SHAKEI VAMPÜ 4 - DAÜLANGPÜ LAIHING (BSI)

Vangsholei Khümpü

¹ Hapa pheikü ngei veiteke, hatü vangsholei sha hük aptüktü nyuteke. Shongpü ngeü amit keiha ngei kü epü danpeyü, “Halei aongkei, hatü hapa pheikü mehe vamhen ngei nüng kü huphüshah” shei e.

² Chem ngei Laangha kü nyu, hatü vangsholei ong uoshing hük vam hatü hapa ong uoshing kü hük uoshi nyu,

³ hatü halei uopü hükü veiheni jasper hatü karnelian douvang yaongthü kei hatü ong uoshing shinei emerald douvang yaong kei nyiamnyünyiamkang shinei nyuteke.

⁴ Hapa ong uoshing shinei ong uoshing hapüali nyu, hatü hathü kü behethü jom hapüali shola ow owtü, hatü jomei shangjing kü hon athen thentü nyuteke.

⁵ Hapa ong uoshing kübü klang nyepei, vangmuk khungei vam, hatü ong uoshing she philei aw nyet jak; hathüyü Kahvangei laangha nyet nyuteke;

⁶ hatü hapa ong uoshing she philei aina keipü yungching hük chüshaü kei daüshi nyuteke. Ong uoshing shinei hatü ong uoshing peü philei yemmü nyupü yemha ali ngaümphei shelang kemeilei mük mon maei nyuteke.

⁷ Shongpü yemmü nyupü yemhayü mailang kei, nyipabü-ü mohohbaong kei, jempabü-ü shennyakei dhe kei kohtü nyu, hatü alipabü-ü alang pipükei nyuteke.

⁸ Yemmü nyupü yemhathü ieyei kü yang vok baong kohtü mük mon shinei hatü mongeiyao kohshi nyuteke. Nyakhingai thüngei hathüi nedoh-i hapakei lokteke: “Daülangpü, daülangpü, daüpangpü, Jeiyong Shembüpa Kahvang, Üpa nyu, üpa nyüpa hatü üpa peikahen nyu.”

⁹ Mechem yemmü nyupü yemhathüi ong uoshingei den den kü nyupüba kü müknyinshekhang, dhüm hatü menvih shuohpa,

¹⁰ behethü hapüali-i aümei shaei ong uoshingei uopü den den kü nyupüba kü khüm; jomi jomei athen yah-ei ong uoshing touei shüktü lokei,

¹¹ “Nüngü müknyinshekhang, dhüm hatü wong yahhen shangpüba, hamei Shembüpa hatü Kahvang; mehenangkü nüngi dou peü ling, hatü nüngi mongpü nangkü hathü nyuteke hatü lingteke.”