ZEKHARIAH 8 - DAÜLANGPÜ LAIHING (BSI)

Shembüpa i Jerusalem Moihimanhen Lahnyüke

¹ Shao Jeiyong Shembüpalei shah ngei touei peiteke.

² Jeiyong Shembüpai ha enyüke: “Ngei Zion kü longi mükhühnyeih, hatü ngei pinnyü kü longi vaünyüpeih.”

³ Shembüpai hapakei enyüke: “Ngei Zionlei nyokei leihen hatü halei nyuhen; Jerusalem kü shahhing chingnyü shei nyükhen, hatü Jeiyong Shembüpalei kahshang kü daülangpü kahshang shei nyükhen.

⁴ Jeiyong Shembüpai ha enyüke: Viünyü viüpathü shao chem Jerusalem chingyangshong kü viüdaipü nangkü lenshuoh notü kamteihen,

⁵ hatü hapa chingnyü kü hashih naühai ngapüjapai chingyangshong mahen.

⁶ Jeiyong Shembüpai hapakei enyüke: Hapa hepak kü-üng aopü nanglakthü shingvaishi neaokbenüng vaihen aok, shejao hayü ngei shingvaishiyao neaokbenüng je? shei Jeiyong Shembüpai enyüke.

⁷ Jeiyong Shembüpai hapakei enyüke: Ngei ngelei nanglakthü heong heshü kahmükthü peü kübü yanglanghen;

⁸ hatü Jerusalemei nyuhen shingvaishi ngei jom nyokei leihen. Shahhing hatü daülangshemshepü kü jom ngelei nanglak vaihen, hatü ngei jomei Kahvang vaihen.”

⁹ Jeiyong Shembüpai hapakei enyüke: Phopshem ne-yei vehen chongnyiam yaong haüpü hepak kü üam nyutepa, hahepak kü “monglongtuh” shei thibüthüi epü aihük shahthü shaangao ammi dannyüke.

¹⁰ Hapa hepak shekeyü shennyak hatü yemhimak yemhahleying shing neshiüi nyuhampeih. Vepa kü nyempü nangkü üpayao meishi lathahlatying longteihen neaoki nyupeih; mehenangkü ngei hüki hük khüteihen mü leihüpeih.

¹¹ “Shejao shaang ngei aoei nyupü nanglakthü kü peihdaipü nyihthü kü kei nenopih” shei Jeiyong Shembüpai enyüke.

¹² “Jomi chingmeivangmei kü sheili haihen, nyalingngupai-i betjük jükhen, kahdoki sheili kohhühen, hatü vangshothü nyien yethühen. Hathü dou kemei aopü nanglakthülei mükjüp vaihühen.

¹³ Oh Judah hatü Israel phang, jatthü khongkü am thaüvaütükpü jat nyuteke, shejao ngei am yanghen, hatü amü moihimanpü hük vaihen. Tenyem, shejao monglongtuh.”

¹⁴ Jeiyong Shembüpai hapakei enyüke: “Mechem ambü ampai ngei mongshihhüpa, ngei am kü shanghah yah-ei peihen hatü phahji neshiüi dükhen shei deihteke hatü ngei ha dükpeih, shei Jeiyong Shembüpai enyüke.

¹⁵ Shejao shaang ngei Jerusalem hatü Judah kü moihimanhen temtepih. Am tenyem shejao monglongtuh.

¹⁶ Hathü dou ammi dükhen vongbong: Hüki hük mü shahhing eteituh, hatü shahphen shingei chingmei shingvaishi shahhing hatü jiüpü shahphen shuohtuh,

¹⁷ ammei mongkü hüki hük khüei ten dükhen tetem, hatü shahshem vangeishuwhen teken. Ngei henüng douthü kü jiühitnyeih shei Jeiyong Shembüpai enyüke.”

¹⁸ Shao Jeiyong Shembüpalei shah ngei touei pei:

¹⁹ Jeiyong Shembüpai hapakei enyüke: “Len alipabü, ngapabü, nyetpabü hatü anpabü shüaeiyunglepeyü Judah am shingvaishi mongongbenüng hepak hatü mongongpü mohitap vaikahen. Hanangkü shahhing hatü chingmeivangmei kü bamtuh.”

²⁰ Jeiyong Shembüpai hapakei enyüke: “Shennyakthü longi hatü chingnyüthü kü nyupüthü longi peikahen;

²¹ hatü chingnyü hük kü nyupüthü lebü chingnyülei daiyei hapakei ehen, ‘Huoi, jen peü chemi daiyei Shembüpa kü phopshah, hatü Jeiyong Shembüpalei moihiman yemshah. Ngei payü lüdainyeih.’

²² Shennyakthü hatü jatthü longi Jerusalemei Jeiyong Shembüpa yemei peikahen hatü büpa kü moihiman yühen.”

²³ Jeiyong Shembüpai hapakei enyüke: “Hapa nyihhihe kü shahlem hatü jat laolao kübü shennyak an peiyei Jehoda amei shennyak hükei ashakjung kü shongtü, ‘Hamphongao nüng mü daiküshah; mehenangkü Kahvangü am mü nyüke shei hami danpeih’ shei ehen.”