SHAKEI VAMPÜ 19 - DAÜLANGPÜ LAIHING (BSI)

Vangsholei Mongongpü

¹ Hapa pheikü khongnyü longpülei ngeü keiha ngei vangsholei hapakei eyei dan: “Halleluyah! Yemleipü, müknyinshekhang hatü ngan jenei Kahvangei,

² mehenangkü büpai shahphenpeyü hingshangpü hatü shahhing; Pinnyülei mükbongjuyung homei kahdoknyü tentükpü longpü büm yupü kü büpai shahphenteke, hatü büpai laophülei daülangpüthülei iy nangkü pinnyü kü bhüh yemteke.”

³ Shao chem jomphongi eteke: “Halleluyah! Den den kü pinnyü leipü awshit vamnyüke.”

⁴ Hahepak kü ong uoshingei uopü behethü hapüali hatü yemmü nyupü yemhathü ali-i Kahvang kü aümei shaei khümei eteke: “Amen. Halleluyah!”

⁵ Hahepak kü ong uoshing leipü ngeü hük vamei hapakei e: “Jenei Kahvang vihtuh, amphong büpa chongphopüthü peü, hatü büpa kü nyempü longpü maanpü peü.”

⁶ Hapheikü ngei khongnyü longpülei ngeü kei, yungmok ngeü kei, hatü klang vangteng ngeü kei lenei epü ngei hapakei danteke: “Halleluyah! Mehenangkü jenei Shembüpa, Jeiyong Kahvangi vanglem lemnyeih.

⁷ Jeni mongongmongleshah, hatü büpa kü müknyinshekhang shuohshah! Mehenangkü Mi Cheha shem yempü ngoiteke, hatü büpalei yiükjingla temei nyüke.

⁸ Meipü nyemin ashak, ngaiphapü hatü daülangpü pinnyü kü owhen shuohteke.” Meipü nyemin ashakü daülangpüthüi shahhing dou dükpü nyüke.

⁹ Hahepak kü vangsho phongshani ngei kü, “Ha nyangtuh: Mi Cheha shem yempü mo kü üam kü nyük moihiman!” Shao büpai, “Hathüyü hingshangpü Kahvangei shah” shei eteke.

¹⁰ Hahepak kü ngei büpalei la tüngei khümnüng aümei sha, shejao büpai ngei kü, “Nüngi ha tedük! Ngeiyü nüng mü chemi chongphopüba hatü Jisulei denpü kopü nüngei küphü. Kahvang kü khümtuh. Mehenangkü Jisu jung denpeyü tetpüvanpü laangha” shei eteke.

Koyei Shola Dokshangei Uopüba

¹¹ Hapheikü ngei vangsho aptüktü ee, hatü halei koyei shola hük nyuteke. Hapalei uopüba keyü Monglemaokpü hatü Hingshangpü shei nyük. Büpai shahhingi shahphennyeih hatü vehok hoknyeih.

¹² Büpalei mükü awlom keiha hatü büpalei shangjing kü ong athen longi nyüke. Büpa mü lenei üpaiyao nenyingi büpalei men hük nyangtüktü nyüke.

¹³ Büpayü iy kü hüngtükpü bhagthuh thuhshi nyuteke, hatü büpalei menü Kahvang Shah.

¹⁴ Vangsho leipü veshanthü büpa phei kü müshi, koyei sholathü kü uotü meipü, shotohpü hatü daülangpü nyemin ashak owtü nyuteke.

¹⁵ Büpalei ju leipü jatthü kü baphen nahpü yanlu vamnyüke. Büpai jom shak kü nyiam lenshuoh notü vanglem lemhen. Jeiyong Kahvang mongshihpai hapa nyalingngupai ngümshingei büpai shouptükhen.

¹⁶ Büpalei bhagthuh hatü shüngkung kü büpalei men hapakei nyangei nyüke: “ONGTHÜ KHONGKÜ ONGPA HATÜ SHEMBÜTHÜ KHONGKÜ Shembüpa.”

¹⁷ Hapheikü ngei vangsho phongshan hük vanghenyü kü yaongshi ee, hatü ngeü longpai büpai vangsho jiamei pipü shangouthü kü, “Peikei, Kahvangei mo longpü kü thaikei,

¹⁸ hatü ongthülei phai, veshan mübüthülei phai, wong kohpüthülei phai, koyei hatü halei uopüthülei phai, aa hatü bümei, longpü hatü maanpüthü peüei phai hahtuh” shei nyükteke.

¹⁹ Hahepak kü ngei yemha hatü kahdoknyü ongthü mü jomei veshanthü chemi thaitü koyeilei uopüba hatü büpalei veshanthü khüei hokhen thaipü eeteke.

²⁰ Shejao hapa yemha hatü hapalei shahshem thibü üpai nyangeihepü dou dükpü homei yemhalei füoshang shüngpüthü hatü hapalei lajei kü khümpüthü luhahpa, yeplangteke. Henyiphen awkaong meli kü bahpü aw shemyungei yemmü yepei shüktükteke.

²¹ Aopüthü kemei koyei kü uopübalei ju leipü vampü yanlui jütük, hatü phaüouthüi jomei phai hahteke.