ZEKHARIAH 5 - DAÜLANGPÜ LAIHING (BSI)

Laidü Pipü

¹ Shao ngei ngangei vei, hatü ngei laidü hük piyei ee.

² “Nüngi mehe eenyüke?” shei büpai ngei kü phe. “Ngei laidü hük piyei eenyüke; hapayü yangkü meter shü, hatü ba kü meter ali mü bhaoei” shei ngei jangei e.

³ Hahepak kü büpai ngei kü e, “Kahdoknyü peü philei daihen thaüvaü hapa kü nyangei nyüke: Hük philei epeyü gühpa peü changtükhen, hatü hükpa lemei epeyü shahshem denbüthü peü changtükhen” shei enyüke.

⁴ Jeiyong Shembüpai enyüke, “Ngei hapa thaüvaü shomhen hatü hapa gühpalei shemei hatü ngelei men kü shahshem denbülei shemei shühen. Hapa jomei shemei shüei taukta hatü yaongthü peü mangtükhen.”

Mühdow Hük Mongei Nyüha Hük

⁵ Hahepak kü ngei mü shah eteipü phongshan ngei touei peiyei ngei kü, “Ngangei veihümao, antolei vamei daiküpü ha mehe khih?” shei eteke.

⁶ “Hapa meheang?” shei ngei phe. Büpai, “Hapayü dakteipü mühdow khih, hatü hapayü kahmük peü kü nanglakthülei mang nyüke” shei jangei e.

⁷ Hapa mühdow kü nyiam shaküp nyuteke. Ngei veishuoh shingkü hapa mongei nyüha hük uoshi nyuteke.

⁸ Büpai e, “Hapa nyühayü mang lappü hih,” hatü büpai pinnyü mühdow mongei hungei shüshih hatü shaküp küptük.

⁹ Ngei ngangei veishingkü nyüha nyi yungou kü kei yang kohtü piyei peiküteke, hatü jijinyi-i kahdok hatü vangsho aa kü hapa mühdow yüngei aongdai.

¹⁰ Ngei mü shah eteipü phongshan kü, “Henyi-i mühdow melei yah-ei dainya yo?” shei phe.

¹¹ Büpai jangei, “Hapa shingvaishi phopshem hük vehen nangkü Shinarlei yah-ei dainyu khih, hatü mechem phopshem temhen, hapa mühdow kü khümhen shingvaishi halei shingnüngei tuhhen” shei ephüteke.