YOUNG LAI 4 - DAÜLANGPÜ LAIHING (BSI)

Jerusalem Dopü Pheikü

¹ Mekei daülangpü hon dheshihlaümang leidaipa! Phopshem yaongthü mekei chingshongei haidaipa!

² Zion thehilathü chemü hon kei nyuhampeih, shejao shaangü haümdük bhaok kei nyüke.

³ Mahui dangkao laophülei cheha kü amma yingei jungnyüpeih; shejao ngelei nanglakthüyü bhih kahdokei ostrikh ou-i cheha kü nejungpükei nyüke.

⁴ Aeipülepai chehathüyü yei aongei shaapdok kü khadai; Chehathüi het yünyüke, shejao üpaiyao jom kü hahying neshuohnyu.

⁵ Chemü hetmeiyungma mon hahshi nyupüthü, shaangü aeipülepai chingshongei diyei nyüke; Chemü büm-ow meipai mon owtü longhahpüthü shaangü depla nyiotü nyüke.

⁶ Sodom am kü hanghihüpü kao nyeishi, ngei ngelei nanglakthü kü hanghi shuohteke; Sheühhen neshiüi kansho hük mong aa kü noei yaktükteke.

⁷ Jomei ongthü shüdao mao nyangpüba amma mao shopüba; Jomei büm douvang yaong mao meipüba; jom veiheni Sapphir kei nyuteke.

⁸ Shejao jom shaangü awkhin mao nyakpüba; chingshongei dhe hi men nenyingi shükshi nyüke. Jomü vang kü shuwi jümtü, hatü ajap kei vanei nyüke.

⁹ Hahhen yinghen neshiüi phaülei aeiyei leyei dileimeyü, vehok kü didaipüthü-üng vangmei khih.

¹⁰ Nyüthüi laophüi bampü hapeüthü jüei hah; Ngelei nanglakthü mahshingkü, hapeüthü-ü jomei hahying leipeih.

¹¹ Shembüpai mongshih wong kempai mongshih anei büpai Zion kü aw bahhü, hatü hapalei chongnyiam hahtük.

¹² Kahdoknyü kü üpa ongpaiyao, hatü üam nanglakthüiyao, Jerusalem penyüsha kü vepathü shüaokhen shei deihshi nenyuham.

¹³ Shejao hapayü thibüthülei mang tata kü, hatü ngongpathüi mang neshiüpü hangku jütükpü nangkü vampü khih.

¹⁴ Mükphüngpüthü kei jom chingshongei longteinyüke; Jomei ashakviha kü üpaiyao nehonghen mü iy-i hoitüktü nyüke.

¹⁵ “Lüdaituh! Amphong nedaüpüthü! Ngei kü tehongpha!” shei nanglakthüi lenteke. Hanangkü jomphongü benhayaha, shing nelingi longteipü am leiteke, hatü lebü jatthüi, “Jom hammü nenyuaokpih” shei eteiteke.

¹⁶ Shembüpai-üng jom yantük, büpai jom kü hajük kü neveihen, Ngongpathü kü dhüm nehuhen, mübüthü kü phahji nehuhen.

¹⁷ Angsha kü sheühpü danghen shei ongyangei veihampai mükyang yungdaiteke; Ham neyangphaaokhen jat hük kü monglemei veishi nyuteke.

¹⁸ Hamei chingyangshong kü ham nekamteihühen jomi lemei tapei nyüke. Hamei dohpü nyih yopailei ngoiyei, ham kü dohpü ngoiteke.

¹⁹ Ham kü changpüthüyü alang mao shangpüba; jomi ham kü kahshangeiyao changnyüke, hatü yingmongei ham kü tapei uoshi nyüke.

²⁰ Shembüpai thiteiphutükpü hamei yangnyu ngü jomei tailok kü mandaiteke; Büpalei vangdhüm phangkü loishi, ham jatthü mü nyuhen shei deihteke.

²¹ Mongongteituh, Oh Edom nelathü, am Uz kahdokei nyupüthü, Shejao amphong kao hapa yungshong peikahen, hatü am hapai chokei bümkong shükshi nyuhen.

²² Oh Zion nela, ammei mang lat hanghipü dohdaihen, Büpai am hajük kü küpei netuhhen. Shejao ammei mang nangkü, Oh Edom nela, büpai am hanghihühen, büpai ammei mang shakei ngaihen.