SHAKEI VAMPÜ 20 - DAÜLANGPÜ LAIHING (BSI)

Bong Haja Hük

¹ Hapheikü ngei vangsho phongshan hük shaongdoh neshiüpü kahshalei sabi hatü lakei nyiamvü notü yiüküpü ee.

² Büpai Dragon, aivang biü, üpa kü Kahshih hatü Satan shei enya, yepei bong haja hük shingvaishi shatü,

³ kahshalei shüktük hatü vangbong haja hük manglom thahshi büpai nanglakthü kü nelunelemhen shingvaishi sabi yüptü ha kü füoshang shüngtükteke. Hapheikü büpa kanja shingvaishi ngaihen.

⁴ Hapheikü ngei ong uoshingthü, hatü halei uopüthü kü shahphenhen wong shuoh-ei ee. Shao ngei Jisu jung denpü shuohpü hatü Kahvangei shah nangkü sho mahpüthülei laanghathü ee. Jomphongü yemha hatü hapalei lajei kü nekhüm, hatü jomei shangba hatü lak kü yemhalei füoshang neshüngpüthü nyuteke. Jom yangei leiyei Khrista mü bong haja hük vanglem lemteke.

⁵ (Lebü dipüthü bong haja hük manglom thahshi yangei nelei.) Hapayü shongei yangei leipü nyüke.

⁶ Shongpü yangei leipü khongkü hean yahpüthü moihiman hatü daülangpü. Jom shak kü nyipabü dipülei ngan neshiü, shejao jomü Kahvang hatü Khristalei ngongpathü vaihen, hatü jomphongü Khrista mü bong haja hük vanglem lemhen.

Satan Mahpü

⁷ Mechem bong haja hük peihhenshang, Satan shao khoklat leipü vehen,

⁸ hatü büpai kahdoknyü vaungjung ali kübü nanglakthü, lappai, Gog hatü Magog lueilemhen shingvaishi vamkahen. Büpai hathü yungching yungkung leipü bhihla kei hokhen shingvaishi thaihen.

⁹ Jomi kahdoknyü ba kü yaüei daiyei daülangpüthülei baümtap hatü daülangpü chingnyü kü shonteke. Hahepak kü vangsho leipü aw yiüei jom hahtük,

¹⁰ hatü jom luhahpü kahshih-ü yemha hatü shahshem thibü nyupü awkaong meli bahpü aw shemyungei yepei shüktükteke; jom halei nyakhingai thüngei den den kü hanghiyei nyuhen.

Dipüthü Shahphenpü

¹¹ Hapheikü ngei longpü ong uoshing shola hatü halei uopüba ee; kahdok vangsho büpa toueipü nyaidaikemi ee, hatü jom shingvaishi shing neshiüi leidai.

¹² Hatü ngei dipüthü longpü maanpü peü ong uoshing touei yaongshi ee, hatü laithü apteke. Shao lebü lai hük, yangnyu laitap apteke, hatü dipüthü peü lailei nyangei nyupü jomei dou aimü shahphenteke.

¹³ Yungchingiyao halei dipüthü nyokei shuoh, Dipü hatü Yimchingiyao halei nyupüthü nyokei shuoh, hatü jom peü kü laophüi dükpü aimü shahphenteke.

¹⁴ Hapheikü Dipü hatü Yimchingü aw shemyungei shüktük. Hapa aw shemyungü nyipabü dipü.

¹⁵ Hapa yangnyu laitap kü men nyangei nenyupüthü hapa aw shemyungei shüktükteke.