ZEKHARIAH 11 - DAÜLANGPÜ LAIHING (BSI)

Longhiong Dodaipü

¹ Ammei penyüsha aptuh, Oh Lebanon; ammei cedar püthü awi hahtükhen!

² Theptuh, Oh awkaongpüthü; Mehenangkü cedar püthü dodaiteke; müknyinpü püthü mahtükkemteke! Theptuh, Oh Bashan longkham püthü! Yingnyü phaü agtükkemteke!

³ Mi yombüthü theppü bangtuh; jomei het ühshing mangtükteke! Mailangthü ngüngpü bangtuh; Mehenangkü Jordan yingnyü kowtükteke.

Mi Yombü Nyi

⁴ Shembüpa, ngelei Kahvangi hapakei enyüke: Jütükhen mikhong yomtuh.

⁵ Shakpü ami jom jünyüke, hatü nehanghihünyu. Jomi phai yunyüke hatü enyüke, “Shembüpa men longtuh! Mehenangkü ham shemmei leiteke,” hatü jomei mi yombüthüiyao jom kü nephahji.

⁶ “Mehenangkü ngei hajük kü kahdoknyü kü nyupüthü kü nephahjipih, shei Shembüpai enyüke. Ngei jom peü jomei ongthülei lak kü lanei shuohtükhen. Ha ongthüi kahdok kü shüveihen hatü ngei jomei lakmong kübü hathü neyangpih.”

⁷ Üami mi bhei leihnya, jomi ngelei nang yepteke, hatü ngei jütükhen mithü yombü hük leiteke. Ngei lenshuoh nyi yahteke: hük kü ngei, “Bampü” shei nyük, hatü hükpa kü ngei, “Mongjempü” shei nyük, hatü ngei mi khong jungteke.

⁸ Len hük mongkü ngei mi yombüthü jom jem changtük; mehenangkü jomi ngei kü jiühit, hatü ngeiyao mongshih.

⁹ Hanangkü ngei mi khong kü eteke, “Ngei hajük kü am yombü nevaipih; mehe dihen nyu, dituh; mehe mahhen nyu, mahtuh, hatü aopüthüi hüki hükei phai hahtuh!”

¹⁰ Hahepak kü ngei ngelei lenshuoh, “Bampü” yahteke, hatü jatthü peü mü ngei vangteishuwteipü bentükhen shingvaishi tettük.

¹¹ Hanangkü ha nyih hapa vangpüshuwpü bentük, hatü bhihhah yungyingei nyupüthü üami ngelei shah bang, jomi hapayü Shembüpalei shah khih shei nyingteke.

¹² Ngei jom kü eteke, “Ammi hapa jiüpeih shei deihjema, ngelei nanglat ngei kü yahshih; hei nevaijema, ha tuhphongtuh.” Hahepak kü jomi ngei kü ngin lop hapüan shuohteke,

¹³ hatü jomi ngei kü yahphopü lat “Phopshemei ngin tuhshingei tuhtuh” shei Shembüpai ngei kü eteke. Hanangkü ngei ngin lop hapüan yah-ei Shembüpalei phopshem lop jaoshingei tuh.

¹⁴ Judah hatü Israel aa kü jeihinaü awdep yantükpü huei, “Mongjempü” shei etü nyipabü lenshuoh ngei bhagtük.

¹⁵ Hahepak kü Shembüpai ngei kü e, “Shao chem aung neleipü mi yombülei phaihan kei düktuh.

¹⁶ Mehenangkü ngei kahmük kü mahdaipü mi neyempü, nevaijü makaw nemeihüpü, nevaijü büm meihen het ne-ühpü, shejao ladhaok kübü shaakei büm meipü jeyei jüei hahhen mi yombü hük vamhühen.

¹⁷ Oh mithü yakphongpü aung neleipü mi yombü onyükei! Yanlui büpalei bhagchong, hatü mük lakdahphi kü baphütuh! Büpalei bhagchong juwtüktuh, büpalei mükdah chemjalak kü phüngtüktuh.”