ZEPHANIAH 2 - DAÜLANGPÜ LAIHING (BSI)

¹ Oh neveüpü jathili, chemi thaituh.

² Vanglüki hahbhang maoei daipükei mangdeilang shekü, Shembüpai nemei-i lohpü am touei mangpeikei shekü, Shembüpa mongshihpü am mangngoikei shekü deih-ei dangtuh.

³ Kahdoknyü kü nenteiaokpü am peü, büpai epü dükpüthü peüi Shembüpa yemtuh. Daülangpü yemtuh, maanpü leihen yemtuh; Üpai nyingpa, Shembüpai mongshihpü nyih am hanghi kübü yanglanghen.

Philistia am Khüei Epü

⁴ Gaza chingnyü lavüngtoiyei tuhhen, Ashkelon mangtüktü yakphonghen; Haümhah shekü-üng Ashdod leipü shennyakthü changtükhen, hatü Ekron bhiyei yeemtükhen.

⁵ Yungkung kü nyupü Oh Philistia am, am onyükei! Am khüei Shembüpalei shah nyüke, Oh Kanan, Philistia kahdok. “Ngei am peü mahtükhen, hatü hükao aoei netuhphongpih.”

⁶ Yungkung kü nyupü amei kahdokü mi yombüthü ngaleshing koshoya, hatü mi khaok veshing vaitükhen.

⁷ Judah am aoei nyupüthüi ammei kahdokü jomei mi kü het ühshing vaihen, hatü Ashkelon leipü shemthü kü jom yanüng halei paümhen. Mehenangkü Shembüpa, jomei Kahvangi jom thümhen, hatü jom moihimanpü am leihühen.

Moab hatü Ammon am Khüei Epü

⁸ Ngelei nanglakthü kü Moab ami yaüpü, hatü Ammon ami thaüvaüpü ngei dantepih, hatü jomi viong lenei yah-aokpü kü longshangnyüke.

⁹ Hingmei, ngeiyü vanyangyem Kahvang, Israel amei Kahvang. Hingmei, Moab hatü Ammon amü Sodom hatü Gomorrah kei mahtükhen. Hapa shing kü phenha longei, hüm kahsha leiyei denden yaktükpü shing leitükhen. Ngelei nanglak aopüthüi hapa shing aetlanghen, hatü ngelei jathili-i ha kahdok jomei mükjüp vailanghen.

¹⁰ Jom changmeipü nanglei, Shembüpa Kahvangei nanglakthü kü yaüpü, hatü ne-ienelempü nanglei hapa nyokei danghen.

¹¹ Shembüpai jomphong nyemhühen, büpai kahdoknyü kahvangthü kong leihühen; Yungkung kübü chingthü peüha, hatü shübaong kübü jatthü peüha, laophü laophü nyushingei aümei büpa kü khümhen.

Ethiopia am Khüei Epü

¹² Oh Ethiopia am, amao ngelei yani mahkemhen.

Assyria am Khüei Epü

¹³ Büpai apshaphi khüei lak haonghen, hatü Assyria am mahtükhen; Nineveh-ü shingkong leitükhen, hatü bhih kahdok keiha vantükhen.

¹⁴ Mi khong hatü mi yombüthü, hatü lemphü yemhimakthü paümshing leitükhen. Hapa chingnyü-ü langdathü, hatü ashühlaongkaong paümshing leitükhen. Ashühlaongkaongi ümha shaden kü baktü vaühen, ashapai shaden kü uotü lokhen. Cedar pü-i vetükpü shem kü shemnyü ajung vang hengei vamkahen.

¹⁵ Hapayü monghamshi nenyemnehani nyupü chingnyü, jomei wong kü monglemei hapakei e, “Ham mon, üamao ham kei neshiü.” Mehekei shaangü yemhimak paümshing chingkow leidaipa? Ham kü peihpüleipü peüi shiinyüke, hatü ngaüm dhinyüke.