SHAKEI VAMPÜ 14 - DAÜLANGPÜ LAIHING (BSI)

Mi Cheha hatü 144, 000

¹ Hapheikü ngei veishuohjü Zion Kahshangei Mi Cheha yaongshi nyu, hatü büpa mü jom 144, 000 büpalei men hatü Chepalei men shangba kü nyangpüthü nyuteke.

² Hatü ngei vangsho leipü yung longpülei ngeü kei hatü vangmuk ngeü kei danteke, hapa ngeü-ü harp vüngbüi harp vüngpükei danteke,

³ hatü jomi ong uoshing touei, hatü yemmü nyupü yemhathü ali touei, hatü behethü touei kesho ja hük lok. Kahdoknyü leipü angei leilangpü jom 144, 000 mü lenei üpaiyao ha kesho nenying.

⁴ Jomphongü nyüha mü nesheihpüthü; mehenangkü jom daüeilangei nyu; jomi Mi Cheha melei dai, halei müei dainyüke. Jomphongü hangku khong kübü Kahvang hatü Mi Cheha shingvaishi angei leilangpü shongpü betjükthü nyuteke,

⁵ hatü jomei ju kü shahshem neshiü, jom kü eela neshiü.

Vangsho Phongshan Jemei Shahjang

⁶ Hapheikü ngei lebü vangsho phongshan kahdoknyülei nyupüthü kahmük, jat, shahlem laolao hatü nanglakthü touei baonghen shingvaishi shahjangmei kotü vangsho jiamei piyei ee.

⁷ Büpai ngeüwong anei, “Kahvang nyemtuh, hatü büpa kü müknyinshekhang shuohtuh; mehenangkü büpai shahphenhen hepak ngoiteke; hatü vangsho, kahdok, yungching hatü yunglok lingpüba kü khümtuh” shei e.

⁸ Hapheikü nyipabü vangsho phongshan, shongpüba phei müshi, “Doteke, doteke longpü Babylon! Pinnyü iyjeiphaileipü mongshihpü yiüi kahmük peü kü yingteke” shei eteke.

⁹ Hapheikü jempabü vangsho phongshan, shongpü nyi phei müshi ngeüwong anei, “Üami yemha hatü hapalei lajei kü khüm, hatü hapalei füoshang jomei shangba hatü lak kü shüngei nyu,

¹⁰ jomphongao Kahvang mongshihpü yiü yung nevuki büpalei phongshanei pati kü shihpü yinghen, hatü jomphongü büpalei daülangpü vangsho phongshanthü hatü Mi Cheha touei aw hatü awkaong meli bahpü shingei shukhen,

¹¹ hatü jom shukpü awshit den den shangei aonghen. Üami yemha hatü hapalei lajei kü khüm, hatü hapalei men kübü füoshang shünghah, nyihnüng nevaijü yanüng meheyao nyiushemmei neshiü.”

¹² Daülangpüthü üami Kahvangei shahkung bang, hatü Jisu kü hinglempü kü wongshongi shong, hathü kü munenhen thongnyüke.

¹³ Hapheikü vangsho leipü ngeü hük, “Ha nyangtuh: Shaang mü leitü üami Shembüpa kü dinya, dipüthü moihiman” shei epü ngei dan. “Hih” shei Laanghai enyüke, “Jomi jomei dou kübü nyiumei danghen, hatü jomei dou jom phei mühen.”

Kahdoknyü Hah Vetpü

¹⁴ Hapheikü ngei veishuohjü phum shola nyuteke, hatü halei uopeyü Shennyak Ha hük keiha büpalei shangjing kü hon athen hük thentü, büpalei lakei nahpü hahvet longkhoih hük noshi nyuteke.

¹⁵ Phopshem leipü lebü vangsho phongshan hük phum kü uopüba kü ngeüwong anei nyükyaki vamei, “Nüngei hahvet longkhoih noei hah vettuh; hah vethen hepak ngoidaiteke; mehenangkü kahdoknyü hah vethen meishi ngoidaiteke” shei e.

¹⁶ Hanangkü phum kü uopübai kahdoknyülei hahvet longkhoih lüei shanshih-ei kahdoknyü vetlang.

¹⁷ Hapheikü vangsholei nyupü phopshem leipü lebü vangsho phongshan vam, hatü büpa leiyao hahvet longkhoih noshi nyuteke.

¹⁸ Hahepak kü moidü leipü aw shak kü wong nyupü lebü vangsho phongshan vamei hahvet longkhoih nahpü nopüba kü ngeüwong anei, “Nüngei hahvet longkhoih nahpü notuh, hatü kahdoknyü leipü nyalingngupai thailangtuh; mehenangkü hathü shümteke” shei e.

¹⁹ Hanangkü hapa vangsho phongshani büpalei hahvet longkhoih kahdoknyülei lüei shanshih-ei kahdoknyü leipü nyalingngupai vetei lei, hatü büpai ha Kahvangei mongshih yiü ngümshingei shükteke.

²⁰ Hathüyü chingnyü haolei yiü ngümshingei shouptük, hatü hapa ngümshingei shouptük, hatü hapa ngümshing leipü iy meter nyi hükshing shaoshi aong, hatü kilometer 300 hükshing taishi yenteke.