ZEKHARIAH 10 - DAÜLANGPÜ LAIHING (BSI)

Shembüpa i Judah am Junghen

¹ Bang hepak kü SHEMBÜPAleipü vang yütuh; Phumi vang leihüpeyü büpa nyüke. Büpai hangkuli kü vang shuohnyüke, hatü peüei kah kü sheili kohhünyüke.

² Yaongnaüyathüi lueilemei enyüke; Phongyompüthüi shahshem manghkhang eenyüke; jomi shahshem manghthü tetnyüke. jomi angsha nyiushemmei shuohnyüke. Hanangkü mi yombü neshiüpü mithü hanghipükei shennyakthü paüeiyonei longteinyüke.

³ Ngei mi yombüthü khüei mongshih vamnyüpeih, hatü ngei mübüthü hanghihühen; Mehenangkü Jeiyong Shembüpai büpalei mi khong Judah am phang junghen, hatü jomü vehok kü changmeipü koyei kei leihühen.

⁴ Judah am khong kübü vanglem lembüthü, mübüthü, hatü veshan mübüthü ngelei nanglakthü kü vanglem lemhen vamkahen.

⁵ Jomphongü vehok kü hampathü kei nyuhen. Chingyangshong nyaühut kü vepathü nyeütükhen; jomi hokei koyei veshanthü neütükhen; Mehenangkü Shembüpa jom mü nyüke, hatü jomi koyei kü uopüthü veühühen.

⁶ Ngei Judah am phang wong kohhühen, hatü Israel am phang yanghen. Ngei jom kü bampü nangkü jom shemei müei leihen; ngei chemao jom neyaktükpükei nyuhen; Mehenangkü ngeiyü Shembüpa, jomei Kahvang, hatü jomi phoppü kü ngei janghen.

⁷ Ephraim nanglakthüyü hampathü kei nyuhen, hatü jomei mong yiü yingpükei mongonghen. Jomei hühihathüi ha eehen, hatü mongonghen; jomei mongdangi Shembüpa kü mongonghen.

⁸ Ngei jom kü nyükhen hatü thaiyei leilanghen; Hingmei, ngei jom angei leihen, hatü sheleipükei jom longi nanglak dahen.

⁹ Ngei jom jatthü touei yantüklangmao, tailu kahdokeiyao jomi ngei deih-ei danghen, jom hatü jomei hapeüthü yangei nyuhen, hatü müeileihen.

¹⁰ Ngei jom Ijip leipü müei leihen, hatü Assyria leipü thailanghen. Ngei jom Gilead hatü Lebanon kahdokei müei leihen, hatü hapa kahdok kü jom mon maei nyuhen.

¹¹ Jomi shangpongpü yungching homei daihen, hatü ngei yungching yungmok kü bheihen, hatü chülohpü Nile jepdaihen. Changmeipü Assyria am chongei vühen, hatü Ijip amei wong mahdaihen.

¹² Shembüpa kü ngei jom wong kohhühen, hatü jom büpalei men kü kamhen shei Shembüpai enyüke.