ZEKHARIAH 3 - DAÜLANGPÜ LAIHING (BSI)

Ngongchong Shing Daülangpü Ashakviha

¹ Hahepak kü büpai Shembüpalei phongshan touei Joshua ngongchong yaongshi ee, hatü büpa nyonghühen shingvaishi büpalei lakdah philei Kahshih yaongshi huphüteke.

² Shembüpalei phongshani Kahshih kü eteke, “Shembüpai nüng kü lohnyüke, Oh Kahshih. Jerusalem jepü Shembüpai nüng kü lohnyüke.” Hapa shennyakü awbhaong leipü leppü awjung nevaipü je?

³ Shaang vangsho phongshan touei Joshua-i ashakten ümtü yaong.

⁴ Vangsho phongshani büpa touei yaongpüthü kü, “Büpa leipü ashakten nyiuklangtuh” shei e, hatü büpai Joshua kü, “Veituh, ngei nüngei mang yahlangtepih, hatü ngei nüng kü owja owphahen” shei eteke.

⁵ Hapheikü ngei, “Büpalei shangjing kü daülangpü shangshak shakeishuoh” shei e. Hahepak kü jomphongi Shembüpalei phongshan yaongshi nyushi büpa kü shangshak shak hatü ow owhüteke.

⁶ Shembüpalei phongshani Joshua kü,

⁷ Jeiyong Shembüpai hapakei enyüke: “Nüng ngelei lemthü kü kamjema, hatü ngei epü dükjema, nüng ngelei phopshem, hatü ngeihpü shonpü peü kü khei vaihühen, hatü hamü yaongshi nyupüthü khongkü mübü hean yahphahen” shei e.

⁸ “Shaang bangtuh, Oh Joshua ngongchong, hatü nüng touei uoshi nyupü nüngei küphüthü, amphongü ngoikahen dou nang nyangeihepü nyüke: Ngei chongphobü, üpa kü Kao shei nyüknya, shakei ngaiphahen.

⁹ Ngei Joshua touei haüpü yaong kü veituh. Hapa yaong hük kü dhe nyet nyüke, hatü ngei hapa yaong kü nyanghen shei Jeiyong Shembüpai enyüke, hatü hapa kahdok kübü mang ngei nyihcha hük kü thitei yaktükhen.

¹⁰ Hapa nyih am peüi laophülei chingyow kü laophü laophülei nyalingngupai hatü adhapü phangkü uohen thongteihen shei Jeiyong Shembüpai enyüke.”