ZEPHANIAH 1 - DAÜLANGPÜ LAIHING (BSI)

¹ Amonei cheha Josiah Judah kü ong vaipü hepak kü Hezekiahlei cheha Amariah, Amariahlei cheha Gedaliah, Gedaliahlei cheha Kushi, Kushilei cheha Zephaniah touei peipü Shembüpalei shah:

Shembüpa lei Shahphenpü Nyih

² Shembüpai enyüke, kahdok shak kü nyupü lemphüli ngei chemjalak kü maoei yaktükhen.

³ Ngei shennyak hatü yemhimakthü; shangei piteipü ouhiyühthü, yungmong nyahthü maotükhen. Ngei nemeipüthü huluh shuohhühen. Ngei kahdok shak kübü hangkuli bhang mahtükhen shei Shembüpai enyüke.

⁴ Ngei Judah hatü Jerusalemei nyupüthü khüei ngelei lak nohen; Ngei halei Baal kahvang kü khümteipü douhinang aopüthü peü mangtükhen, hatü lajei khümpü ngongpathülei men katitükhen.

⁵ Shem adokei aongei vangsho lithilen kü aümei khümpüthü; Shembüpa, ngei kü aümei khümtü vangpheikü üami Molekh kahvang men kü vangeishuwnya,

⁶ Shembüpa phei nemü-i lüdaipüthü, hatü büpa baong neyempüthü, nevaijü büpa kü nephepüthü mahtükhen.

⁷ Shembüpa tou kü nenmü nyutuh; mehenangkü Shembüpai shahphenhen nyih ngoikünyüke. Shembüpai jakpü moila shuohhen temnyüke; büpai laophülei nanglakthü ha kü jakhen.

⁸ Moila jakpü nyih kü ngei ongthü, hatü jomei hapeüthü hatü kung amei owhiai owpüthü hanghihühen.

⁹ Ha nyih üami shakung benei tüteinya, hatü laophülei shembülei shemei lak shihteipai hatü gühdoui mahünya ngei hanghihühen.

¹⁰ “Hapa nyih kü” Shembüpai enyüke, Ammi Jerusalem Nyah Shaden kübü vaüpü ngeü hük, hatü jila ja kü vaüpü eepü, hatü shangtaothü bhaokpü ngeü danhen.

¹¹ Bheileih vongjeihpü jila kü nyupü ami mahng theptuh; Ammei mophimo peü thittükhen, hon hi ngin bhei leihpüthü peü mahdaikemhen.

¹² Hahepak kü ngei awdük noshi Jerusalem yemhen, hatü laophü kü laophüi mongnyangtü nyupüthü, hatü üamei mongkü Shembüpai mehe tenao meiyao nedükphapih shei deihnya, ngei jom kü shüveihen.

¹³ Jomei mophimo aetlangkemhen, jomei shemthü bentükhen. Jomi shem vehen, shejao hapa kü jom nenyuaokhen. Jomi nyalingngupai sheihen, shejao ha kübü yiü neyingaokhen.

Shembüpa lei Nyih Longpü

¹⁴ Shembüpalei nyih longpü yopailei nyüke, yopai-i hatü lomi peikünyüke. Bangtuh! Shembüpalei nyih kü theppeyü shahyaki nyukahen. Ha nyih wong kohpü veshanthüiyao nyempai thephen.

¹⁵ Hapa nyih-ü mongshih anpü nyih hük, mongshangpü hatü mongmangpü nyih, shangpongpü hatü mahpü nyih hük, vangnyak hatü dhe makpü nyih hük, phumnyaki jümpü hatü shangmang nyih hük nyukahen.

¹⁶ Penyü showtükpü chingnyüthü, hatü veyomdü khüei amit vüngpü, hatü veshanthü hok chengpü nyih hük vaikahen.

¹⁷ Ngei nanglakthü kü shangpong yakying koei peihen, hatü jomü mükphüngpathü kei kamhen. Mehenangkü jomi Shembüpa khüei mang thahteke. Jomei iy bhihla pungpükei punghen, hatü jomei phai nühinam keiha haihen.

¹⁸ Shembüpa mongshih anpü nyih jomei hon hi ngini jom neyangaokhen; Büpa mongshihpü awlah-i kahdoknyü peü shamtükhen; mehenangkü büpai kahdoknyü kü nyupüthü peü ngangahük kü dohtükkemhen.