SHAHPHENBÜTHÜ 7 - DAÜLANGPÜ LAIHING (BSI)

Gideoni Midian am Neütükpü

¹ Hapheikü Jerubbaal (hapayü Gideon) hatü büpalei veshanthü dhom mü lomi paoei Harod yungkukei baümtap ve, hatü Midian amei baümtapü Moreh Kahshang phangei kahji kü jom kü apshaphi lemei shiüteke.

² Shembüpai Gideon kü, “Midian am neühen shingvaishi nüng mü nyupü veshanthüyü ngei keyü ahshi ahteke; jomphongi jomei wongi neüpeih shei deihhen hatü ngei kü dhüm neshuohhen.

³ Üami nyemei deihnya, nyokei shemei leidaituh; aopüthü Gilead Kahshangei nyuhen eyeishuoh” shei e. Hanangkü haja kukha nyokei shemei leidaitü haja an mon aoteke.

⁴ Hahepak kü Shembüpai Gideon kü, “Shao-üng veshanthü ahteke. Jomphong yungyenei müei yiütuh hatü halei ngei nüng kü daihenthü jephahen. Ngei hapa shennyak nüng mü daihen shei ephüjü büpa nüng mü daihen; shejao ngei nüng mü hapa shennyak nedaihen shei ephüjema, büpa nüng mü nedeihen” shei e.

⁵ Hanangkü Gideoni shennyakthü yungyenei müei yiü. Halei Shembüpai Gideon kü, “Shi-i kei yei-i laiyei yung yingpüthü hayaoha, aümei shatü yung yingpüthü kemei hayaoha khengei tuhtuh” shei eteke.

⁶ Yei-i laiyei yingpüthü jom kho jem nyuteke, shejao aopüthü peü aümei shatü yingteke.

⁷ Hahepak kü Shembüpai Gideon kü, “Laiyei yung yingpü shennyak kho jem mü ngei Midian am nüng kü shuohhen. Aopü kemei shemei nyokei leishihtuh” shei e.

⁸ Hanangkü Gideoni jom kho jem mon büpa mü tuhtü lebüthü kemei jomi yahpü hahying hatü amitthü yahlangtü shemei nyokei leishihtük. Midian amei baümtapü jom phangkü kahjilei nyu.

⁹ Ha ya-üng Shembüpai Gideon kü, “Paotuh hatü yiüei hapa baümtap shümtuh; mehenangkü nüngei lak kü ngei hapa shuohhen.

¹⁰ Nüngi hapa hahhen nyemjema, nüngei chongphobü Purah müei baümtapei yiütuh,

¹¹ hatü jomphongi mehe eteikahen ha bangtuh, hatü hapheikü mon nüngi jom hahhen monglongkahen” shei e. Hanangkü Purah jiji vepathülei baümtap junghükphi thahshi yiü.

¹² Midian am, Amalek am hatü heongphi kübü jat shennyakthü shoukthü kei kahjilei yaüshi hatü jomei utthüyü yungching bhihhiphang kei eeteke.

¹³ Mechem Gideoni hapa shing ngoipa, küphü hüki küphü hük kü mangh eteijapü büpai dan, hatü büpai mangh hük, “Barley aungi lingpü toilangpü aan hük ngowei shaei Midian amei baümtapei shüteke, hatü hapai baümtap kü sheü, hatü baümtap shakhimong leiyei bendai-i manghküpeih” shei ejapü danteke.

¹⁴ Hatü büpalei küphü hüki, “Hapayü lebü nevai, shejao Israel am Joashlei cheha Gideoni jen hahhen nang manghpü khih! Büpalei lak kü Kahvangi Midian am hatü veshanthü kemei shuohtükteke” shei ejateke.

¹⁵ Mechem Gideoni hapa mangh eteipü hatü hapa tetpü danpa, büpai Shembüpa kü aümei khüm, hatü Israel amei baümtapei leiyei, “Bangtuh, mehenangkü Shembüpai Midian am ammei lak kü shuoh-ei nyüke” shei e.

¹⁶ Büpai shennyak kho jem khong jem vaishi han, hatü jom peü kü amit hatü dük kong kü mongei nyak-aw hükbaong shihtü shuoh.

¹⁷ Büpai jomphong kü, “Mechem ngei baümtap jung hük ngoikahenshang, ngei kü veituh, hatü ngei mehe dük, hapakei düktuh.

¹⁸ Mechem ngei hatü ngei mü nyupüthüi amit vüngkahenshang amphongiyao baümtap shinei amit vüngtuh, hatü ‘Shembüpa hatü Gideon shingvaishi!’ shei lentuh” shei eteke.

¹⁹ Hanangkü Gideon hatü büpa mü nyupü shennyak kho hük kemei baümtap jung phihükei nyak jiam shekü veyompüthü jeitei pheikü peiyei jomi amit vüng, hatü jomei lakei nopü dükthü bhaoteke,

²⁰ hatü lebü khong kemei aihük mü dükteke. Jom peüi nyak-aw laknyong lemei no, hatü amit lakdah lemei notü, “Shembüpa hatü Gideon nyi shingvaishi hoknyüpeih!” shei lenteke.

²¹ Mechem jomi laophü yaongpü shingei baümtap shinei yaongshi nyupa, baümtap mongeipü shennyakthü kemei nyemei vaüyaki nyaidaikem.

²² Mechem jomi amit kho jem vüngpa, Shembüpai veshanthü jom jom bapteihüteke, hatü veshanthü Zererah phikü Beth-Shittah thahshi hatü Tabbath yopai leipü Abel-Meholah thahshi nyaidaikem.

²³ Hapheikü Naphtali, Asher hatü Manasseh shennyakthü kemei nyük, hatü jomphongi Midian am kü changei sha,

²⁴ hatü Gideoni Ephraim phaüshang jatthü kemei kü phongmokbüthü shomei, “Peikei, hatü Midian am khüei hokshah, hatü Jordan yungyen kübü Beth-Barah yungyen thahshi tapshah” shei e. Hanangkü Ephraim am shennyakthü kemei nyükei Jordan yungyen kübü Beth-Barah yungyen thahshi tapteke.

²⁵ Jomi Midian am mübü Oreb hatü Zeeb nyi yemmü yep. Jomi Orebü Oreb yaongei jü, hatü Zeebü Zeeb amei yiü bhitshingei jü. Jomi Midian am changei dai hatü Oreb hi Zeeb nyilei shangjing Jordan homei Gideon kü koei leijateke.