SHAHPHENBÜTHÜ 8 - DAÜLANGPÜ LAIHING (BSI)

Gideoni Midian am Neüpü

¹ Hapheikü Ephraim ami Gideon kü, “Midian am mü hoknüng daishingkü mehekei nüngi ham kü nethongpa? Nüngi mehekei ham kü hapakei nonya?” shei jomi longi büpa kü langmaanteke.

² Shejao büpai jomphong kü, “Ngei mehe dükaokpa hayü mekei etü amphongi dükpü mü shetteiaokhenang? Ephraim amei betjükdhei thaipeyü Abiezer amei betjükngong vaümpü mü meipü nevaipü je?

³ Kahvangi Midian am mübü Oreb hatü Zeeb nyi ammei lak kü shuohteke. Ammi dükpü mü shetteijü ngei mehe hayaoha dükaokpa?” shei eteke. Büpai mechem hapakei eshuohpa, jomphong mongshihpü meidai.

⁴ Hahepak kü Gideon hatü büpalei veshanthü kho jem Jordan yung homei dai. Jomi longi nyiudaijao nedoh-i vepathü changei dai.

⁵ Mechem jomphong Sukkoth ngoipa, büpai jom kü, “Chingmeilemlingei ngei mü daipüthü kü hahying shuohtükütuh; mehenangkü jom aeipai hemdaiteke, shejoong nedoh-i Midian am Zebah hatü Zalmunna ongpa nyi phei changei dainyüpeih” shei e.

⁶ Shejao Sukkoth am mübüthüi, “Mehekei hami nüngei veshanthü kü hahying shuohhenang? Shaangkei Zebah hi Zalmunna nyi mangyeppü je?” shei e.

⁷ Hanangkü Gideoni, “Meiteke, mechem Shembüpai ngelei lak kü Zebah hi Zalmunna nyi yahphahen, ngei ammei hanghaphai hüh-i bheiyei shaaktükhen” shei e.

⁸ Hatoueipü büpa Penuel lemei aongei aihük mü jom kao phe, shejao Penuel ami Sukkoth ami epükei-üng eshuohteke.

⁹ Hanangkü büpai Penuel am kü, “Ngei mechem aokpü dangei leihen, ngei hapa shangdü bentükhen” shei e.

¹⁰ Shaang Zebah hatü Zalmunna nyiyü jomei veshanthü mü Karkorlei nyu. Heongphi kübü peipü veshanthü khong kübü haja anpünga mon aoei nyuteke. Veshanthü lakh hük mü haja kukhayü jütük.

¹¹ Gideoni Nobah hatü Jogbehah heongphi lem kü heih-ei show uopü veshanthü jü.

¹² Midian am Zebah hatü Zalmunna nyi nyaidai, shejao changei daiyei yep, hatü veshanthü kemei lomohhü.

¹³ Mechem Gideon vehok leipü Heres lemei leipa,

¹⁴ büpai Sukkoth leipü nethe hük yepei jomphong kü pheyei Sukkoth kübü mübüthü jom 77 thahshi men nyangteke.

¹⁵ Hapheikü Gideoni Sukkoth am touei peiyei, “Ngelei veshanthü kü hahying shuohtükütuh shei ejü amphongi neshuohpih shei ngei kü naamei, ‘Shaangkei Zebah hi Zalmunna nyi mangyep-aokpü je?’ shei epeyü hapa khih” shei e.

¹⁶ Büpai yingnyü leipü daümnyak hüh yah-ei leiyei jomphong kü hapai bheiyei hanghihüteke.

¹⁷ Büpai Penuel leipü shangdü bentük hatü hapa ching leipü shennyakthü jütük.

¹⁸ Hapheikü büpai Zebah hatü Zalmunna nyi kü, “Anjinyi-i Taborlei jütükpü shennyakthü nang mekeiang?” shei phe. “Jomü amphong leshi jom kemei longha ongha kei khih” shei e.

¹⁹ Gideoni, “Jomphongü ngelei jeihinaüthü; nyü hük hathü hih. Anjinyi-i jom nejülangmeyü ngeiyao anji nejühen vaipeih” shei e.

²⁰ Hanangkü büpai hashongpa Jether kü, “Heih-ei jiji jütuh” shei e. Shejao chehai yan noei nebapaoki jü-ü; mehenangkü büpa ahshi hashih vaishi shiüteke.

²¹ Hahepak kü Zebah hi Zalmunna nyi-i Gideon kü, “Nüngi-üng heihei henji jütuh; baha-üng bahalei dou düktuh” shei e. Hanangkü Gideoni jiji jütüktü utei üng leipü chühiyük bhühlang.

Gideonei Yaongnaüya

²² Hahepak kü Israel am kemei Gideon kü, “Nüng hatü anhü anha-i ham shangkü vanglem lemkütuh; mehenangkü nüngi ham Midian amei lak kübü yangpeih” shei e.

²³ Gideoni jangei, “Ngei nevaijü hapeüi am shak kü vanglem nelemkahen, shejao Shembüpai am shak kü vanglem lemkahen” shei e,

²⁴ hatü büpai jomphong kü, “Ngei amphong kü lemhük pheshah; amphongi yah-ei leipü dhaongchü yahshih” shei e. (Midian amao hon dhaongchü chüteipü vanglem nyuteke.)

²⁵ “Hami mongongshi shuohhen” shei nanglakthüi jangei e. Hanangkü jomi kahdok kü ashak nyemtü jom peüi laophüi yah-ei leipü hon dhaongchü chingteke.

²⁶ Gideoni dangpü hon dhaongchü peü shepei dokshuohjü dok kukha hükshing nyu, hatü hayü owhiai, chühiyük, hatü Midian ongthüi owpü manghshempü ashakviha, nevaijü utthülei üng kü ngeihpü nyiamvüthü neomi nyuteke.

²⁷ Gideoni hapa hon yah-ei yaongnaüya hük lingei jom ching Ophrahlei tuh. Israel am kemei Kahvang yakphongtü hapa kü khüm, hatü hapayü Gideon hatü jom shem shingvaishi hühhihang leiteke.

²⁸ Hapa keiha Israel ami Midian am neütük, hatü mechemao hajük kü jom longshangei nenyu. Gideon yemmü nyupü thahshi vangbong pinyi thahshi kahmük kü chingmeivangmei nyu.

Gideon Dipü

²⁹ Joashlei cheha Jerubbaal shemei leiyei nyu.

³⁰ Büpalei hapeü yeshangthü pejempüan nyu; mehenangkü büpai nyüha longi yahteke.

³¹ Shekhemei nyupü büpalei yiükphüiyao bahanaü hük bühjateke, hatü büpai ha naü kü Abimelekh shei men.

³² Joashlei cheha Gideonü behe leiyei di, hatü Abiezer am phangei ching Ophrahlei chepa Joashlei mahngchongei vüteke.

³³ Gideon didaihinüng Israel ami shao Baal kahvang kü khüm. Jomphongi Baal-Berith jomei kahvang vaishi ling.

³⁴ Israel ami jomei Kahvang, üpai nyonghidah peü kübü vepathülei lak kübü yangshuohpa, ha deih-ei nedang.

³⁵ Israel am shingvaishi hajük doumei dükpü Jerubbaal (Gideon) am shem kü bampü nehu.