ZEKHARIAH 12 - DAÜLANGPÜ LAIHING (BSI)

Jerusalem hatü Jatthü

¹ Hapayü Israel am nangkü Shembüpalei shah nyüke: Shembüpa, üpai vangshothü paanei kangei deishihpa, üpai kahdoknyü chongnyiam lingpa, hatü üpai hangkuli kü laangha lingpa, büpai enyüke:

² “Veituh, ngei Jerusalemü chokpümokpü yiüshong leihühen; pinnyü kü ngeihpü shonpü jatthüi hapa yinghen hatü yiüi chokpü shennyak kei tüngtüngmüngi kamteihen, hatü mechem jomi Jerusalem shümhen, aopü Judah chingnyüthüao shümlanghen.

³ Hapa nyih, mechem kahdoknyü jatthü peü pinnyü khüei thaihen, ngei Jerusalemü jat peü shing nejenlenpü yaongnyü hük leihühen. Üami ha nohen kheteihenshang, jom nyingi mangshi ma yahhen.

⁴ Hapa nyih ngei jomei koyeithü peü nyemhühen hatü ha kü uopüthü ngatükhühen” shei Shembüpai enyüke. Ngei Judah am phang kü mük hingshi veishi nyuhen, shejao jatthülei koyeithü mükphüngtükhen.

⁵ Hahepak kü Judah am phangthüi jom nyingi, “Jeiyong Shembüpa, jomei Kahvang homei Jerusalem nanglakthüyü longi wong kohhüpü khih” shei ehen.

⁶ Hapa nyih kü, ngei Judah amü jahpandok kü aw daipükei nevaijü hah meanpü yimnyüdok awi shaampükei nyuhen; jomi ngeihpü shonpü jatthü peü laknyong lakdah shei mahtükhen, shejao Jerusalemü pinnyülei shing kü thaiyei chingchinghen.

⁷ David am phang müknyinshekhang hatü Jerusalem kü nyupüthüi Judah am dok kü longpü neleihen shingvaishi ngei, Shembüpai Judah am veshanthü kü shong aokpü shuohhen.

⁸ Hapa nyih, Shembüpai Jerusalem kü nyupüthü büpalei inyüshungi küpshi yangei tuhhen; jomphong khongkü peü mü wong nekohpübayü David kei nyuhen, hatü David am phangü Kahvang kei, Shembüpalei phongshanü jomei mübü vaihen.

⁹ Hapa nyih, Jerusalem khüpü jatthü peü mahtükhen ngei layaongei daihen.

Jomi Jütükpü kü Mahng Theppü

¹⁰ Ngei David am phang hatü Jerusalem kü nyupüthü kü phahji laangha hatü phoppü laangha shuohhen; mechem jomi jomei laki jütükpü eehen, halom didaipü kü theppükei, hatü hashongpa jaangdaipü kü youngpükei jom shahyaki thephühen.

¹¹ Hahepak kü Jerusalem kü theppü youngpeyü Megiddo Kahji Hadad-Rimmon kü theppü youngpükei longshi nyukahen.

¹² Phang ieyei laophülei shembünyüthü mü kahdok peüei mahng thephen: David am phang hatü jomei shembünyüthü mü, Nathan am phang hatü jomei shembünyüthü mü,

¹³ Levi am phang hatü jomei shembünyüthü, Shimei am phang hatü jomei shembünyüthü,

¹⁴ hatü aopü phangthü peü hatü jomei shembünyüthü peü mahng thephen.