھاݨے پِیݨے نیاں چِیزاں نی تلاش ناں کریا کرو، تے اِنہاں واسطے پریشان ناں ہویا کرو۔ 30 اِنہاں چِیزاں نی تلاش وِچ مُشرک تے مُنکر قِسم نے لوک لغے رہݨے اݨ۔ پر تُساں نا آسمانی باپ تے پہلے تُوں اے گل جاݨنا اَے کہ تُساں کی اِنہاں ساریاں چِیزاں نی لوڑ اَے۔ 31 اِس نی بجائے تُساں پہلےاللّٰہ تعالیٰ نی بادشاہی نی طرف اپݨا دِل لاؤ، تے اے ساریاں چِیزاں وی تُساں کی لبھی جاسݨ۔ 32 مُٹّھی بَھر لوکو، خوف زَدہ ناں ہووو، کِیئانکہ تُساں نے آسمانی باپ کی خُوشی اَے کہ او تُساں کی اپݨی بادشاہی وِچ شامِل کرے۔ 33 اپݨا مال و متاع بیچی کے ضرُورت مَنداں کی بَنڈی شوڑو۔ اِس طرح تُساں اپݨے واسطے اِیئے جہے بٹّوے بݨاسو جیہڑے کدے وی خراب ناں ہوسݨ، تے آسماناں وِچ اِیئے جہیا خزانہ جیہڑا کدے وی ختم ناں ہوسی، تے اُتھے ناں چوری ہوئی سکݨی اَے، ناں کوئی کِیڑا خراب کری سکݨا اَے۔ 34 اصل وِچ جِتھے تُساں نا خزانہ ہوسی، اُتھے ہی تُساں نا دِل وی لغا رَہسی۔“ جاغݨے آلے نوکراں نی مِثال 35 ”خِدمت واسطے تیار ہوئی جاؤ تے اپݨے دِیئے ہر ویلے بالی رخو۔ 36 تُساں اُنہاں بندیاں نی طرح ہوئی جاؤ جیہڑے اپݨے مالکے نی راہ کی تکݨے رہݨے اݨ کہ او کیہڑے ویلے شادی نی دعوت تُوں مُڑی اچھی کے دروازہ ٹھکورسی تے او اچھی کے اُس واسطے فَٹّا فَٹ دروازہ کھولسݨ۔ 37 خُوش نصیب اݨ او نوکر جِنہاں نا مالک اچھݨا اے تے او اُس نے اِستقبال واسطے تیار ہوئے وے ہوݨ۔ یقِین کرو کہ مالک اُنہاں نال بہُوں خُوش ہوسی تے اُنہاں نی بہُوں خِدمت کرسی۔ 38 او نوکر خُوش نصیب اݨ جیہڑے اَدّھی راتی ویلے تے سَرگی ویلے وی مالکے نے اِستقبال واسطے تیار بیٹھے وے ہوݨ۔ 39 پر اے گل یاد رَخو کہ کدے کُسے کہار نے مالک کی پتہ ہووے کہ چور کیہڑے ویلے اچھسی، تے او اپݨے کہرے وِچ چوری کدے وی ناں ہوݨ دے۔ 40 اِس واسطے تُساں وی ہر ویلے تیار رہو، کِیئانکہ جِس ویلے تُساں نے وَہم و گَمان وِچ وی ناں ہوسی، اِبنِ اِنسان آئی جاسی۔“ 41 حضرت پَطرس آخیا، ”حضُور، اے مِثال صِرف اَساں واسطے اَے، یا ساریاں لوکاں واسطے ؟“ 42 حضرت عِیسیٰ جواب دِتا، ”کدے مالک اپݨے کُسے وفادار تے عقلمند نوکرے نے حَوالے اپݨے کہار چلاݨے نا نظام کَرے، تے اُس نی ڈیوٹی لائے کہ او باقی سارے نوکراں کی وقت اپر کھاݨا دے، 43 او نوکر بہُوں ہی خُوش نصِیب ہوسی کہ اُس نا مالک اچھَے تے او اپݨے کَمے کی چَنگی طرح کرنا ہووے۔ 44 یقِین کرو، مالک خُوش ہوئی کے اُسی اپݨی ساری مِلکیت نا نِگران بݨائی شوڑسی۔ 