SHAKEI VAMPÜ 16 - DAÜLANGPÜ LAIHING (BSI)

Kahvangei Mongshih Nükshung

¹ Hapheikü phopshem leipü ngeü longpü hük vangsho phongshanthü nyet kü, “Daituh, hatü Kahvangei mongshih nükshung nyet kahdoknyü kü khüpeishuoh” shei epü ngei dan.

² Hanangkü shongpü vangsho phongshan daiyei büpalei nükshung kahdoknyü kü khüpshuoh, hatü yemhalei füoshang shüngpü, hatü hapalei lajei kü khümpüthü kü nyembenüng hatü yashanshi thatbenüng ma vam.

³ Nyipabü vangsho phongshani büpalei nükshung yungching kü khüp, hatü hapayü dipü shennyakei iy kei leidai, hatü yungchingei nyupü yemha lemphü di.

⁴ Jempabü vangsho phongshani büpalei nükshung yungyen hatü yunglokthü kü khüp, hatü hathü iy leidai.

⁵ Hahepak kü yung yompü vangsho phongshani epü hapa ngei dan: “Nüngü shahhing, Oh Daülangpü Hük, Üpa nyüpa, üpa nyutepa, mehenangkü nüngi hathü shahphenteke;

⁶ mehenangkü jomi daülangpü, hatü thibüthülei iy yenhüteke, nüngi jom kü iy yinghen shuohteke. Jomi ha danghen shangpeih!”

⁷ Hahepak kü moidü leipü jangpü ngeü hük hapakei dan: “Hih, Oh Jeiyong Shembüpa Kahvang, nüngei shahphenü jiüshangi hatü shahhing!”

⁸ Alipabü vangsho phongshani büpalei nükshung vanghenyü kü khüp, hatü hapai shennyakthü kü aw omshi shaamhen shuohteke;

⁹ Jomphongü ahshi-üng nyahshi shaamhü, shejao hathü cham kü wong nyupü Kahvangei men thaüvaü, hatü jomi mong lepei büpa kü müknyinshekhang neshuoh.

¹⁰ Ngapübü vangsho phongshani büpalei nükshung yemhalei ong uoshing kü khüp, hatü hapalei ongching vangnyak kü hüngdai; tüngpai shennyakthü jomei yei kü ket,

¹¹ hatü jom kü tüngpü hatü ma nangkü vangsho Kahvang kü thaüvaü, shejao jomi jomei douthü kübü mong nelep.

¹² Vokpabü vangsho phongshani büpalei nükshung longpü Euphrates yungyen kü khüp, hatü heongphi leipü ongpa kü lem temhen shingvaishi hapa yung jepdai.

¹³ Hahepak kü ngei mang laangha jem luk keiha Dragonei ju, yemhalei ju, hatü shahshem thibülei ju leipü vamküpü ee.

¹⁴ Hathüyü kahshih laanghathü Jeiyong Kahvangei longpü nyih kü vehok hokhen shingvaishi kahdoknyü bahiyang peü kübü ongthü touei nanglakthü nyükei thaihühen nyangeihepü dou dükei daipü nyuteke.

¹⁵ “Veituh, ngei gühpa hük keiha peikünyeih! Üpai thaeimaei owhiai temtü nyu, hatü bümkong veübenüng nehu-i dai moihiman.”

¹⁶ Hahepak kü jomi Hebrew shah mü Armageddon shei epü shingei ongthü thaihü.

¹⁷ Nyetpabü vangsho phongshani büpalei nükshung vangshangei domei anshih, hatü ngeü longpü hük phopshem mongeipü ong uoshing leipü vamei, “Ha dükteke!” shei e.

¹⁸ Halei klang nyepei, vangmuk khungei hatü ahshi mangshi pedi vükei pei; kahdoknyü kü hangku nyuhinüng chemao hapakei nevam; pedi ahshi mangshi vükteke.

¹⁹ Hapa chingnyü jem anei handai, hatü jatthülei chingnyüthü dodai. Kahvangi longpü Babylon deih-ei dang, hatü büpa mongshihpü yiüshong pinnyü kü shuoh.

²⁰ Shübaongthü peü nyaidaikem hatü kahshang neshiüi leidai.

²¹ Longpü shüyaongthü hük kü-üng dokshuohjü dok pinyipüan mü nyeishi hapa shüyaong vüshihpü cham nangkü Kahvang kü mangthaüvaü thahshi shennyakthü kü vangsho leipü hathü vüshihteke; hapa chamü longi nyemshihanshi nyuteke.