SOLOMONEI KESHO 3 - DAÜLANGPÜ LAIHING (BSI)

¹ Yanüng vangnyak ngei ngelei shinshingei ngei bampübayemei paümnyeih; Ngei büpa yempeih, shejao ngei büpa nedang. Ngei büpa kü nyükjao büpai nejangpha.

² Ngei shaang paoei chingnyülei daihen, Chingshong, shokhivaung kemeilei ngelei laanghai bampüba yemhen. Ngei büpa yempeih shejao büpa nedang.

³ Ching yompüthü heüei ngei jom kü, “Ngei bampüba heüla?” shei pheshuohpeih.

⁴ Ngei jomphong tuhtü daihinüng ngei büpa heüpeih. Ngei büh ngei paümpü onyülei ngamshem dungnukei müei manglei thahshi ngei büpa nedeishih-i shonglangpeih.

Chepahai Jerusalem Nelathü kü Epü

⁵ Oh Jerusalem nelathü, ngei am kü phaüei shaok, hatü meishiy lajathü mokpükei wong kohshi enyüpeih: Bamteiaungteihen hepak mangngoi shekü bamteihen mong kü tebongkei.

Shem Yemhen Daipü

⁶ Bhih kahdok leipü awshit tem mü lepei vampükei, bhei leihpüthüi yubenüng vong meipü meli ngü büei vamhüpü üpaang?

⁷ Veituh, Israel kü peü mü wong kohpü veshan pejem shonei yahtü, Solomon ong uoshing kü uotü yüngei deikünyüke;

⁸ Jom peüi yanlu notü vehok kü lahngpüthü yanüng nyem shaoshuohpü kü jom peüi yanlu temtüktü nyüke.

⁹ Solomon ongpai laophü shing Lebanon leipü pü yah-ei jaan lingteke.

¹⁰ Hapalei shemhathü ngini ling, hapa kü bhangpü honi, hatü uoshingü manghshempü ashak Jerusalem nelathüi lingpü yah-ei shihteke.

¹¹ Vamkei, Oh Zion nelathü, chenyüi büpa shem yempü nyih, hatü büpa mongongpü nyih Solomon kü thenshuohpü ong athen kü veihümao.