SOLOMONEI KESHO 2 - DAÜLANGPÜ LAIHING (BSI)

¹ Ngeiyü Sharon chüong hük, kahji yangkheih chübong.

Solomoni Shulam Nela kü Epü

² Hüh chi kübü yangkheihchü hük keiha ngei bampünyü nelathü chi kü nyüke.

Shulam Nelanyüi Solomon kü Epü

³ Yinghilong chi kü apple pü hük nyupü keiha ngei bampüba nethethü chi kü nyüke. Ngei hapa püdhüm phangei uohen mongongnyeih, hatü jepei veijü hapalei betjükü vüngshi shüke.

⁴ Büpai ngei mo shemei müei dai, hatü ngei shangkü büpalei khüamlungü bampü nyüke.

⁵ Nyalingngupai aani ngei wong kohhütuh, apple betjüki ngei thahümahütuh; Mehenangkü bampü youngi tüngnyüpeih.

⁶ Büpalei laknyong ngelei shangjing phangei, hatü büpalei lakdah-i ngei kü khaainyüke.

Solomoni Jerusalem Nela kü Epü

⁷ Oh Jerusalem nelathü, ngei am kü phaüei shaok, hatü meishiy lajathü mokpükei wong kohshi enyüpeih. Bamteiaungteihen hepak mangngoi shekü bamteihen mongkü tebongkei.

Shulam Nela-i Ehahpü

⁸ Ngei bampübalei ngeü banghümao! Veituh, büpa kahshangthü kü phaukteinyüke.

⁹ Ngei bampübayü shaok nevaijü meishiy laja leshi nyüke. Veituh! Halei büpa bham haolei yaongtü ümha shaden, hatü bhamvo homei veinyüke.

¹⁰ Ngei bampübai ngei kü, “Yaongtuh, ngei bampünyü, nela meinyü, hatü ngei mü huoi;

¹¹ Mehenangkü sheyü hong hepak peihdaiteke; vang keipao dohdaiteke;

¹² Kahdoknyü kü chübongalethü pungnyüke; lokei haihen hepak ngoiteke, hatü jenei kahdok kü athubathü lokpü dannyüke.

¹³ Adhapüthüi shongpü betjük jüknyüke, hatü nyalingngupai bong pungpai vong meipü vamnyüke. Yaongtuh, ngei bampünyü, nela meinyü, ngei mü huoi” shei ephopeih.

Solomoni Shulam Nelanyü kü Epü

¹⁴ Oh ngelei athubayü yaong aa kü, hatü yaongvak aamei joshi nyüke, Ngei kü nüngei dhe hushih, ngei kü nüngei ngeü danhütuh; Mehenangkü nüngei ngeü vüngnyangi, hatü nüngei dhe bamhüshi nyüke.

Shohlohpü Kesho Hük

¹⁵ Hamphong kü mahuthü yepshih, nyalingngupai kah tentükpü mahu chehathü yepshih; Mehenangkü hamei nyalingngupai bong shaang pungnyüke.

Shulam Nelanyüi Ehahpü

¹⁶ Ngei bampübayü ngelei, hatü ngei büpalei; Büpai yangkheihchü yingei büpalei mithü ühyingnyeih.

¹⁷ Vang mangngai shekü, hatü shangmang manglüdai shekü, meishiy laja keiha Bether kahshangthülei nyokei leikei.