YOUNG LAI 2 - DAÜLANGPÜ LAIHING (BSI)

Shembüpa i Jerusalem Shahphenpü

¹ Shembüpa mongshihpai Zion phumnyaki jümtük. Büpai Israel am dhemeilaümapü vangsho leipü kahdokei vütük. Büpa mongshihpü nyih büpai laophülei lashoup shingao betük.

² Shembüpai phahji neshiüi Jakob nyushingao mangtük; Büpa mongshihpai Judah nelalei penyüsha-ao bentük. Büpai ongching hatü halei vanglem lempüthü dhüm neshiüi chongei vütük.

³ Büpa mongshihpai Israel amei wong bhih-eimaanei leitük; Vepa mü ponghok vanshengpü nyih kü büpalei lak temdai; Awi lemphü hahtükpükei büpai Jakob am hahtük.

⁴ Büpai ham kü vepai kei lahhani kap; büpalei lakdah-i vepai kei ham kü kapteke. Ham monghampüthü kemei büpai jütük; Zion nelalei ashakshem kü büpai aw kei mongshih bahhü.

⁵ Vepai kei Shembüpai Israel am mahtükteke; Büpai jomei ongshemthü, hatü penyüshathü peü bentükkem, hatü büpa Judah nanglak kü thephiyoung dahü.

⁶ Büpai pe hük keiha büpa khümshing, hatü büpalei ashakshem nihtük; Shembüpai Zion kü mohitap, hatü Sabbath dohtük; Büpa mongshihpai ong hatü ngongpa chemi yaktükkem.

⁷ Shembüpai büpalei moidü, hatü daülangpü Phopshem yaktük; Büpai vepathü kü ongshem leipü bham bentükhen han; Mohitap nyih kü kei jomi aokpü dangei Shembüpalei Phopshemei leneiwong.

⁸ Zion chingnyü bham laamhen Shembüpai hanteke, chemjalak kü bentükhen büpai shetei temtüktü nyu, hatü haleipü büpalei lak neleilang; Shangdüthü hatü bhamthü chemi bendaitü nyüke.

⁹ Pinnyülei pe shaden kahmongei shüdaiteke; jomei nyiam pe khih mü nihdaiteke. Pinnyülei longhiongthü peü wüpküpei daiyei lebü jatthü chi kü nyüke. Hajük kü shahkungnyü nenyuhneven; thibüthüi sheyü SHEMBÜPAleipü manghkhang ne-eehen.

¹⁰ Zion nela khong kübü behethüi sheyü ju kübü shah nevami kahdokei uoshi nyüke; Jomei shangjing kü bhihla nyiotü, hatü dhoila ashaki jümtü nyüke. Jerusalem nelathüao kahdokei dhe aümei shanyüke.

¹¹ Theppai ngelei mük poukdaiteke; ngelei nanglakthü mahdaipü nangkü ngelei mongkü tüngnyüke. Hashihthü hatü aküngnaühathü chingyangshongei shomeiyingnyüke.

¹² Jomi chenyünyü am kü, “Hahying melei danghenang?” shei phenyüke. Jomi chingyangshongei ma yahpü shennyak keiha shomeiyingnyüke, hatü nyüei lakei paümshi didainyüke.

¹³ Oh Jerusalem, ngei nüng kü mehe ephahenang? Ngei nüng mekei nyiumeihühen? Nüng kei üpaiyao shangnepongangpih, Oh Zion nelanyü. Nüngei shangpong yakying yungching kei chüshi nyüke, üpai ha meitükphahen?

¹⁴ Ammei thibüthüi am kü shahshem, hatü lueilemei manghkhang eeteke; Ammei mang ngaiyei ne-e-i chongvenpai am lueilemteke. Jomei shah-i am shahshem, hatü lempung kü müteke.

¹⁵ Ammei ching peih-ei longteipüthüi, “Hapayü dendoh nethe meipü, hatü kahdoknyü peüei mongongmongle chingnyü je?” shei peüi lak apei ngaüm dhiyei Jerusalem kü nyinyüke.

¹⁶ Nüngei vepathü peüi nüng khüei jomei ju kanyüke; Jomi jomei bha vükei, hümei, “Hami pinnyü neütüktih! Ham omdanei nyupü nyih-ü ha hih, hatü hami hapa eetepih!” shei lennyüke.

¹⁷ Shembüpai mehe dükhen shei tem, büpai ha dükteke; Büpai shelei mebü epü keiha, phahji neshiüi am mahtükteke. Büpai ammei vepathü kü aokpü danghüteke; Am dopü nangkü jom kü mongong shuohteke.

¹⁸ Shembüpa kü leneishuoh! Oh Zion chingnyü kübü bham! Vangnyak vangngai ammei mükphi yungyen kei yenhütuh; Am nyingi hüshemei tenyu, mük kü nyiumei teshuoh!

¹⁹ Paotuh, vangnyak kü Shembüpa kü leneishuoh; Shembüpa touei yung keiha ammei mongdang yenhütuh; Chingyangshong kü aeipülepai dihen mü nyupü moihiyangthü shingvaishi kah-ei haongshi phahji yütuh.

²⁰ Veituh, Oh Shembüpa, nüngi hanghi shuohpü kü! Nyühathüi laophüi bühhahpü hapeüthü jüei hahnyüke; Ngongpathü hatü thibüthü Phopshemei jütükkemnyüke!

²¹ Hashih behe kemei chingshongei diyei shükshi nyüke; nethe nelathü vepalei yani mahkemteke; Nüng mongshihpü nyih phahji neshiüi jom jütükkemteke.

²² Mohitap nyih kü kei nüngi ngeihpü shonpü ngelei vepathü kemei nyükteke; Shembüpa mongshihpü nyih kü üpayao neyangaok; Ngei büh-ei paümei, haümei longhahpü moihiyangthü vepathüi jütükteke.