ZEKHARIAH 14 - DAÜLANGPÜ LAIHING (BSI)

Jerusalem hatü Jatthü

¹ Veituh, Shembüpalei nyih peikünyüke; am leipü aetpüshepü douthü ammei müki eeshi hanteikahen.

² Mehenangkü Jerusalem khüei hokhen shingvaishi ngei jatthü peü thaihen, hatü hapa chingnyü yahlanghen, koyeithü gühlanghen, hatü nyühathü shülanghen; chingnyü hükkei shing wüpküpei yah-ei daihen, shejao aopü nanglakthü hapa chingnyü kübü neyahlanghen.

³ Hahepak kü peihdaipü nyihthü kü kei Shembüpa daiyei hapa jatthü khüei hokhen.

⁴ Hapa nyih kü, Jerusalem heong philei nyupü Olive Kahshang kü büpalei la-i shouphen; hatü Olive Kahshang heong kübü heshü shei nyi anei handaitü kahji longpü vamhen; kahshang bhaokphi apsha philei, hatü bhaokphi pehe philei yandaihen.

⁵ Judah am ongpa Uzziah hepak kü pedi jenpü kü nyaipükei kahshang handaitü Azel thahshi vampü kahji kü am nyaiyei daihen. Hahepak kü Shembüpa, ngelei Kahvang büpalei phongshanthü büpa mü yiükahen.

⁶ Hapa nyih kü, wohongpü nevaijü kaongpüsheüpü meheyao nechongkahen.

⁷ Nyihnüng nevaijü yanüng shei neshiü, düngei nyihnüng nyukahen; om hepak kao vangngai nyukahen; hapa hepak mechemshang Shembüpai mon nying.

⁸ Hapa nyih, Jerusalem kübü vanyangyem yunglok bhaoei yenkahen; hükkei shing heongphi yungching kü hatü hükkei shing heshüphi yungching kü cheihen; ünyü hepak kü kei shaonyü hepak kao chongkahen.

⁹ Hapa nyih, kahdoknyü peü kü Shembüpa mon ong vaihen; Shembüpa hük mon nyuhen, hatü büpalei men mon chongkahen.

¹⁰ Jerusalem pehephi Geba kahdok kübü Rimmon ngoishi kahji leitükhen. Shejao Jerusalemü Benjamin Shaden kübü Shongpü Shaden hatü Shoukpa Shaden thahshi, hatü Hananel Shangdü kübü ongpalei nyalingngupai yiü ngümshing ngoishi Jerusalemü büpalei shing kü longei anei linghen,

¹¹ hatü shennyakthü halei chingchingei nyuhen; sheyü hajük kü ha nemangtükhen. Jerusalemü meishi shaamlukdongi yangei nyuhen.

¹² Jerusalem khüei vehokpü nanglakthü kü Shembüpai hapa chami sheühühen: Jom yemmü tuhtü-üng jomei phai shedaihen; jomei mük hatü jomei yei shedaihen.

¹³ Hapa nyih kü, Shembüpai shanghah longpai jom kü honghen; shennyak ieyei laophülei chingyow kü shingeilethen hatü hüki hük khüei lak nohen.

¹⁴ Judah amao Jerusalem yanghen shingvaishi hokhen. Jomi ngeihpü shonpü jatthülei mophimo– hon, ngin hatü ashakvihathü longi aetei yahhen.

¹⁵ Aihük chamhilemi koyeithü, utthü, gaduthü hatü jomei baümtapei nyupü yemhimakthü peü dihühen.

¹⁶ Jerusalem hahhen peipü jatthü kübü yangei aopüthü peü bong ieyei Ongpa, Jeiyong Shembüpa kü khümhen shingvaishi hatü Ashakshem Mo mohen shingvaishi peihen.

¹⁷ Jat hanei dangkao Jerusalemei Ongpa, Jeiyong Shembüpa kü khümhen nepeijema, jomei kahdok kü vang nekeihühen.

¹⁸ Ijip nanglakthü halei aongei hean neyahjema, jom kü vang nekeihen.Ashakshem Mo nemopü jatthü kü shuohpükei Shembüpai jomao hapa chami dihühen.

¹⁹ Ashakshem Mo mohen nepeipü shingvaishi hapayü Ijip am hatü jatthü shingvaishi hanghi chongkahen.

²⁰ Hapa nyih kü koyeithü kü yükpü lüngha kü, “Shembüpayü Daülangshemshepü” shei nyanghen. Shembüpalei shem kü nükhihao cheüpü dükhi-üm peü moidü toueipü nükshung pati kei daülangi nyuhen.

²¹ Jerusalem hatü Judah kübü dükhi-ümthü peü Shembüpa kü daülangshemshepü nyuhen, hatü üami moila shuohnüng peihenshang jomi hathü kü cheühen, hatü hapa nyih kü Jeiyong Shembüpalei shem kü bhei leihpüthü hajük kü nechongkahen.