SHAKEI VAMPÜ 3 - DAÜLANGPÜ LAIHING (BSI)

Sardis Attoi kü Shahjang

¹ Sardis kübü attoi leipü phongshan kü nyangtuh: Hathüyü üpalei lakei Kahvangei laangha nyet hatü litha nyet nyu, büpalei shahthü: “Ngei ammei douthü nyingnyeih; amü yemmü nyüpeih shei menvih yahnyüke, shejao am mahngchang khih.

² Paotuh, mehe aoei nyu, ha didaishekü wong kohhütuh; mehenangkü ngei ammei douthü Kahvang touei den ngoiyei ne-eeang.

³ Ammi mehe yah hatü dan, ha deih-ei dangtuh; hapa ven bangtuh hatü mong leptuh. Am shipü kübü nepaojema, ngei gühpa hük keiha peikahen, hatü ngei mepa hepak kü peikahen ammi nenyinghen.

⁴ Shejao shaang thahshi Sardislei shennyak hanei laophülei ashakviha nesheihtükpü nyüke; jomphong ngei mü shola ow owtü kamhen; mehenangkü jomphongü hapakei dükhen changpüthü.

⁵ Ammi vehok neüjema, amphongao jomphong kei shola ow owhen, hatü ammei men vanyangyem laitap kübü nethittükhen; ngei ammei Opa hatü büpalei vangsho phongshanthü touei lahhen.

⁶ Üpa kü banghen dhaong nyu, Laanghai attoithü kü mehe enya bangtuh.”

Philadelphia Attoi kü Shahjang

⁷ Philadelphia kübü Attoi leipü phongshan kü nyangtuh: Hathüyü daülangpü hük, hingshangpü hük, üpalei lakei Davidei sabi nyüpa, üpai aptükjü lebü üpaiyao neküp-aok, üpai küptükjü lebü üpaiyao ne-apaok, hayü büpalei shahthü:

⁸ Ngei ammei douthü nyingnyeih. Veituh, ngei am touei sha hük apei tuhnyeih, hapa üpaiyao neküp-aokhen. Am kü wong maani mon nyüke shei ngei nyingnyeih, shejao ammi ngelei shah bangei notei hatü ngelei men neyaktük.

⁹ Ngei, Satanei Sinagog, üami Jehoda am hih shei enya, shejao nevai, hatü shahshem epüthü nyüpa, ngei jomphong deiyei ammei la tüngei aümei khümhühen, shejüang ngei am kü bamnyu khih shei jomi nyinghen.

¹⁰ Mehenangkü ammi ngelei shah munenei bangteke; kahdoknyü kü nyupüthü peü touei dokhen hepak hük ngoikünyüke, ha dokpü hepak kü ngei am yangei tuhhen.

¹¹ Ngei lomi peikünyeih, hatü ammi ammei lakei mehe nyu ha kü wongshongi shümtuh, shejüang üpaiyao ammei athen neyahlanghen.

¹² Ammi vehok neüjema, ngei amü ngelei Kahvangei phopshemei shemnyü hük leihühen; am haleipü vamei nedaihen. Ngei am kü ngelei Kahvangei men hatü ngelei Kahvangei chingnyü men nyanghen; hayü vangsho leipü vamei ngelei Kahvang leipü yiüpü ja Jerusalem hatü ngelei men ja nyuhen.

¹³ Üpa kü banghen dhaong nyu, Laanghai attoithü kü mehe enya bangtuh.

Laodikea Attoi kü Shahjang

¹⁴ Laodikea kübü attoi leipü phongshan kü nyangtuh: Hathüyü Amen, hingshangpü hatü shahhing denbü, Kahvangi lingpü kü vanglem lembülei shahthü:

¹⁵ Ngei ammei douthü nyingnyeih; amü shamao nevai, vüngao nevai. Amü sham nevaijü vüng vaihen khih shei ngei deihnyeih.

¹⁶ Hanangkü am adukduki shamao nevai vüngao nevaipü nangkü ngei ngelei ju leipü am yaitükhen.

¹⁷ Mehenangkü ammi, “Ngeiyü shemmei hih, ngei lemphü nyüpeih; meheyao netaonyih” shei enyüke. “Shejao amü lomoh aühaü mong kü nemeipü, taopü, mükphüngpü hatü bümkong kü nyüke shei nenyingnyu.

¹⁸ Hanangkü am shemmei leihen, hatü veübenüng ammei bümkong eelangmangkü ha banghen ashak shola ümhen, hatü ammei mük eehen nangkü meli shakhen aw kü jakei daütükpü hon shakhahtuh shei enyeih.

¹⁹ Üam kü ngei bam, hathü kü loknyeih hatü hanghi shuohnyeih. Hanangkü am maanpü leituh hatü mong leptuh.

²⁰ Bangtuh, ngei shem shadenei yaongtü khungnyüpeih; ammi ngelei ngeü danei sha aphüjema, ngei ammei mongei shühen hatü ngei am mü hahyinghen, hatü am ngei mü hahyinghen.

²¹ Üpai vehok neünya, ngei vehok neütü Opa mü büpalei ong uoshing kü uopükei büpaao ngei mü ngelei ong uoshing kü uohen shing shuohhen.

²² Üpa kü banghen dhaong nyu, Laanghai attoithü kü mehe enya bangtuh.”