45 پر جے کدے او نوکر اپݨے دِلے وِچ اے سوچَے کہ مالک دیر نال اچھسی، او اپݨے نالے نے دُوئے نوکراں کی مارَے کُٹَّے، تے کھائی پی کے نشے وِچ لغی جائے، 46 تے اُس نا مالک کُسے اِیئے جہے دیہاڑے تے اِیئے جہے ویلے اچھی جاسی کہ نوکرے کی پتہ ہی ناں ہوسی، تے ناں ہی اُسی کوئی اُمِید ہوسی۔ فِر مالک اُس نوکرے کی بے اِیماناں نی صَف وِچ شامل کری کے بہُوں ہی سخت سزا دیسی۔ 47 جِس نوکرے کی پتہ ہووے کہ اُس نا مالک کَے چاہݨا اے، پر فِر وی ناں کوئی تیاری کَرے تے ناں ہی اُس نی رَضا نے مطابق کوئی کَم کَرے، اُس نی سزا بہُوں ہی سخت ہوسی۔ 48 اگر کُسے نوکرے کولوں لاعِلمی وِچ کوئی اِیئے جہیا کَم ہووے جیہڑا مالکے نی مرضی نے مطابق ناں ہووے، اُسی تھوڑی سزا لبھسی۔ جِسی جِتنا دِتا جاݨا اے، اُس کولوں حِساب وی اُتنا ہی کِہندا جاݨا اَے۔ یعنی جِس نے سپرد زیادہ کِیتا جاݨا اے، اُس کولوں حِساب وی زیادہ کِہندا جاݨا اَے۔“ حضرت عِیسیٰ اپر اِیمان رخݨے نی وجہ تُوں لوکاں نی تقسِیم ہوݨی اَے 49 ”میں تے زِیمی اپر اگ لاݨے واسطے آیا آں! کاش کہ اے پہلے ہی لغی وی ہوݨی! 50 پر اِس تُوں پہلے مِکی بہُوں سارے دُکھ تے تکلِیفاں برداشت کرنیاں پیسݨ، تے جدُوں تک اے ہوئی ناں جائے میں بہُوں ہی بے چِین آں! 51 اے ناں سمجھو کہ مہاڑے اچھݨے نال زِیمی اپر اَمن ہوئی جاسی، بلکہ اِختلافات فِر وی رہسݨ۔ 52 کِیئانکہ ہُݨ تُوں اݨ بݨ شرُوع ہوئی جاسی۔ جِس کہرے وِچ پَنج بندے ہوسݨ، اُنہاں وِچ دو اِک پاسے تے ترَے دُوئے پاسے ہوئی جاسݨ۔ 53 پِیؤ اپݨے پُترے نے خِلاف ہوسی تے پُتر اپݨے پِیؤ نے خِلاف، مآ اپݨی تہِیؤ نے خِلاف ہوسی تے تہی اپݨی مآؤ نے خِلاف۔ اِسے طرح سَس اپݨی نُوں نے خِلاف ہوسی تے نُوں اپݨی سَسُو نے خِلاف۔“ موجُودہ حالات کی سمجھو! 54 فِر حضرت عِیسیٰ لوکاں کی آخیا، ”جدُوں تُساں مَغرب آلے پاسوں چَہڑ اچھݨا تکݨے او تے سَمجھی جاݨے او کہ بارش ہوسی، تے اِسرح ہی ہوݨا وی اَے وے۔ 55 جدُوں مشرق نی طرفوں ہوا اچھݨی اَے تے تُساں سَمجھی جاݨے او کہ گرمیاں اچھݨے آلیاں اݨ۔ فِر ہوݨا وی اِسرح ہی اَے وَے۔ 56 او مُنافقو! تُساں آسمان کی تے زِیمی کی تکی کے اَندازے لائی کِہننے او، پر موجُودہ حالات نا مطلب کِیئاں نی او سمجھݨے؟“ دُشمݨاں نال سمجھوتہ کرنا 57 ”تُساں آپوں صحیح فَیصلہ کِیئاں نی او کرنے؟ 58 کدے کوئی بندہ تُساں نے خِلاف کوئی مقدمہ چَلائے، تے عَدالت وِچ پیش ہوݨے تُوں پہلے اُس نال سَمجھوتہ کری کِہنو۔ کُدرے اِیئے جہیا ناں ہووے کہ او تُساں کی جَج کول کھڑے، جَج تُساں کی پولِیس نے حوالے کرے، تے پولِیس تُساں کی کھڑی کے جیل وِچ سٹی شوڑے۔ 59 یقیناً تُساں کی اُس ویلے تک اُتھوں رِہائی ناں لبھی سکسی جِس ویلے تک اپݨے جُرمانے نا پیسہ پیسہ ادا ناں کَرسو۔“ |