SHAKEI VAMPÜ 10 - DAÜLANGPÜ LAIHING (BSI)

Vangsho Phongshan hatü Maanpü Laidü

¹ Hapheikü ngei veishuohjü wong kohpü lebü vangsho phongshan hük vangsho leipü yiükei-i ee. Büpa phumi jümei yahtü, büpalei shangjing kü nyiamnyünyiamkang kohtü nyu; büpalei dhe vanghenyü kei hatü büpalei la aw shemnyü kei nyu.

² Büpai maanpü laidü aptü büpalei lakei noteke. Büpalei ladahphi yungching kü hatü büpalei lanyongphi kahdok kü shouptü nyu,

³ hatü büpai mailang ngüngpükei ngeü longpai ngüngteke. Mechem büpa ngüngpa, vangmuk nyet khungteke.

⁴ Mechem vangmuk nyet khungpa, ngei nyangnüng shei nyu, shejao vangsho leipü ngeü hüki, “Vangmuk nyeti mehe e, ha kü füoshang shüngtüktuh, shejao hapa tenyang” shei epü ngei dan.

⁵ Hahepak kü yungching hatü kahdokei yaongshi eepü vangsho phongshani büpalei lakdahphi vangsho philei haongei antü,

⁶ den den kü nyupüba üpai vangsho hatü halei nyupü, kahdok hatü halei nyupü hatü yungching hatü halei nyupü ling, büpalei men kü vangteke: “Pheiyei nenyupih,

⁷ shejao nyetpabü vangsho phongshani büpalei amit vünghen nyihthü kü Kahvangei doujo büpai laophü chongphopü thibüthü kü epükei vamkahen.”

⁸ Hahepak kü ngei vangsho leipü danpü ngeüi shao chem ngei kü, “Yungching hatü kahdokei yaongshi nyupü vangsho phongshanei lakei aptü nopü laidü yahtuh” shei eteke.

⁹ Hanangkü ngei heih-ei vangsho phongshan kü maanpü laidü yahshih shei e, hatü büpai ngei kü, “Yahtuh, hatü ha hahtuh; hapayü nüngei vomei shahyaki nyuhen, shejao nüngei ju keyü nyahjiü kei vüngnyangi chongkahen” shei e.

¹⁰ Hanangkü ngei vangsho phongshanei lak leipü maanpü laidü yah-ei hahteke; ngei hapa hahjü ngelei ju kü nyahjiü kei vüngnyangi, shejao ngelei vomü shahyaki nyuteke.

¹¹ Hahepak kü jomphongi ngei kü, “Nüngi shao nanglak, kahmük, shahlem hatü ongthü jung longi teteivanei ehen vongbong” shei eteke.