SHAKEI VAMPÜ 9 - DAÜLANGPÜ LAIHING (BSI)

¹ Ngapabü vangsho phongshani büpa leipü amit vüng, hatü litha hük vangsho leipü kahdoknyülei vüei ee, hatü hapa kü shaongdoh neshiüpü kahshalei sabi shuoh.

² Mechem büpai shaongdoh neshiüpü kahsha appa, hapa kahsha leipü aw longi jakpü awshit kei vamei hapa kahsha leipü awshiti vanghe hatü phumshang manghdai.

³ Hapheikü awshit leipü shoukthü vam, hatü jomphong kü kahdoknyü leipü yiüjikaungkang kü shuohpükei ngan shuoh.

⁴ Jomphong kü kahdok kübü thüng nevaijü phenha vampü nevaijü püthü nemangtükhen eteke, shejao Kahvangei füoshang jomei shangba kü neshüngpü nanglakthü kü nemeihen eteke.

⁵ Jomphong kü lenyang nga shüveihen, shejao nejütükhen e, hatü jom shüveipeyü yiüjikaungkangi japei shüveipükei shüveihen eteke.

⁶ Hathü nyih kü shennyakthü dihen yemhen, shejao nedanghen; jom dihüei ongyanghen, shejao dipeyü jom toueipü nyaidaihen.

⁷ Veiheni shoukthüyü vehokei dainüng tempü koyeithü kei nyuteke. Jomei shangjing keyü veiheni hon athen kei; jomei dhe shennyakei dhe kei,

⁸ jomei sho nyühathülei sho kei, hatü jomei bha mailangei bha kei;

⁹ jomei ka jaküpnyiam kei, hatü jomei ngeü koyei khari longi vehokei daipü ngeü kei nyuteke.

¹⁰ Jomei meiyü yiüjikaungkangei mei kei sheihen kohshi, hatü jomei mei lenyang nga thahshi shennyakthü kü shüveihen ngan kohshi nyuteke.

¹¹ Jomei ongü shaongdoh neshiüpü kahshalei vangsho phongshan nyu, hatü büpalei menü Hebrew shah mü Abaddon, hatü Greek shah mü Apollyonf nyüke.

¹² Shongpü onyükei peihdai. Shao-üng onyükei nyi peikahen nyüke.

¹³ Hapheikü vokpabü vangsho phongshani büpalei amit vüng, hatü Kahvang toueipü hon moidü leipü vaung ali leipü ngeü hük vamei,

¹⁴ amit nopü vokpabü vangsho phongshan kü, “Longpü Euphrates yungyenei küpshi nyupü vangsho phongshan ali veyeishuoh” shei epü ngei dan.

¹⁵ Hanangkü hangku phaihan jem kübü hük jühen ghonda, nyih, len hatü vangbong shingvaishi temei küpshi tuhpü vangsho phongshan ali veyei deishih.

¹⁶ Koyei dokshangei uopü veshanthü million kho nyi nyu. Ngei jomei bhei-ie danteke.

¹⁷ Ngelei manghkhang kü koyei hatü halei uopüthü hapakei eepeih: Koyei kü uopüthüyü jaküpnyiam owtü jomei owü aw kei hakshi, sapphir kei thüngshingi, hatü sulphur kei vungpuh-i nyuteke, hatü koyeithülei shangjingü mailangthülei shangjing kei, hatü aw, awshit hatü sulphur jomei ju leipü vamteke.

¹⁸ Hapa cham jem homei hangkuthü phaihan jem kübü hük jomei ju kübü aw, awshit hatü sulphur vamei hahtükteke.

¹⁹ Mehenangkü koyeithülei wongü jomei ju hatü mei kü nyuteke; jomei meiyü biü kei shangjing kohshi hatü hathüi shennyakthü kü nemei-i dükteke.

²⁰ Aopü hangkuthü, üam hapa cham kü nejütük, hathüi jomei lakdou nevaijü kahshih nevaijü hon, ngin, melangnyiam, yaong hatü pü yah-ei lingpü müki ne-ee, nevaijü nedan, nevaijü nekamaokpü lajeithü kü khümpü kübü nedoh.

²¹ Jomi jüteipü, nevaijü thiphepü nevaijü iyjeiphaileipü nevaijü gühpü kübü mong nelep.