توریت شریف: پَیدایش 48 - Mirpuri-Pahari Bible1 اُس توں بعد اِس طرح ہویا کہ کُسے حضرت یُوسف کی آخیا، «تُساں نا پیؤ بِیمار اَے.» فِر حضرت یُوسف اپݨے دوآں پُتراں مَنَسّی تے اِفرائیم کی نال کہنی کے پیؤ کول ٹُری گئے۔ 2 حضرت یعقُوب کی لوکاں دَسیا، «تُساں نا پُتر حضرت یُوسف تُساں کول آئی گیا۔» اے سُݨی کے حضرت یعقُوب اپݨے آپ کی سنبالی کے بِسترے پر بہی گئے۔ 3 فِر اُنہاں حضرت یُوسف کی آخیا، «اللّٰہ تعالیٰ مہاڑے پر لُوز نے علاقے وِچ، جیہڑا مُلخ کَنعان وِچ اَے، ظاہر ہویا. اُس مِکی برکت دیئی کے 4 آخیا کہ ”میں تُکی پھلݨ پھُلݨ دیساں تے تُہاڑی تعداد بدھاساں۔ میں تہاڑے وِچوں بہُوں قبِیلے پیدا کرساں، تے تہاڑے پِچھے تُہاڑی نسلاں کی اے زِیمی ہمیشہ واسطے ملکیَت وِچ دیساں۔“ 5 حضرت یعقُوب اپݨی گل جاری رخی، ”تہاڑے او دو پُتر افرائیم تے مَنَسّی جیہڑے مُلخ مصر وِچ مہاڑے اچھݨے تُوں پہلے جمے سݨ، او مہاڑے پُتر ہوئی گئے اݨ، جِس طرح رُوبِن تے شمعُون وی مہاڑے پُتر ہی اݨ۔ 6 ہُݨ تُہاڑی اولاد جیہڑی اُنہاں کولوں بعد جمسی، او تُہاڑی ہوسی. پر زِیمی جیہڑی اُنہاں نی وراثت ہوسی، اُس وِچ او اپݨیاں پہرواں اِفرائیم تے مَنَسّی نے نائیں نال نامزد ہوسݨ۔ 7 تکو! میں اے سب تُہاڑی ما راخِل نی وجہ تُوں کرنا پیاں. جس ویلے میں فدان نے علاقے توں اچھݨا پیا ساں، تے راخِل رائے وِچ ہی جتھے شہر افرات تھوڑا ہی دور سی مُلخے کَنعان وِچ مری گئی. تے بڑے غمیں تے افسوس نال، اُس کی میں اُتھے ہی شہر افرات نے رائے وِچ دبی شوڑیا۔» (اُس جغہ کی بیت لحم وی آخݨے اݨ.) 8 فِر حضرت یعقُوب حضرت یُوسف نیاں پتراں کی تکیا تے پُچھیا، «اے کُݨ اݨ؟» 9 حضرت یُوسف اپݨے پیؤ کی آخیا، «اے مہاڑے پُتر اݨ، جیہڑے اللّٰہ تعالیٰ اِتھے مِصر وِچ مِکی دِتے۔» تے حضرت یعقُوب آخیا، «ذرا مہاڑے کول اِنہاں کی آݨ، تاںکہ میں اِنہاں کی برکت دیاں۔» 10 پر حضرت یعقُوب نیاں اکھیاں نی لو بُڑھاپے نی وجہ نال کٹ ہوئی گئی سی۔ اِس واسطے اُنہاں کی صحیح نی سی دِسݨا۔ فِر حضرت یُوسف اپݨیاں دوآں پُتراں کی اُنہاں نے نیڑے کہنی آئے، تے حضرت یعقُوب اُنہاں کی پیار دیئی کے گلے نال لایا۔ 11 حضرت یعقُوب حضرت یُوسف کی آخیا، ”مِکی خیال وی نِی سی کہ میں تُہاڑا مُونہ تکساں. پر اللّٰہ تعالیٰ تُہاڑی اولاد وی مِکی دَسی شوڑی اَے۔» 