SHAKEI VAMPÜ 5 - DAÜLANGPÜ LAIHING (BSI)

Laidü hatü Mi Cheha

¹ Hapheikü ngei ong uoshingei uopübalei lakdah philei laidü hük mong philei hatü ngaümphei philei nyangtüktü, ha kü füoshang nyet shüngtü noshi eeteke,

² hatü wong kohpü vangsho phongshan hülei ngeüwong anei lenei, “Üpai hapa laidü ap-aokhen hatü hapa füoshang mangaokhen?” shei eteke.

³ Shejao vangsholei nyupü nevaijü kahdokei nyupü nevaijü kahmongei nyupü üpaiyao hapa laidü aptü ha mongei neveiaok.

⁴ Hanangkü ngei shahyaki thephen pang; mehenangkü üpaiyao hapa laidü apei ha mongei veihen shangpü nenyuang.

⁵ Hahepak kü behethü khongkü hüki ngei kü, “Nüng tethep. Veituh, hapa laidü ap-aokhen hatü füoshang nyet mangtükhen Judah jat amei Mailang, Davidei tünglangi aokpü dangteke” shei eteke.

⁶ Hapheikü ngei ong uoshing hatü yemmü nyupü yemhathü aa kü, hatü behethü khong mü Mi Cheha hük jütükphei keiha vaung nyet hatü mük nyet, mepa kahdoknyü peü lemei shompü Kahvangei laangthü nyet nyu, ha eeteke.

⁷ Büpa heih-ei ong uoshingei uoshi nyupübalei lakdahphi leipü laidü yahteke.

⁸ Mechem büpai laidü yahpa, yemmü nyupü yemha ali hatü behethü hapüali-i Mi Cheha touei aümei sha, hatü jom peüei harp, hon shung kü ayingshü maei shihtü nyu, hathüyü daülangpüthüi phoppü nyuteke.

⁹ Jomphongi kesho ja hük lok: “Nüngü laidü yahhen, hatü hapalei füoshang aphen shangpü; mehenangkü nüng jütükteke, hatü nüngei iy homei Kahvang shingvaishi jat, shahlem, nanglak hatü kahmük peü kübü daülangpüthü angei leiteke;

¹⁰ nüngi hathüyü ongching, hatü jenei Kahvang chongphopü ngongpathü leihüteke, hatü jom kahdoknyülei vanglem lemhen.”

¹¹ Hapheikü ngei veishingkü ong uoshing shinei vangsho phongshanthü longi, hatü yemmü nyupü yemhathü hatü behethülei ngeü danteke; jomphongü million dok kü million, haja dok kü haja,

¹² ngeüwong anei lokei e, “Jütükpü Mi Chehai ngan, mop, kihikon hatü wong, hatü dhüm, müknyinshekhang hatü moihiman yahhen shangpeih.”

¹³ Hahepak kü vangsho, kahdok, kahmong hatü yungching hatü halei nyupü yemhimakthü peüi hapakei lok: “Ong uoshing kü uopüba kü, hatü Mi Cheha kü moihiman, hatü dhüm, müknyinshekhang hatü wong den den kü nyutuh.”

¹⁴ Hatü yemmü nyupü yemhathüi, “Amen!” shei e, hatü behethüi aümei shaei khümteke.