SOLOMONEI KESHO 6 - DAÜLANGPÜ LAIHING (BSI)

Jerusalem Nelathüi Chenyüha kü Epü

¹ Nüngei bampüba melei daipa, Oh nyüha khongkü nela meinyü? Hamphongao nüng mü büpa yemei daikününg, büpa melei daipa?

Chenyühai Jerusalem Nelathü kü Epü

² Ngei bampüba büpalei pelei vong meipü meli touei, büpalei mithü kü het ühhen, hatü yangkheihchü bhukhen yiüei nyüke.

³ Ngeiyü ngelei bampübalei, hatü büpayü ngelei, büpai yangkheihchü yingei büpalei mithü kü ühyingnyeih.

Chepahai Chenyüha kü Epü

⁴ Ngei bampüba, nüngü Tirzah kei meiangke, Jerusalem kei bamhüshi khih, khüamlung paitü daipü veshanthü kei müknyinshi khih.

⁵ Nüngei mük ngei toueipü bienlangshih; Mehenangkü jomphongi ngei yepei tuhlangnyüke. Nüngei sho-ü yumthü Gilead shangjing leipü phaukteiyei leiküpükei shüke.

⁶ Nüngei bha-ü shotoh-i mithü hangha laktüktü leiküpükei shüke. Jom peü cheha nyi nyi müshi hükao lomja nenyu.

⁷ Shokuh phangei nüngei omdhaongü pomegranat betjük bhaoei haüpükei shüke.

⁸ Onglapeü pejem, yükphü büali, hatü pai mü ngühpü nelathü ne-ieaoki nyulangmao,

⁹ Ngelei athuba, ngelei den ngoipü hükü hayaoha hih. Ngei hük kü mon bamnyeih, hatü pinnyü keyü athuba kü kei bamhüshi, pinnyü-ü chenyüi bampü lalom. Nelathü peüi pinnyü kü veitü moihiman shei nyüknyüke; Onglapeü hatü yükphüthüi pinnyü kü vih-ei loknyüke.

¹⁰ Vanghela kei vampü, lennyü kei meipü, vanghe kei nyapü, khüamlung paitü daipü veshanthü kei müknyinshinyupü üpaang?

Shembünyüi Ehahpü

¹¹ Kahji leipü sheili kü veihen, nyalingngupai phenlak nienmang shei, hatü pomegranat betjük bong pungmang shei veinüng ngei pelei yiüpeih.

¹² Ngei ha deihhen shekü koyei khari yüpbüi vehok nang deihpü keiha, nüngi ngei kü bamhen lehüpeih.

Jerusalem Nelathüi Chenyüha kü Epü

¹³ Nyokei leikei, nyokei leikei, Oh Shulam nela; nyokei leikei, hami nüng kü veishah, nyokei leikei! Mahanaim am opü kü veipükei mehekei ammi Shulam am kü veihenang?