اِنجِیل شریف (لُوقا) 11 - Mirpuri-Pahari Bibleحضرت عِیسیٰ اپݨے پیروکاراں کی دُعا سِخاݨے اݨ 1 اِک واری اِسرح ہویا کہ حضرت عِیسیٰ کُسے جغہ دُعا پئے کرنے سݨ۔ جِس ویلے اُنہاں دُعا ختم کِیتی، تے اُنہاں نے صحابیاں وِچوں اِک صحابی اُنہاں کی آخیا، ”حضُور! جِس طرح حضرت یحییٰ اپݨے پَیروکاراں کی دُعا کرنا سِخایا اَے، تُساں وی اَساں کی سِخاؤ!“ 2 حضرت عِیسیٰ اُنہاں کی آخیا، ”جِس ویلے تُساں دُعا کرو تے اِسرح آخیا کرو، ’اَے باپ، تُہاڑے پاک ناں نی عِزت ہووے۔ تُہاڑی بادشاہی اچھَے۔ 3 جیہڑا رِزق اَساں کی چاہی نا اَے، ہر دیہاڑے اَساں کی دَے۔ 4 جِس طرح اَساں دُویاں لوکاں نے قصُور معاف کرنے آں، تُوں وی اَساں نے غُناہ معاف فرما۔ تے اَساں کی آزمائشاں وِچ ناں بھا۔‘ “ 5 فِر حضرت عِیسیٰ صحابیاں کی آخیا، ”فرض کرو تُساں وِچوں کوئی اپݨے کُسے سَنگیَے نے کہار اَدّھی راتی جائی کے آخے، ’یَرا! مِکی ترَے روٹیاں دے ۔ 6 مہاڑا اِک سَنگی بہُوں دُوروں مہاڑے کہار آیا اَے، پر مہاڑے کول اُسی کھُوالݨے واسطے کُجھ وی نی۔‘ 7 او بَندہ اُسی اَندروں جواب دَے، ’یَرا! مِکی تَنگ ناں کر۔ ہُݨ میں دروازہ بند کری شوڑیا اے، تے میں تے مہاڑے کہرے آلے وی سَیئی گئے اݨ۔ میں تے اُٹھی کے تُکی کُجھ وی ناں دیئی سکݨا۔‘ 8 پر میں تُساں کی دسی شوڑاں کہ آخرکار کدے او بندہ اپݨی دوستی نی وجہ تُوں ناں وی دَے، فِر وی اِس وجہ تُوں اُسی ضرُور اُٹھی کے بقدرِ ضرُورت کھاݨا چائی دیسی کہ او اُس نا پِچھا نی پیا چھوڑنا۔ 9 اِس واسطے میں تُساں کی آخݨا آں، اللّٰہ کولوں مَنگو تے او تُساں کی ضرُور دیسی۔ اُسی لوڑو، تے او تُساں کی لبھسی۔ اُس نا دروازہ ٹھکورو، تے دروازہ کھُلسی۔ 10 کِیئانکہ جیہڑا کوئی اللّٰہ کولوں مَنگے، اُسی دِتا جاݨا اَے۔ جیہڑا اُسی لوڑے، اُسی او لبھݨا اَے۔ تے جیہڑا اُس نا دروازہ ٹھکورَے، دروازہ کھُلسی۔ 11 تُساں وِچ اِیئے جہیا کُݨ اَے، جِس کولوں اُس نا پُتر مَچّھی مَنگے تے او اُسی مَچّھی نے بجائے سَپ دے؟ 12 یا جے او اَنڈا مَنگے تے اُسی بِچُوں چائی دے؟ 13 سوچو، کدے تُساں بُرے ہوئی کے وی اپݨی اولادی کی چنگیاں چیزاں دیݨا چاہݨے او، تے اِسے طرح تُساں نا آسمانی باپ وی اپݨے مَنگݨے آلیاں کی رُوحِ پاک ضرُور دیسی۔“ عِیسیٰ اِبلِیس کی شِکست دیݨے اݨ 14 اِک واری اِسرح ہویا کہ حضرت عِیسیٰ کُسے بندے وِچوں اِیئے جہیا جِنّ کَڈھیا جیہڑا اِنسان کی گُونگا کری شوڑنا اَے۔ جیہڑے ویلے او جِنّ نِکلیا تے گُونگا بولݨ لغی پیا۔ اے تکی کے لوک بہُوں حَیران ہوئی گئَے۔ 15 پر اُنہاں وِچ کُجھ اِیئے جہے لوک وی سݨ جیہڑے آخݨے سݨ، ”اے جِنّات نے سردار اِبلِیس نی مدد نال لوکاں وِچوں جِنّ کڈھݨا اَے۔