SHAKEI VAMPÜ 18 - DAÜLANGPÜ LAIHING (BSI)

Babylon Dodaipü

¹ Hapheikü ngei lebü vangsho phongshan hük wong longpü kohtü vangsho leipü yiüküpü ee, hatü büpalei müknyinshekhangi kahdoknyü nyaei lei.

² Büpai ngeü longpai nyükei e: “Doteke, doteke longpü Babylon! Hapayü kahshihthü nyushing leidaiteke, mang laangha hatü jiühitbenüng outhü nyushing, mang laangha hatü jiühitbenüng yemhathü nyushing.

³ Mehenangkü jatthü peü pinnyülei mükbongjuyungpü mongshih yiüi chokkemteke; hatü kahdoknyü ongthüi pinnyü mü mükbongjuyungteke, hatü kahdoknyü kü bhei leihpüthüi pinnyüi dameihupü mopi shemmei leiteke.”

⁴ Hapheikü ngei vangsho leipü lebü ngeü hük hapakei eyei dan: “Ammi pinnyülei mang kü hean neyahhen shingvaishi, hatü pinnyülei cham nehanhahhen shingvaishi pinnyü leipü vamdaikei ngelei nanglak;

⁵ mehenangkü pinnyülei mangü vangsho kei shaoshi shüngshi nyüke, hatü Kahvangi pinnyülei mang deih-ei dangteke.

⁶ Pinnyüi shuohpükei pinnyü kao yah-eishuoh, hatü pinnyülei dou kü shing nyi shemeishuoh; pinnyüi vukpü pati kü ühivan shing nyi vukeishuoh.

⁷ Pinnyü laophü nyingi duhah-ei, hatü nyiumei kü nyupükei pinnyü kü hanghi mongshang yah-eishuoh. Pinnyülei mongei pinnyüi, ‘Ngei onglanyü kei vanglem lemnyeih, ngeiyü vaümnyü nevai, hatü ngei mongshang mechemao nepongpih’ shei enyüke.

⁸ Hanangkü pinnyülei cham nyih cha kü peihen, dipü, theppü hatü shaühile; hatü pinnyü awi hahtükhen, mehenangkü pinnyü kü shahphenpeyü wong kohpü Shembüpa Kahvang.”

⁹ Pinnyü mü mükbongjuyung dükei pinnyü mü nyiushemmei kü nyupü kahdoknyü ongpathüi pinnyü kü aw bahpü awshit eeyei pinnyü kü mahng thephen hatü younghen.

¹⁰ Pinnyü ponghahpü eeyei jom tailei yaonghen hatü ehen: “Onyükei, onyükei longpü chingnyü, Babylon wong kohpü chingnyü! Mehenangkü ghonda hük kü nüng kü shahphenpü peiteke.”

¹¹ Kahdoknyü kübü bhei leihpüthüi sheyü jomei dou üpaiyao neshakpü nangkü pinnyü kü mahng thepnyüke hatü youngnyüke,

¹² hathüyü hon hanggo, ngin, yüknyü, hatü douvang yaongthü, meipü nyemin ashak, manghmepü, nyülükpü hatü hakla ashakthü, vong meipü büpü püthü peü, meinyübha-i lingpü douthü, bhei wongpü püi lingpü douthü, melangnyiam, nyiam, marble,

¹³ cinnamon, hetnyai, vongmei meli, myrrh, ayingshü, yiü, olive mainga, meipü atta, hatü wheat, mohoh, mi, koyei, koyei kharithü, aathü hatü hangkulei yangnyu nyüke.

¹⁴ “Nüngei laanghai ongyangpü betjükthü nüng toueipü lüdaiteke, hatü nüngei mop hatü themeilaüma nüng kübü mahdaiteke, hathü ne-yei nedanghen.”

¹⁵ Pinnyü leipü mophimo dangei hathü dou bhei leihpüthüi pinnyü ponghahpü kü nyemei wongmü thepei youngei yaongtü,

¹⁶ “Onyükei, onyükei, manghmepü hatü iyshüm keipü ashak, hon, douvang yaong hatü yüknyüi owtü nyupü longpü chingnyü!

¹⁷ Ghonda hük kü mopthü peü nyadaiteke!” shei ehen. Hahepak kü jahas shembüthü, yungchingei yen kü longteipüthü, jahas yüpbüthü, hatü yungchingei bhei leihpüthü peü tailuei yaonghen,

¹⁸ hatü pinnyü kü bahpü aw kübü awshit eetü vaüei hapakei ehen: “Hapa longpü chingnyü kei mepa chingnyü nyüpa?”

¹⁹ Jom thepei youngei nyushingkü jomi jomei shangjing kü kübhih mukei sheptü lenei hapakei ehen: “Onyükei, onyükei, longpü chingnyü, jahas angpüthü peü pinnyülei mopi shemmei leipüthü melei daipa! Mehenangkü ghonda hük kü pinnyü nyadaiteke.

²⁰ Pinnyü lomohpü nangkü mongongtuh, Oh vangsho am, daülangpü, phongshan hatü thihivamthü! Mehenangkü Kahvangi am nangkü pinnyü kü shahphenteke.”

²¹ Hahepak kü wong kohpü vangsho phongshan hüki hahngüm yaong hük yah-ei yungchingei shüktü eteke: “Hapakei mangshi longpü chingnyü Babylonü noei shüktükhen, hatü hajük kü nedanghen;

²² hatü harp vüngpü, kesho lokbüthü, liping vüngpüthü hatü phaam vüngpüthülei ngeü hajük kü nedanhen. Mepa bhei leihpü amao am touei hajük kü ne-eehen. Hajük kü yaong shemshaki hah ngümpü ngeü nedanhen;

²³ hatü awdük vangngai-i hajük kü am kü nekhanghen; hatü sheyü yiükyahpa hatü doi dailalei ngeü nedanhen; mehenangkü nüngei bhei leihpüthüyü kahdoknyü kü longpüthü nyupeih. Nüngei phongyom hüngletpü doui kahdoknyü luhahteke.

²⁴ Nüng kü thibü hatü daülangpüthülei iy, hatü kahdoknyü kü jütükpüthülei iy lüpshi nyüke.”