12 فِر حضرت یُوسف اُنہاں پُتراں کی حضرت یعقُوب نیاں گوڈیاں نے سامݨے تُوں ہٹائی کے مُونہے پہار زِیمی تک چُہکے۔ 13 حضرت یُوسف اُنہاں دوآں کی کہنی کے افرائیم کی اپݨے سجے ہتھے نال حضرت یعقُوب نے کھبے ہتھے نے مقابلے وِچ، تے مَنَسّی کی اپݨے کھبے ہتھے نال حضرت یعقُوب نے سجے ہتھے نے مقابلے وِچ کری کے اُنہاں نے نیڑے کہنی آئے۔ 14 پر حضرت یعقُوب اپݨا سجا ہتھ چائی کے افرائیم نے سِرے پر رخیا جیہڑا نِکا سی، تے فِر اپݨے کھبے ہتھے کی مَنَسّی نے سِرے پر رخیا، جیہڑا بڑا سی۔ 15 اُنہاں حضرت یُوسف کی برکت دیݨیاں آخیا، «اللّٰہ تعالیٰ جس نے سامݨے مہاڑے پیؤ حضرت اسحاق تے مہاڑے دادے حضرت اِبراہِیم اپݨا زمانہ پورا کیتا، تے او اللّٰہ تعالیٰ جس ساری عمر اَج نے دیہاڑے تک مہاڑی رکھوالی کیتی اَے، 16 او فرِشتہ جس مِکی ساریاں مصِیبتاں توں بچایا اَے، اِنہاں پُتراں کی برکت دَے. اللّٰہ تعالیٰ کرے کہ مہاڑا ناں تے مہاڑے پِیؤ دادے اِبراہِیم تے اسحاقؐ نے ناں اِنہاں نے طفیل جِیݨے رہݨ، تے دُنیا وِچ اِنہاں نی اولاد بہُوں ودھے۔» 17 حضرت یُوسف کی اے تکی کے مندا لغا کہ اُنہاں نے پیؤ اپݨے سجے ہتھے کی افرائیم نے سِرے پر رخیا. تے اُنہاں اپݨے پیؤ نا ہتھ پغڑی کِہندا تانکہ اُس کی افرائیم نے سِرے تُوں ہٹائی کے مَنَسّی نے سِرے پر رَخݨ۔ 18 حضرت یُوسف اپݨے پیؤ کی آخیا، «ابا جی! اِس طرح ناں کرو، کِیئانکہ پہلیٹھی نا پُتر مَنَسّی اَے۔ اپݨے سجے ہتھے کی اُسے نے سِرے پر رخو۔» 19 پر اُنہاں نے پیؤ ناں مَنیا تے آخیا، «اے مہاڑیا پُترا! مِکی پتہ اے. مِکی پتہ اے. اِس کولوں وی اِک قوم پیدا ہوسی تے اے وی بڑا بݨسی. پر اِس نا نِکا پہرآ اِس کولوں بہُوں ہی بڑا ہوسی، کِیئانکہ اِس نی نسلاں وِچوں بہُوں قوماں ہوسݨ۔» 20 فِر حضرت یعقُوب اُنہاں دوآں کی اُس دیہاڑے اے برکت دیݨیاں آخیا، «بنی اسرائیلی لوک تُساں نے ناں کہنی کہنی کے اِس طرح دُعاواں کرسݨ کہ اللّٰہ تعالیٰ تُساں کی افرائیم تے مَنَسّی نی طرح خوش نصیب کرے.» اِس طرح اُنہاں افرائیم کی مَنَسّی پر فضیلت دِتی۔ 21 فِر حضرت یعقُوب حضرت یُوسف کی آخیا، «میں تے مرنے آلا آں. پر اللّٰہ تعالیٰ تُساں ساریاں نال ہوسی، تے تُساں کی تُساں نے پیؤ دادے نے مُلخے وِچ موڑی کے کہنی جاسی۔ 22 تے میں ہُݨ تُکی تُہاڑیاں پہراواں پر اہمیت دیئی کے زمیناں نا اِک حصہ دیݨاں جیہڑا میں اموری لوکاں کولوں اپݨی تلوار تے کمان نے زورے پر کِہندا سی۔» |