SHAKEI VAMPÜ 12 - DAÜLANGPÜ LAIHING (BSI)

Nyüha hatü Dragon

¹ Vangsholei nenyingaokbenüng nyangeihepü hük vam: Nyüha hük vanghenyü ow kei owtü, lennyü pinnyülei la phangei, hatü pinnyülei shangjingei litha anpünyi yah-ei athen thentü vamteke.

² Pinnyü-ü büm nekongi nyu, hatü hapeü anghen ngoipü nangkü tüngpai vaüei nyu.

³ Hahepak kü shao vangsholei lebü nenyingaokbenüng nyangeihepü hük vam: Dragon hakla longpü hük shangjing nyet, vaung an hatü athen nyet shangjing ieyei kü athen thentü nyu.

⁴ Büpalei mei-i vangsho leipü lithathü phaihan jem kübü hük maoei kahdokei shüktük. Hapheikü Dragon peiyei hapeü anghen nyupü hapa nyüha touei pinnyüi hapeü angjahinüng hahtüknüng yaongshi nyuteke.

⁵ Hatü pinnyüi yeshang ha hük kahmük peü kü nyiamlüng noshi vanglem lemhen büh. Shejao pinnyülei hapeü aetei Kahvang hatü büpalei ong uoshing touei anlang;

⁶ hatü hapa nyühayü Kahvangi pinnyü kü nyih 1260 jungeilanghen temtüktü nyupü jahpanei laongei lüdai.

Mikhaeli Dragon Neüpü

⁷ Vangsholei vehok hük vam; Mikhael hatü büpalei vangsho phongshanthüi Dragon khüei hok. Dragon hatü büpalei phongshanthüiyao ha kü khangei hok,

⁸ shejao jomphongi neneü, hatü hajük kü jom shing vangsholei nyuhen shing neshiüi leidai.

⁹ Hapa longpü Dragon, aivang mebü biü, üpa kü Shepe nevaijü Satan shei nyük, kahdoknyü kemei luhahpüba– büpa hatü büpalei phongshanthü kemei kahdoknyülei shükei shanshih.

¹⁰ Hahepak kü ngei vangsholei ngeü longpü hük eyei dan: “Shaang yemleipü hatü ngan, hatü jenei Kahvangei ongching, hatü büpalei Messiahlei wong peiteke. Mehenangkü Kahvang touei yaongtü, jenei jeihinaüthü kü nyakhingai thüngei thaüvaüpüba vangsho leipü yepei shüktükteke.

¹¹ Shejao jomi Mi Chehalei iy homei, hatü jomei shah-i denpü homei büpa neütükteke, mehenangkü dihen vaijao jomü yangnyu lanei shuohhen mongei nyuteke.

¹² Hanangkü mongongtuh, am vangsho am, hatü halei nyupüthü! Shejao kahdok hatü yungching onyükei; mehenangkü mongshih longpü mü kahshih am touei yiüei nyüke; mehenangkü büpalei hepak shohdaiteke shei büpai nying.”

Dragoni Shao Kahdoknyülei Hokpü

¹³ Hanangkü mechem Dragoni büpa kahdokei vüshihteke shei nyingpa, büpai yeshang hapeü hük bühpü nyüha kü changteke.

¹⁴ Shejao hapa nyüha kü hapa biü toueipü pinnyü kü bong jem mü hükkeishing jungpü jahpanei pidaihen shingvaishi alang longpülei yang nyi shuoh.

¹⁵ Hahepak kü büpalei ju leipü biüi hapa nyüha bhongei nyemshanlang shei yungnyü büng kei yung bhaiyei ngaiteke.

¹⁶ Shejao kahdoki pinnyü kü sheüh; kahdoki laophülei ju katü biüi ngaipü yung lühtük.

¹⁷ Hahepak kü hapa Dragoni nyüha kü mongshih-ei Kahvangei shahkung bangpü hatü Jisulei denpü kü vaipü aopü lebü hapeüthü mü hoknüng dai.

¹⁸ Hapheikü Dragon yungching yungkungei bhihdü shangkü yaongteke.