“ 16 کُجھ اِیئے جہے لوک وی سݨ جیہڑے حضرت عِیسیٰ کی آزماݨا چاہݨے سݨ۔ اِس واسطے اُنہاں حضرت عِیسیٰ اَگے فرمائش کِیتی کہ او کوئی اِیئے جہیا مُعجزہ دَسݨ، جِس تُوں ثابت ہووے کہ او واقعی اللّٰہ تعالیٰ نی طرفوں ہی اݨ۔ 17 پر حضرت عِیسیٰ کی اُنہاں نیاں خیالاں نا پتہ لغا۔ اِس واسطے اُنہاں آخیا، ”جِس مُلخ نے لوکاں وِچ اتفاق ناں ہووے، او مُلخ بہُوں جلدی بَرباد ہوئی جاݨا اَے۔ تے جِس خاندان وِچ اتفاق ناں ہووے، او وی بَرباد ہوئی جاݨا اَے۔ 18 اِسرح اگر اِبلِیس اپݨے ہی خِلاف ہوئی جائے، تے اُس نی حکُومت کِسرح قائم رہی سکݨی اے؟ فِر تُساں کِسرح مہاڑا آخی سکݨے او کہ میں شیطانی مدد نال جِنّات کَڈھݨا آں؟ 19 تے کدے میں جِنّات نے سردار نی مدد نال جِنّ کَڈھݨا آں، تے فِر تُساں نے اپݨے لوک جِنّ کِس نی مدد نال کڈݨے اݨ؟ اے گل تے آپوں ہی تُساں نے اِلزام کی غلط ثابت پئی کرنی اَے۔ 20 پر حقِیقت اے اَے کہ اللّٰہ تعالیٰ مِکی جِنّات کَڈھݨے نی طاقت دیئی کے اے پیا ثابت کرنا اَے کہ اُس نے راج نا ویلا آئی گیا اَے۔“ 21 فِر اُنہاں آخیا، ”اگر کوئی ڈاڈہ بندہ ہَتھیار ہِݨی کے اپݨے کہرے نی حِفاظت پیا کرنا ہووے، تے اُس نا مال محفُوظ رہݨا اَے۔ 22 پر کدے کوئی اُس کولوں وی زیادہ زور آور بندہ اُس اپر حملہ کری کے فتح ہِݨی کِہنے، تے او اُس نے سارے ہتھیار جِنہاں اپر اُسی بَھروسہ سی کھوئی کِہننا اَے، تے اُس نا مال لُٹی شوڑنا اَے۔ 23 جیہڑا مہاڑے نال نی، او مہاڑے خِلاف اَے۔ تے جیہڑا مہاڑے نال رلی کے لوکاں کی اکٹھا نی کرنا، او لوکاں کی کھَلیارنا اَے۔ 24 جیہڑے ویلے کُسے بندے وِچوں جِنّ نِکلݨا اَے، تے او کُسے ویران تے بیابان جغہ وِچ آرام حاصل کرنے واسطے پِھرنا رہݨا اے، پر اُسی آرام نی لبھݨا۔ تے فِر او آخݨا اے، ’میں اپݨے اُسے کہرے وِچ واپس جاساں جِس وِچوں میں نِکلی کے آیا ساں۔‘ 25 جیہڑے ویلے او واپس اُتھے جاݨا اَے، تے کہار صاف سُتھرا ہوݨا اَے۔ 26 فِر او کَے کرݨا اَے کہ جائی کے اپݨے کولوں زیادہ بُرے ست جِنّ ہور اپݨے نال ہِݨی کے اچھݨا اَے۔ تے او سارے اُتھے رہݨا شرُوع کری کِہننے اݨ۔ اِسرح اُس بندے نا حال پہلے کولوں زیادہ بُرا ہوئی جاݨا اَے۔“ 27 حضرت عِیسیٰ اے گلاں پئے کرنے ہی سݨ کہ لوکاں وِچوں اِک جناݨی اُچّی آواز وِچ آخیا، ”خُوش نصیب اَے تُکی جمݨے آلی تے جِس تُکی اپݨا دُدھ پیالیا!“ 28 اے گل سُݨی کے حضرت عِیسیٰ آخݨ لغے، ”اصل خُوش نصیب او لوک اݨ جیہڑے اللّٰہ تعالیٰ نا کلام سُݨنے اݨ تے اُس اپر عمل کرنے اݨ۔“ حضرت یُونس نی زِندگی نا سبق 29 جیہڑے ویلے لوکاں نا رَش ہوݨ لغا، تے حضرت عِیسیٰ آخیا، ”اَج کَل نے لوک کِتنے بُرے اݨ! اِنہاں کی مہاڑے کولوں مُعجزے تکݨے نا شوق اَے، پر اِنہاں کی صِرف حضرت یُونس نے مُعجزے نی طرح مُعجزہ ہی دسیا جاسی۔ 