SHAKEI VAMPÜ 11 - DAÜLANGPÜ LAIHING (BSI)

Denbü Nyi

¹ Hapheikü lenshuoh keiha ngei kü shethen nyiamlüng hük shuoh, hatü ngei kü, “Daituh, hatü Kahvangei phopshem, moidü hatü halei khümpüthü shettuh,

² shejao phopshem chingshe teshet; ha tuhphongtuh, mehenangkü hayü jatthü kü shuohtükpeih, hatü jomi hapa daülangpü chingnyü kü len pinyipünyi thahshi la-i shouphen.

³ Ngelei denbü nyi kü nyih 1260 dhoila ashak ümtü teteivanhen wong shuohhen” shei e.

⁴ Hathüyü kahdoknyülei Shembüpa touei yaongpü olive pü nyi hatü awdük shemshing nyi nyüke.

⁵ Hanei ami hathü kü bheihüjema, jomei ju leipü aw vamei vepathü hahtükhen; hanei ami hathü kü bheihüjema hathüao hapakei jütükhen.

⁶ Jomi tetpüvanpü nyihthü kü vang nekeihen mü phumshang küptükhen wong nyüke, hatü jomi yungthü iy leitükhen, hatü jomi napükei kahdoknyü kü cham peihühen wong nyüke.

⁷ Mechem jomi jomei denpü shuoh-ei kemhen, shaongdoh neshiüpü kahsha leipü vampü yemhai jom mü vehok hokhen, hatü jom neü-ei jütükhen,

⁸ hatü jomei mahmahngü jomei Shembüpa shophang kü appü chingnyü chingyangshongei shükshi nyuhen. Hapa chingnyülei men lappeyü Sodom nevaijü Ijip nyuhen.

⁹ Mehenangkü nyih jem mü bhaoei nanglakthü, jatthü, shahlem laolao epü peü hatü kahmükthüi jomei mahng kü veihen, hatü jom mahngchongei nevüpih shei ehen;

¹⁰ hatü kahdoknyü kü nyupüthüi jom shak kü mongongteihen hatü moeitapei thintho jeiteihen; mehenangkü hapa thibü nyi-i kahdoknyü kü nyupüthü kü longi shüveiteke.

¹¹ Shejao nyih jem mü hükkei shing peihpheikü Kahvang leipü yangnyu ngü jom kü shüteke, hatü jomi jomei la-i yaong, hatü üami hathü ee, nyemteke.

¹² Hahepak kü jomi vangsho leipü ngeü longpü hük jomphong kü, “Halei aongkei!” shei epü dan. Jomei vepathüi veishi jomphong vangsholei phumshang kü aongdai.

¹³ Ha vangpan mü pedi longpü hük vük, hatü chingnyü phaihan an kü phaihan hük dodai; shennyak haja nyet thahshi hapa pedi vükpü kü mah, hatü aopüthüi nyemei vangsho Kahvang kü müknyinshekhang shuoh.

¹⁴ Nyipabü onyükei peihdai. Jempabü onyükei lomi peikünyüke.

Nyetpabü Amit

¹⁵ Hapheikü nyetpabü vangsho phongshani büpalei amit vüng, hatü vangsholei ngeü longpü vamei e: “Kahdoknyü ongchingü jenei Shembüpa, hatü büpalei Messiahlei ongching leidaiteke, hatü büpai den den kü ong vaihen.”

¹⁶ Hahepak kü Kahvang touei behethü jom hapüali jomei ong uoshing kü uopüthüi jomei dhe aümei shaei Kahvang kü khümei e,

¹⁷ “Hami nüng vihnyeih, Shembüpa Jeiyong Kahvang, üpa nyüpa, üpa nyutepa, mehenangkü nüngi nüngei ngan longpü yah-ei vanglem lemhen pangteke.

¹⁸ Kahmükthü mongpuk vamteke, shejao nüngei mongshih peiteke, hatü dipüthü kü shahphenhen, nüng chongphopü thibüthü, daülangpüthü hatü nüngei men kü nyempü longpü maanpü peü kü thintho shuohhen, hatü kahdoknyü mangtükpüthü mahtükhen hepak ngoiteke.”

¹⁹ Hahepak kü vangsho leipü Kahvangei phopshem apteke, hatü büpa Vangpüshuwpü Pela phopshem mongei ee, hatü halei klang nyeppü, klungpü hatü vangmuk khungpü, pedi vükpü hatü vihpü shüyaong nyuteke.