SOLOMONEI KESHO 1 - DAÜLANGPÜ LAIHING (BSI)

Shulam am Nelanyüi Epü

¹ Solomonei kesho khongkü kesho.

² Büpalei jui ngei kü nyemjüppha! Mehenangkü nüngi bampeyü yiü mao meipüba;

³ Nüngei vong meipü meli meshük mongongbenüngang; nüngei menü vong meipü meli cheipükei nyüke; hanangkü nelathüi nüng kü bamnyüke.

⁴ Ngei nüng mü mühahtuh; ji shülangshah! Ongpai ngei büpalei dung-amei mülangpeih. Hami nüng kü mongonghen, hatü mongmeihen; Hami yiü mao nyeishi nüngi bampü jung vihhen; jomi hingmei nüng kü bamnyeih.

Shulam Nela-i Epü

⁵ Oh Jerusalem nelathü, Kedar leipü ashakshemthü kei, Solomonei ashakshem kübü haenpü ashak keiha, ngei nyakshi shejao nela meishi nyüpeih.

⁶ Ngei nyakpü nangkü ammi ngei kü tenaampha; mehenangkü ngeiyü vanghenyüi nyaktükpeih. Ngelei jeihinaüthüi ngei kü mongshih-ei ngei nyalingngupai kahthü yomhü, shejao ngelei nyalingngupai kah kü ngei nejungaok.

⁷ Ngelei laangi lümpü nüng, nüngi mithü kü het melei ühnya, hatü nyihnüng metouei nyiumeihünya, ha ngei kü eshih. Ashaki kuhlangpü nyüha keiha mehekei ngei lebü mi yombüthü mü ngei nüng yemhen?

Jerusalem Nelathüi Epü

⁸ Nyühathü khongkü peü mü nela meipü nüngi nenyingjema, mithülei lameen dhaümei daituh, hatü mi yombüthülei ashakshem yopailei nüngei yum chehathü kü het ühhütuh.

Solomoni Shulam Nela kü Epü

⁹ Oh ngei bampü, ngei nüngü Pharaoh ongpalei koyei khari khong kübü koyei cheha mü sheteiphennyüpeih.

¹⁰ Dhaongchü chüpai nüngei omdhaong bah-angke, Yüknyü yükpai nüngei üngchong meiangke.

Jerusalem Nelathüi Shulam Nela kü Epü

¹¹ Hami nüng kü ngini shahngei hon-ow hük lingphahen.

Shulam Nela-i Epü

¹² Mechem ongpa büpalei shinshingei lemshi nyupa, ngelei vong meipü meli vongi shem maküteke.

¹³ Ngei bampübayü ngelei amma nyi aa kü haüpü vong meipü melishong kei shüke.

¹⁴ Ngei kü, ngei bampübayü Engedi nyalingngupai kah leipü yingmong shaanchü chübong kei shüke.

Solomoni Shulam Nela kü Epü

¹⁵ Oh ngei bampünyü, nüng mekei nela meipüang! Oh nüngü mekei lümhüpüang! Jiei shinshingü phenha ni vaihen. Nüngei mükü athubalei mük kei shüke.

Shulam Nela-i Epü

¹⁶ Oh ngei bampüba, nüng mekei nethe meipüang! Mekei bamhübenüngang! Jiei lüngü thüngkon shang keiha,

¹⁷ Jiei shem kübü püthüyü cedar püthü kei khih, hatü shinshangü awkaongpüthü vaihen.