30 کِیئانکہ جِس طرح نینوَہ شہر نے لوکاں واسطے حضرت یُونس اِک نِشان بݨی گئے سݨ، اُسے طرح اِبنِ اِنسان یعنی کہ میں وی اِس زمانے نے لوکاں واسطے اِک نِشان بݨی جاساں۔ 31 قیامت آلے دیہاڑے مُلکِ سَبأ نی مَلکہ اللّٰہ تعالیٰ نی عدالت وِچ کھلی کے اِس زمانے نے لوکاں کی مُجرم آخسی، کِیئانکہ او حضرت سلیمان کولوں حِکمت نی تعلِیم سُݨنے واسطے بہُوں دُوروں آئی سی۔ پر تکو! اِتھے تے او اَے جِس نا مُقام حضرت سلیمان کولوں وی بڑا اَے۔ 32 قیامت آلے دیہاڑے نینوَہ شہر نے لوک وی اللّٰہ تعالیٰ نی عدالت وِچ کھَلی کے اِس زمانے نے لوکاں کی مُجرم ثابت کرسݨ، اِس واسطے کہ اُنہاں حضرت یُونس کولوں اللّٰہ تعالیٰ نا پَیغام سُݨی کے اپݨے غُناہواں تُوں توبہ کری شوڑی سی، حلانکہ اِتھے تے او اَے جِس نا مُقام حضرت یُونس کولوں وی زیادہ بڑا اَے!“ بدن نیاں بَتّیاں 33 ”کوئی بندہ وی بَتّی بالی کے پہانڈے تھَلے یا کُسے اوہلی جغہ وِچ نی رخݨا، بلکہ کُسے اُچّی جغہ اپر رخݨا اَے، تانکہ جیہڑا کوئی اندر اچھَے اُسی لو لغے۔ 34 تُساں نیاں اکھیاں تُساں نے بدن نیاں بَتّیاں اݨ۔ جے تُساں نیاں اکھیاں ٹھِیک ہوݨ، تے تُساں نے سارے بدن کی روشݨی لبھسی۔ جے تُساں نیاں اکھیاں خراب ہوݨ، تے تُساں نے سارے بدن وِچ نیہرا ہوسی۔ 35 اِس واسطے ذرا اپݨے آپ اپر غور کرو کہ تُساں وِچ جیہڑی روشݨی اَے، او حقِیقت وِچ نیہرا تے نی۔ 36 اِسرح جے تُساں نا سارا بدن روشݨی نال پریا ہووَے تے کُسے حِصے وِچ نیہرا ناں ہووَے، تے بدن وِچ اِیئے جہئی روشݨی ہوسی جِیئے جہئی چراغ نے چمکݨے نال تُساں نے بدن اپر ہوݨی اَے۔ حضرت عِیسیٰ فریسی فِرقے نے لوکاں تے شرِیعت نے عالماں اپر ملامت کرنے اݨ 37 جیہڑے ویلے حضرت عِیسیٰ اے گلاں ختم کِیتیاں تے فریسی فِرقے نے اِک بندے اچھی کے اُنہاں کی کھاݨے نی دعوت دِتی۔ حضرت عِیسیٰ اُس نے کہار گئے تے کھاݨے واسطے بیہی گئے۔ 38 فریسی بندہ اے گل تکی کے حَیران ہویا کہ حضرت عِیسیٰ رَوائیتی طریقے نال کھاݨے تُوں پہلے اپݨے ہتھ نی تہوتے۔ 39 حضرت عِیسیٰ اُسی آخیا، ”او فریسیو! تُساں کھاݨے پِیݨے نے پہانڈیاں کی باہروں تے بہُوں تہوئی تہوئی کے استعمال کرنے او، پر اندروں تُساں بَدی تے لالِچ نال پہرے وے او۔ 40 او بیوقُوفو! جِس خالق اَساں کی باہروں بݨایا، اُس اَساں کی اندروں نی بݨایا؟ 41 اِس واسطے اپݨے پہانڈیاں وِچ پِیݨے آلے مال وِچوں خَیرات وی دیا کرو، تانکہ سب کُجھ تُساں واسطے پاک ہوئی جائے۔ 42 او فریسیو، تُساں اپر اَفسوس! کِیئانکہ تُساں پُودنے، تَہنیے تے دُویاں ںسبزیاں نا دَسواں حِصّہ اللّٰہ نے ناں اپر چائی دیݨے او۔ پر لوکاں نال اِنصاف کرنا تے اللّٰہ نال مُحبت کرنا پُہلی گئے او۔ تُساں کی چاہی نا سی کہ اِنہاں بڑیاں گلاں اپر عمل کرنے تے اِنہاں دُویاں گلاں اپر وی عمل کرنے۔ 43 او فریسیو، تُساں اپر اَفسوس! تُساں چاہݨے او کہ بنی اِسرائیل نے عِبادت خانیاں وِچ لوک تُساں کی خاص خاص جغاں اپر اگے بہالݨ، تے بازاراں وِچ تُساں کی بہُوں ہی اَدب نال چُہکی چُہکی کے سلام کریا کرݨ۔ 44 تُساں اپر اَفسوس! تُساں اُنہاں پُراݨیاں قبراں نی طرح او جیہڑیاں زِیمی نال زِیمی ہوئی گئیاں اݨ، تے لوک ناسمجھی وِچ اُنہاں اپروں لَنگی جاݨے اݨ۔“ 45 اے گل سُݨی کے بنی اِسرائیلیاں نے اِک شرِیعت نے عالم حضرت عِیسیٰ کی آخیا، ”حضُور، اِسرح نیاں گلاں کری کے تُساں اَساں کی وی بے عِزت کرنے او۔“ 46 حضرت عِیسیٰ اُسی آخیا، ”او شرِیعت نے عالمو، تُساں اپر اَفسوس! کِیئانکہ تُساں لوکاں اپر بہُوں پہار باہݨے او جیہڑے مُشکِل نال چائے جائی سکݨے اݨ۔ پر تُساں آپوں اُنہاں نی مدد کرنے واسطے اِک انگل وی نی او لاݨَے۔ 47 تُساں اپر اَفسوس! کِیئانکہ تُساں اُنہاں نبیاں نے مزار بَݨاݨے تے سَجاݨے او، جِنہاں کی تُساں نے پِیؤ دادے شہیِد کِیتا سی۔ 48 اِسرح تُساں آپوں اِقرار کرنے او کہ تُساں او کُجھ پسند کرنے او جیہڑا تُساں نے پِیؤ دادے کِیتا سی، کِیئانکہ اُنہاں نبیاں کی شہیِد کِیتا سی تے تُساں اُنہاں نے مزار بَݨاݨے او۔ 49 اے ہی وجہ اَے کہ اللّٰہ تعالیٰ اپݨی حِکمت نال فرمایا اَے، ’میں نبیاں تے خاص صحابیاں کی اُنہاں کول پہیجساں۔ او بعضاں کی قتل کرسݨ تے بعضاں کی تنگ کرسݨ۔‘ 50 اِس واسطے اِس زمانے نے لوکاں کولوں اُنہاں ساریاں نبیاں نے قتلاں نا حِساب کِہندا جاسی جیہڑے دُنیا نے شرُوع تُوں کِہنی کے ہُݨ تک شہیِد کِیتے گئَے اݨ۔ 51 حضرت ہابِیل نے قتل تُوں کِہنی کے حضرت زَکریا نے قتل تک جِسی اللّٰہ تعالیٰ واسطے قُربانی دیݨے آلی جغہ تے بڑے عِبادت خانے نے بِشکار قتل کِیتا گیا سی۔ یقِین کرو کہ اِس زمانے نیاں لوکاں کولوں اِنہاں ساریاں قتلاں نا حِساب کِہندا جاسی! 52 او شرِیعت نے عالمو، تُساں اپر اَفسوس! جِس کُنجی نال عِلم نا دروازہ کھُلݨا اے، تُساں او کُنجی لوکاں کولوں کھوئی کِہندی اَے۔ تُساں اِس دروازے وِچ آپوں وی داخِل نی او ہوئے، تے جیہڑے لوک اِس وِچ داخِل ہوݨا چاہݨے سݨ اُنہاں کی وی روکی شوڑیا۔“ 53 جیہڑے ویلے حضرت عِیسیٰ اُس کہارے تُوں باہر ٹُری گئے، تے فریسی فِرقے نے لوک تے شرِیعت نے عالم اُنہاں نیاں گلاں اپر اعتراض کرݨ لغی پئے، تے طرح طرح نے سوال کرݨ لغی پئے۔ 54 اُنہاں نا مقصد سی کہ کُسے طرح حضرت عِیسیٰ کی اُنہاں نیاں اپݨیاں گلاں وِچ ہی پَھسّائی کِہنݨ۔ |