SOLOMONEI KESHO 4 - DAÜLANGPÜ LAIHING (BSI)

Solomoni Shembünyü kü Epü

¹ Nüng mekei nela meipüang ngei bampünyü! Oh mekei meipüang! Shokuh phangei nüngei mükü athuba kei shüke. Nüngei sho-ü Gilead Kahshang leipü yumhathü mum dheüei leiküpükei shüke.

² Nüngei bha-ü shaang mithü mum japtü hangha laktükpükei shotoh-i shüke. Jom peü cheha nyi nyi müshi hükao lomja nenyu.

³ Nüngei juben motem kei; nüngei ju lümao lümshi. Shokuh phangei nüngei omdhaongü pomegranat betjük bhaoei haüpükei shüke.

⁴ Nüngei üngü nyülüki vepü Davidei shangdü kei shüke; Hapa kü veshanthülei ii haja haja ngennyüke.

⁵ Nüngei amma nyi-ü shaok cheha nyi keiha; Pe haolei shaanpü shaok cheha nyi yangkheihchü yingei yemhahleyingpü kei shüke.

⁶ Nyihnüng mangngoi thahshi, hatü vangdhüm manglüdai thahshi ngei vong meipü kahshang, hatü ayingshü shangchingei daihen.

⁷ Ngei bampünyü, nüngü eelahen neshiüi meiangke;

⁸ Lebanon leipü ngei mü leidaishah, ngelei shembünyü, Lebanon leipü ngei mü leidaishah. Amana Kahshang kübü, Senir shangching leipü, hatü Hermon Kahshang leipü, mailang jep hatü shahnyü nyuishing leipü yanei leidaishah.

⁹ Ngelei naüpeü hatü shembünyü, nüngei mükvang nakung kü chem mon veipai; nüngei üngchong yüknyü kü chem mon mükvaungi veipai ngelei mong nüng kü shüngdaiteke.

¹⁰ Nüngi bampü mekei vüngnyangpa, ngelei naüpeü, ngelei shembünyü! Yiü mao nüngi bampü meshük meipa, hatü vong meipü meli peü mao nüngei mainga vong meshük meipüang!

¹¹ Nüngei ju kübü nyahjiü yennyüke, ngelei shembünyü; Amma hatü nyahjiü nüngei yeijaang kü nyüke. Nüngei ashak kübü meli vongü Lebanon vong kei shüke.

¹² Ngelei naüpeü, ngelei shembünyü, nüngü küptükpü pe kei; Nüngü bangtükpü yungkuk, yunglok kei shüke.

¹³ Nüngei sheilithüyü pomegranat pemong kei, meipü betjük jüknyüke; Yingmong shaanchü hatü vong meipü püthü kohnyüke,

¹⁴ Vong meipü püthü, hatü saffron, calamus hatü cinnamon, hatü ayingshü lem longi, myrrh hatü aloes, hatü vong meipü bühen pü longi vamnyüke.

¹⁵ Nüngü pemong yunglok hük, yangnyu yunglok, hatü Lebanon leipü yenei shapü yungyen hük.

Shembünyüi Solomon kü Epü

¹⁶ Paotuh, pelük, hatü peikei, aplük! Vong meipü peülei daihen shingvaishi ngelei pe kü lüktuh. Ngei bampüba büpalei pemongei peiyei haleipü betjük meipü nyemhah.