SOLOMONEI KESHO 5 - DAÜLANGPÜ LAIHING (BSI)

Solomoni Epü

¹ Ngei ngelei pemongei peitepih, ngelei naüpeü, ngelei shembünyü; ngei myrrh mü vong meipü meli thaitepih. Ngei ngelei nyahdük hatü nyahjiü hahtepih; ngei ngelei yiü hatü amma yingtepih. Hahtuh, Oh küphüthü, hatü moh-ei yingtuh, Oh ngei bampüthü.

Nelanyüi Epü

² Ngei shiteke, shejao mong yemmü nyupeih. Bangtuh! ngei bampübai sha kü khungnyüke. Ngei kü sha apshih, ngelei naüpeü, ngelei shembünyü, ngelei athu, ngelei meiden dohpü nelanyü. Ngelei shangjing nyieni shiedaiteke, hatü ngelei sho vanglah-i shiedaiteke.

Nelanyüi Epü

³ Ngei büm-ow kemei nyiuktüktih; mehekei ngei shao ha owhen? Ngei la phutüktih, mehekei ngei shao kahdok kü shouphenang?

⁴ Ngei bampübai sha kü laki dükteke; büpa yopailei nyüke shei ngei mong tukei nyupeih.

⁵ Ngei ngelei bampüba kü sha aphen paoshingkü, ngelei lak kü myrrh-i maei nyu, ngei shemsha lakdük kü shongshing kü myrrh yenei shaküteke.

⁶ Ngei bampüba kü sha apshuoh shingkü büpa lüdaitü chongküteke. Büpa lüdaipü nangkü ngelei mong bhagküpeih. Ngei büpa yem, shejao büpa nedang, ngei nyükshuohjao büpai nejangpha.

⁷ Ching yompüthüi ching veiyei longteishingkü ngei heüteke. Jomi ngei kü üp, hatü kaw shaphopeih; chingnyü penyüsha yompüthüi ngelei ashak nyiukei lüdaipeih.

⁸ Oh Jerusalem nelathü, ngei am kü enyeih ammi ngei bampüba heüjü bampü youngi tüngnyüke shei eyeishuoh.

Jerusalem Nelathüi Chenyüha kü Epü

⁹ Oh nyüha khongkü nela meinyü, Nüngi hamphong kü hapakei ehen mü, nüngi bampüba mih mü meshük hayaoha meipüang?

Chenyühai Jerusalem Nelathü kü Epü

¹⁰ Ngei bampüba nethe meishi, hatü wong kohshi, haja an khong kao hayaoha nyüpeih.

¹¹ Büpalei shangjingü daülangpü hon keiha, büpalei sho nyiükshi, hatü ashaba kei nyakshi nyüpeih.

¹² Büpalei mük yungyen leipü athubathü keiha, amma-i hangha laktü, yüknyü veeipükei nyüke.

¹³ Büpalei omdhaongü vong meipü vampü meli kei nyüpeih. Büpalei jubenü myrrh meli yenpü yangkheihchü kei nyüpeih.

¹⁴ Büpalei lakü douvang yaong mü honi lingpü lakshep kei nyüpeih. Büpalei büm Sapphir shihtü jintükpü meinyübha kei nyüpeih.

¹⁵ Büpalei layü douvang yaong shemnyü hon shangkü shemei lingpükei nyüpeih. Büpalei hangbongü Lebanon keiha, cedar püthü kei meishi nyüpeih.

¹⁶ Büpai shah-e ngeüsheipeyü vüngnyangi, büpayü dhaomü lümao lümi nyüpeih. Hapayü ngei bampüba, hatü hapayü ngelei küphü, Oh Jerusalem nelathü.