SHAKEI VAMPÜ 6 - DAÜLANGPÜ LAIHING (BSI)

Füoshang Nyet

¹ Hapheikü ngei Mi Chehai füoshang nyet khongkü hük apei ee, hatü ngei yemmü nyupü yemhathü ali khongkü hüki vangmuk ngeü keiha, “Peikei!” shei nyükei dan.

² Ngei veishingkü koyei shola hük nyuteke. Hapa kü uopübalei pülah hük nyu, hatü büpa kü ong athen hük shuoh, hatü büpa vehok neüyaki hatü shao neühen vamei dai.

³ Mechem büpai nyipabü füoshang appa, nyipabü yemmü nyupü yemhai, “Peikei” shei nyükpü ngei dan.

⁴ Hahepak kü lebü koyei hük, ngaiphah-i hakshi vam; shennyakthü hüki hük jüteihen shingvaishi hapa kü uopüba kü kahdoknyü leipü chingmei yahlanghen ngan shuohteke; hatü büpa kü yanlu longpü hük shuoh.

⁵ Mechem büpai jempabü füoshang appa, jempabü yemmü nyupü yemhai, “Peikei” shei nyükpü ngei dan. Ngei veishuohjü koyei nyakla hük halei nyu. Hapa kü uopübalei shethen lüng noshi nyu,

⁶ hatü ngei yemmü nyupü yemhathü ali leipü ngeü keiha, “Nyih hükei nanglat kü wheat dok hük, hatü nyih hükei nanglat kü barley dok jem; shejao nüngi olive mainga hatü yiü temangtük” shei epü dan.

⁷ Mechem büpai alipabü füoshang appa, alipabü yemmü nyupü yemhai, “Peikei” shei nyükpü ngei dan.

⁸ Ngei veishuohjü haipih-i thüngpü koyei hük nyu. Hapa kü uopübalei menü Dipü nyuteke, hatü büpa mü yimching müshi ee; hatü jomphong kü kahdoknyü phaihan ali kü phaihan hük kü yani, münghishaü-i, chamhilemi hatü phaüyemthüi jühen ngan shuoh.

⁹ Mechem büpai ngapabü füoshang appa, ngei moidü phangei Kahvangei shah nangkü, hatü jomi denpü shuohpü nangkü jütükpüthülei laangha eeteke;

¹⁰ Jomphongi ngeüwong anei, “Jeiyong Shembüpa, daülangpü hatü hingshangpü, kahdoknyülei nyupüthü kü hamei iy nangkü nüngi shahphenhen hatü bhüh yemhen shekü meshük lushi nyuhen?” shei lenteke.

¹¹ Jom peü kü bhagthuh shola hük baong shuoh, hatü jomphong jütükpükei jom mü jempü chongphobüthü, hatü jomei jeihinaü nyahinaüthü jüpü bhei-ie manglom thahshi maani danei nyuhen eteke.

¹² Mechem büpai vokpabü füoshang appa, ngei veishuohjü pedi longpü hük vükei pei; vanghenyü ashak nyakla kei nyakdai, lennyü iyshüm kei hakdai,

¹³ hatü vanglük longi lükjü ünyü kü adhajük shüm vüpükei vangshang leipü lithathü kahdoknyülei vüteke.

¹⁴ Vangshangü phaishuw düpükei düei mahdai, hatü kahshang hi shübaong peü hapalei shing kübü lüdaikem.

¹⁵ Hahepak kü kahdoknyü kübü ongthü, vanglem lempüthü, veshan longpüthü, shemmei, wong kohpüthü, aa hatü aa nevaipü bümeithü peü yaongsha hatü kahshangthü leipü yaongnyüthülei joteke,

¹⁶ hatü jomi kahshang hatü yaongnyüthü kü nyüktü, “Ham kü vüei shükshih, hatü ong uoshing kü uopübalei dhe kübü, hatü Mi Cheha mongshihpü kübü ham jolangtuh.

¹⁷ Mehenangkü jomei mongshihpü longpü nyih peiteke, hatü üpai hapa khüei yaongaokhen?” shei eteke.